توتەنشە جاعدايدا كورسەتكەن تاباندى ءىس-قيمىلى ءۇشىن قورعانىس ءمينيسترى, گەنەرال-پولكوۆنيك رۋسلان جاقسىلىقوۆ اعا سەرجانت مەيرامبەك ىسقاقوۆتى «ەل قورعانى» مەدالىمەن ماراپاتتادى. وتان قورعاۋشىنىڭ باتىل ارەكەتى جوعارى باسشىلىقتان لايىقتى باعاسىن الدى.
ول ورتەنىپ جاتقان كولىكتەن ادامدى قۇتقارىپ قالعان. 68665 اسكەري بولىمىندە ۆزۆود سەرجانتى – جاۋىنگەرلىك جانە دەنەشىنىقتىرۋ دايىندىعىنىڭ نۇسقاۋشىسى مەيرامبەك ىسقاقوۆتى ماراپاتتاۋ ءىس-شاراسىنا ءبولىم باسشىلىعى مەن جەكە قۇرامى قاتىستى. قورعانىس ءمينيسترىنىڭ اتىنان اسكەري قىزمەتشىگە ۆەدومستۆولىق ناگرادانى قۇرلىق اسكەرلەرىنىڭ باس قولباسشىسى, گەنەرال-مايور اسان ءجۇسىپوۆ تابىس ەتتى.
«ارىپتەسىمىزدىڭ ءىس-ارەكەتى پوگون تاققان ادامداردىڭ بورىشتى اسقان ابىرويمەن ورىنداۋىمەن ەرەكشەلەنەتىنىن جانە ادامداردى قۇتقارۋ كەزىندە ءوزىن قۇربان ەتۋگە دايىن ەكەنىن كورسەتتى. ءبىز بۇگىن قيىن ساتتە باتىلدىق تانىتقان باتىرىمىزعا قۇرمەت كورسەتۋدەمىز. وتانىنا لايىقتى, باتىل ۇل تاربيەلەگەن اتا-اناسىنا مىڭ العىس ايتامىز», دەدى ول.
ايتا كەتسەك, 3 جەلتوقسان كۇنى كەشكە اعا سەرجانت مەيرامبەك ىسقاقوۆ ءۇيدىڭ جانىنداعى تۇراقتا جانىپ جاتقان كولىكتى كورەدى. اسكەري قىزمەتشى وقيعا تۋرالى استانا قالاسى توتەنشە جاعدايلار دەپارتامەنتىنىڭ 101 ورتالىعىنا تەز ارادا حابارلاعان. كولىككە جۇگىرە جەتكەن ول سالوندا قويۋ تۇتىنگە تۇنشىعىپ, ەسىنەن تانىپ قالعان جۇرگىزۋشى بار ەكەنىن بايقاعان. ەسىكتى اشقان مەيرامبەك زارداپ شەككەن ادامدى جانىپ جاتقان كولىكتەن شىعارىپ, وعان العاشقى مەديتسينالىق كومەك كورسەتكەن.
وقيعا كۋاگەرلەرى جەدەل جاردەم شاقىرىپ, زارداپ شەككەن ادام №1 قالالىق اۋرۋحاناعا جاتقىزىلدى. اسكەري قىزمەتكەردىڭ شۇعىل ارەكەتى قايعىلى وقيعانىڭ الدىن الۋعا ىقپال ەتتى.