ريددەردەگى حاريۋزوۆكا وزەنىنىڭ ارناسىندا مۇز قاتۋى سالدارىنان سۋ دەڭگەيى كوتەرىلىپ, جاقىن ماڭداعى كيروۆ كوشەسى, وسكەمەن, حاريۋزوۆسكي بۇرىلىسىنداعى جەكە سەكتوردىڭ ءتورت اۋلاسى مەن كيروۆ كوشەسىندەگى ەكى جەر ءۇيدى سۋ باسىپ قالدى. ايماقتىق توتەنشە جاعداي دەپارتامەنتىنىڭ قىزمەتكەرلەرى قاۋىپتىڭ الدىن الۋ ءۇشىن باسقا تۇرعىنداردى ەۆاكۋاتسيالاۋدى ۇسىنعان. الايدا تۇرعىندار ەۆاكۋاتسيالاۋدان باس تارتقان. بۇل تۋرالى شقو اكىمدىگى حابارلادى, دەپ جازادى Egemen.kz.
«ريددەر قالاسى تجب قىزمەتكەرلەرى جانە جەرگىلىكتى اتقارۋشى ورگاندار حالىقتى حاباردار ەتىپ, ىقتيمال ەۆاكۋاتسيا جاعدايىندا جەكە قۇرام مەن قۇرالداردى دايىندىققا كەلتىردى. حالىقتى ۋاقىتشا ورنالاستىرۋ ءۇشىن قالا اكىمدىگى «ريددەر كوللەدجى» كمم عيماراتىندا ورنالاستىرۋ پۋنكتىن الدىن الا دايىندادى. حالىق ەۆاكۋاتسيادان باس تارتتى», دەلىنگەن حابارلامادا.
سۋ باسقان اۋلالاردى تازارتۋ جۇمىستارىنا تجد قۇتقارۋشىلارى جۇمىلدىرىلعان. ولار ايماقتى مۇزدان تازارتۋ جانە وزەن ارناسىنا قاراي ەڭىس جاساۋ ءۇشىن ارنايى تەحنيكا قولدانعان.
«كەلتىرىلگەن زالالدى باعالاۋ ءۇشىن مۇددەلى مەملەكەتتىك ورگاندار مەن ۇيىمدار اراسىنان كوميسسيا قۇرىلدى. تج سالدارىن جويۋعا بارلىعى 20 ادام, جەتى تەحنيكا جانە ەكى موتوپومپا جۇمىلدىرىلدى. «لك گەس» جشس قىزمەتكەرلەرى سۋ اعىزۋدى ازايتتى. مونيتورينگ جۇرگىزىلىپ جاتىر. تاڭعى ساعات 7.30-داعى جاعداي بويىنشا اۋلا اۋماقتارىنان سۋ تازارتىلدى, تەك جەرتولەلەردە قالدى. وقيعا ورنىنا شقو اكىمى ەرمەك كوشەرباەۆ جانە وبلىستىق تجد باسشىلىعى باردى», دەلىنگەن شقو اكىمدىگى تاراتقان حابارلامادا.