قىزىلشادان ۆاكتسينا عانا قۇتقارادى

بيىل ءجىتى رەسپيراتورلىق ۆيرۋستىق ينفەكتسيالار قازاننان باستاپ قاراشا, جەلتوقساندا كوپ تىركەلگەن. جۇقپالى اۋرۋلاردىڭ قاتارىنداعى قىزىلشانىڭ دا بەتى قايتار ەمەس. وڭىرلەردە دە قىزىلشا جۇقتىرعاندار كوپ تىركەلدى. بۇل قاتاردا كەشە عانا دۇنيەگە كەلگەن, جاسقا تولماعان نارەستەلەر بار. سەبەبى كۇنتىزبە بويىنشا بالالار جاسقا تولعاندا عانا ۆاكتسينا الادى. نەگە دەسەڭىزدەر, جاسقا تولماعان بالا اناسىنىڭ ءسۇتىن ەمىپ, باسقا دا ەكپەلەردى الىپ قورعانادى ەكەن. ارينە, جاسقا تولماعان بالالارعا دا قىزىلشا اۋرۋى ۇيدەگى ەرەسەكتەردەن جۇققان.

№3 كوپبەيىندى قالالىق بالالار اۋرۋ­حاناسىنداعى دارىگەرلەر قىزىلشا جۇقتىرعان بالا كەلگەندە ناۋقاستىڭ جاعدايىن ءجىتى باقىلايدى. ويتكەنى اۋرۋ­دىڭ اتى, ءتۇرى ءبىر بولعانىمەن سالدارى ەكى بالادا ەكى ءتۇرلى جاعدايدا ءوتۋى مۇمكىن. ءار بالا جاعدايىنا قاراي ءارتۇرلى ەم قا­بىلدايدى. بالالار اۋرۋحاناسىندا 300 توسەكتىك ورىن شاقتالعان. بىراق كۇردەلى ەپيدەميالىق جاعدايعا بايلانىستى ورىن سانى 500-گە جەتكەن. وسىعان قاراماستان, اۋرۋحانادان كۇندەلىكتى ساۋىعىپ شىققان بالالاردىڭ ورنى ۇزدىكسىز تولىعىپ وتىرادى. كوپبەيىندى قالالىق بالالار اۋرۋحاناسىندا ديرەكتوردىڭ ورىنباسارى روزا وتەگەنوۆامەن جۇزدەسكەنىمىزدە, ول جاع­دايى اۋىر بالالارعا قالاي دا بولىمشەدەن ورىن تاۋىپ بەرەتىنىن ايتتى.

– اۋرۋحاناعا تۋعانىنا ءبىر اي بول­عان سابيدەن 18 جاسقا دەيىنگى بالالار قابىل­دانادى. قازىرگى احۋال بويىنشا ايتار بول­سام, قىزىلشا جۇقتىرعان بالالاردىڭ جاعدايى ءارتۇرلى. دەنساۋلىعى ورتا, اۋىر, سوسىن قوسالقى اۋرۋلارى بار بالالار كوپ. بۇگىندە اۋرۋحانادا 200-دەن اسا قى­زىلشامەن اۋىرعان بالا جاتىر. ونىڭ ىشىندە شامامەن 65 بالا جاسقا تولماعان. اۋرۋحاناعا كۇنىنە 70-80 بالا قى­زىلشامەن اۋىرىپ كەلسە, ورتا ەسەپ­پەن سونىڭ جارتىسى بولىمشەگە جاتادى. باسقالارى قارالىپ, دارىگەردىڭ نۇسقاۋىن الىپ, مەكەنجايى بويىنشا ەمحانالارداعى دارىگەرلەردىڭ باقى­لاۋىندا بولادى. جانساقتاۋ بولى­مىندە قىزىلشامەن اۋىرعان 4 بالا جاتىر. ۇشەۋىنىڭ جاعدايى وتە اۋىر. ولار جاساندى وكپە اپپاراتىنا قوسىلعان, – دەيدى ر.وتەگەنوۆا.

الدىڭعى اپتالاردا بالالار اۋرۋحا­ناسىنىڭ جانساقتاۋ بولىمىنە 15 بالاعا دەيىن قابىلدانعان. تاۋبە, ولاردىڭ كوبى جازىلىپ, بولىمشەگە اۋىسقان. مىسالى, وتە اۋىر جاعدايدا جاساندى تىنىس الۋ اپپاراتىنا قوسىلعان 4 بالا بىرەر كۇن بۇرىن وتباسىنا امان-ساۋ ورالعان. وسىلايشا, جانساقتاۋ بولىمىنەن شىققان بالالار اۋەلى بولىمشەگە اۋىسسا, كەيىن ۋاقىت ساتىمەن ۇيىنە شىعادى. قۋانىشقا قاراي, وتكەن اپتادا كۇننىڭ سۋىتقانى جۇقپالى اۋرۋلاردىڭ ازايۋىنا ءسال دە بولسا ىقپال ەتكەندەي. ءيا, ونىڭ ۇستىنە قازىر ەمحانالاردا بالالاردى قوسىمشا يممۋنداۋ جۇمىستارى ءجۇرىپ جاتقانىن ەسكەرگەيسىزدەر. نەگىزى ۆاكتسينا تۋرالى اقپاراتتاندىرۋعا كوبىنە-كوپ ەمحانالار ارالاسادى. ال قالالىق بالالار اۋرۋحاناسىنىڭ مەديتسينالىق قىزمەتكەر­لەرى اۋرۋدىڭ سالدارىمەن كۇرەسەدى.

– دەگەنمەن بالالارىن اۋرۋحاناعا الىپ كەلگەن اتا-انالارمەن ءبىز دە تىلدە­سەمىز. جالپى, ۆاكتسيناعا قارسى بولعان اتا-انانى ەشكىم قيناي المايدى. ولاردىڭ ءوز قۇقى بار. قال-قادەرىمىزشە ءتۇسىندىرۋ جۇمىسىن جۇر­گىزەمىز. ۆاكتسينانىڭ پايداسىن ايتامىز. بىراق مەنىڭ ويىمشا, قازىر اتا-انالار بالالارى قاتتى اۋىرىپ جاتقاندا ۆاكتسينانى نەگە ۋاقتىلى الماعانىن ەسكە الاتىن سياقتى. ۋاقتىلى ۆاكتسينا سالدىرۋ كەرەك ەدى دەيتىندەر كەزدەسەدى. باسقا اۋرۋىمەن الىسىپ جۇرگەن بالالاردىڭ اتا-اناسى سول دەرتىنەن ايىققان سوڭ ۆاكتسينا سالدىرامىز دەپ جۇرگەندە قىزىلشا جۇقتىرىپ جاتادى. وكىنىشتىسى, كەيبىرى جاڭساق اڭگىمە, جەل سوزگە ەرەدى. ال شىن مانىسىندە, ۆاكتسينالاردىڭ سەپتىگىمەن تالاي ينفەكتسيالىق اۋرۋلار اۋىزدىقتالدى عوي. بۇعان عىلىممەن دالەلدەنگەن فاكتىلەر جەتىپ ارتىلادى. ەستە بولسا, 2018 جىلدىڭ سوڭى, 2019 جىلدىڭ باس كەزىندە قىزىلشا اسقىنعان. وسى جولى انەمياسى بار, نەۆرولوگيالىق جۇيەسى اۋىراتىن, تالماسى بار بالالار كوبىنە قىزىلشامەن اۋىرىپ جاتقانىن بايقاۋعا بولادى. ۆيرۋس وسال جەردەن ۇستايدى, – دەيدى ر.وتەگەنوۆا.

بالالار اۋرۋحاناسىندا ءبىز الدىمەن ۆيرۋس ينفەكتسياسىنىڭ بلوگىنە ءوتىپ, ودان ءارى دارىگەرلەرمەن بىرگە انەستەزيولوگيا, رەانيماتسيا جانە قارقىندى تەراپيا بولىمشەسىنە بەتتەدىك. قىزىلشامەن اۋىر­عان بالالاردىڭ جانساقتاۋ ءبولىمى بولەك ورنالاسقان ەكەن. مۇندا قازان ايىندا ەپيداحۋال كۇردەلەنىپ, ناۋقاستار كوبەيگەن تۇستا قىزىلشامەن اۋىرعان بالالاردى قابىلدايتىن بولەك ءبولىم اشىلىپتى. قىسقاسى, عيماراتتىڭ وسى بولىگىندە تەك قىزىلشامەن اۋىرعاندار جاتادى. ولاردىڭ باسىم كوپشىلىگى – 7 جاسقا تولماعان بالالار. 7 جاستان اسقان بالالار شامامەن قىزىلشامەن اۋىرعانداردىڭ 10 پايىزىن عانا قۇرايدى. جانساقتاۋ بولىمىنە بارعاندا ماماندار جاعدايى اۋىر 4 بالاعا قارايلاسىپ جاتقانىن اڭعاردىق. بالالاردىڭ پالاتاسى – تولعان مونيتور. بۇل اپپاراتتار ءار مينۋت سايى­ن قاندى, بالانىڭ جۇرەك سوعىسىن, تىنىس الۋىن, قىزۋىن قاداعالايدى. پالاتادا قىزىلشا اۋرۋى اسقىنعان ەكى جاسار بالا بار. وعان قىزىلشانىڭ سالدارى وكپەگە, نەرۆ جۇيەسىنە عانا ەمەس, بۇيرەككە دە اسەر ەتكەن. جاعدايى وتە اۋىر. وكپەسى قاتتى قابىنعان سوڭ ازىرگە وزدىگىنەن تىنىس الۋعا ءالى كەلمەيدى. با­لالاردىڭ حال-احۋالىن سۇراستىرىپ جۇر­گەنىمىزدە رەانيماتسيا بولىمىنە دارىگەرلەر بەسىنشى بالانى اكەلىپ جاتتى. جۇمىس قاۋىرت. دارىگەرلەر بالالاردى امان الىپ قالۋدىڭ بارلىق قام-قارەكەتىن جاساپ باعىپ وتىر. ءبىز دە بالالاردىڭ كوپ ۇزا­ماي ساۋىعىپ كەتۋىن تىلەپ, جانساقتاۋ بولىمىنەن شىقتىق.

قىزىلشا اۋرۋى – قاۋىپتى. دارى­گەر­لەردىڭ ايتۋىنشا, قىزىلشا اس­قىنعاندا بالالار­دىڭ جوعارى, تومەنگى تىنىس جولدارى زا­قىمدانىپ, دەم الۋى قيىندايدى. ەن­تىگىپ, اۋا جەتپەيدى. سول مەزگىلدە بالا­نىڭ جۇرەگى, ميىنا اۋا جەتپەگەننەن سىر بەرۋى مۇمكىن. قىزىلشا اۋرۋى­نىڭ ءوزى قۇرعاق جوتەلدەن باستالادى. بالا­نىڭ كوزى ءىسىپ, قىزارا باستايدى. اۋرۋ­­دىڭ باستاپقى بەلگىلەرىنىڭ جەدەل رەسپي­راتورلى جۇقپالى اۋرۋلاردان ەش ايىر­ماشىلىعى جوق. تۇماۋعا ۇقسايدى. دارىگەرلەر مۇندايدا بالانىڭ ۇرتىن قاراپ, تەكسەرەدى. ءۇي جاعدايىندا ەرەسەكتەر بالانىڭ اۋىز قۋىسىنداعى بورتپەنى كورمەۋى مۇمكىن. وسىدان بولسا كەرەك, ءبىز بارعان اۋرۋحانادا ەم الىپ جاتقان بالالاردىڭ 90 پايىزى ۆاكتسينا الماعان. دەمالىس كۇندەرى بالالار اۋرۋحاناسىنىڭ قابىلداۋ بولىمىنە قالاداعى باسقا ەم­حانالاردىڭ دارىگەرلەرى كومەككە كەلەدى ەكەن. اۋرۋحانا باسشىلىعى قىزىلشامەن اۋىرعان بالا كوبەيگەن سوڭ وسىنداي قادامعا بارىپ وتىر. دارىگەرلەردىڭ ايتۋىنشا, قىزىلشامەن اۋىرعان ءبىر ادام 15-20 ادامعا ۆيرۋس جۇقتىرۋى ابدەن مۇم­كىن. ۆاك­تسينا الدىرۋعا قارسى بولىپ جۇرگەن اتا-انا­لاردىڭ وسىدان حابارى بولسا كەرەك...

استانا