زاڭ جوبالارىن ازىرلەۋشىلەر وسىلاي دەيدى
كەدەن وداعىنا قاتىستى زاڭ جوبالارى سەنات توراعاسىنىڭ ورىنباسارى مۇحامبەت كوپەەۆتىڭ جەتەكشىلىگىمەن وتكەن پالاتانىڭ كەزەكتى پلەنارلىق وتىرىسىنىڭ كۇن تارتىبىندە تالقىعا ءتۇستى. زاڭدىق قۇجاتتار بويىنشا باياندامانى قارجى ءمينيسترى بولات جامىشەۆ جاسادى.
“كەدەن وداعىنىڭ كەدەن كودەكسى تۋرالى شارتتى راتيفيكاتسيالاۋ تۋرالى”, “2009 جىلعى 27 قاراشاداعى كەدەن وداعىنىڭ كەدەن كودەكسى تۋرالى شارتقا وزگەرىستەر مەن تولىقتىرۋلار ەنگىزۋ تۋرالى حاتتامانى راتيفيكاتسيالاۋ تۋرالى” زاڭ جوبالارى, سونداي-اق “قازاقستان رەسپۋبليكاسىنداعى كەدەن ءىسى تۋرالى” كودەكس جوباسى مەن “قازاقستان رەسپۋبليكاسىنداعى كەدەن ءىسى تۋرالى” قازاقستان رەسپۋبليكاسىنىڭ كودەكسىن قولدانىسقا ەنگىزۋ تۋرالى” زاڭ جوباسى قابىلداندى.
قارجى ءمينيسترى ءوز بايانداماسىندا كەدەن وداعى كەڭىستىگىندە ءوزارا ساۋدا كەزىندە كەدەندىك رەسىمدەۋ مەن كەدەندىك باقىلاۋ الىنىپ تاستالاتىنىن ەرەكشە اتاپ ءوتتى. زاڭدىق قۇجاتتا كەدەن وداعىنىڭ بىرىڭعاي كەدەندىك اۋماعى تۇسىنىگى ەنگىزىلىپ وتىر. سونداي-اق ارنايى جەڭىلدىكتەردى پايدالاناتىن ۋاكىلەتتى ەكونوميكالىق وپەراتورلار ينستيتۋتىن ەنگىزۋ قاراستىرىلعان. جەكەلەگەن كەدەندىك وپەراتسيالاردى جۇزەگە اسىرۋ كەزىندە دەكلارانتتىڭ مۇددەسىن بىلدىرەتىن كەدەندىك وكىل تۇسىنىگى جانە وزگە دە ماسەلەلەر ورىن تاپقان.
ب.جامىشەۆ وسى تاقىرىپ بويىنشا قويىلعان دەپۋتاتتاردىڭ ساۋالدارىنا جاۋاپ بەردى. سۆەتلانا جالماعامبەتوۆا ءوز سوزىندە قىتايدان تاۋار تاسيتىن كاسىپكەرلەردىڭ كەدەندىك باج سالىعى 2-3 ەسە جوعارىلاۋىنان ولاردىڭ دا تاۋارلارى باعاسىن كوتەرىپ, سونىڭ سالدارىنان تۇتىنۋشىلار زارداپ شەگەرىنە نازار اۋدارتتى. كەدەن وداعىنا كىرمەگەن قىرعىزستاننىڭ ارزان تاۋارلارى ەلىمىزدە قاپتاپ كەتپەۋى تۋرالى ماسەلە كوتەرگەن جۇمابەك تورەگەلدينوۆ وسى ماسەلەنىڭ شەشىمىن سۇرادى. ءمينيستردىڭ ايتۋىنشا, قىرعىزستاندا كەدەندىك راسىمدەۋدەن وتكىزىلەتىن تاۋارلارعا دا قازاقستان كەدەن بەكەتىنەن وتكەننەن كەيىن جوعارى ستاۆكالار بەكىتىپ بەرىلەدى. ال كونتراباندالىق تاۋارلارعا توسقاۋىل قويۋ ءۇشىن ەلىمىزدىڭ وڭتۇستىك شەكارالارى بويىندا كۇشەيتۋ جۇمىستارى قولعا الىنعان.
ايتسە دە دەپۋتاتتار كوپشىلىك تاراپىنان ءجيى قويىلىپ كەلە جاتقان كەدەن وداعى كۇشىنە ەنىسىمەن ونىڭ حالىققا تۇسەر سالماعى قانداي بولماق دەگەن تۇرعىدا كوپتەگەن ساۋالدار قويىپ, ءوز پايىمدارىن ورتاعا سالدى. م.كوپەەۆتىڭ پىكىرىنشە, ء“بىزدىڭ كەدەن وداعىنا قاتىسۋىمىزدىڭ ماقساتى مەن ءمىندەتتەرىن, پايداسى مەن تيىمدىلىگىن جاقسى ۇعىنۋ ءۇشىن حالىق اراسىندا ءتۇسىندىرۋ جۇمىستارىن جۇرگىزۋ كەرەك”. توراعا ورىنباسارى بۇل ءىستىڭ دەپۋتاتتارعا دا قاتىستى ەكەنىن ايتتى. “جەرگىلىكتى اكتيۆپەن, كاسىپكەرلەرمەن جانە جۇرتشىلىقپەن كەزدەسۋلەردە ادامدار ءوز ساۋالدارىنا ناقتى جاۋاپ الۋى ءتيىس”, – دەپ اتاپ ءوتتى م.كوپەەۆ.
وتىرىستا “جەر قويناۋى جانە جەر قويناۋىن پايدالانۋ تۋرالى”, “قازاقستان رەسپۋبليكاسىنىڭ كەيبىر زاڭنامالىق اكتىلەرىنە ءورت قاۋىپسىزدىگى ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى” جانە “قازاقستان رەسپۋبليكاسىنىڭ كەيبىر زاڭنامالىق اكتىلەرىنە كەدەندىك رەتتەۋ جانە سالىق سالۋ ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى” زاڭ جوبالارى دا قارالدى.
اسقار تۇراپباي ۇلى.