قىزىلورداعا م.اۋەزوۆ اتىنداعى قازاق ۇلتتىق دراما تەاترىنىڭ ۇجىمى گاسترولدىك ساپارمەن كەلدى. ساپاردىڭ العاشقى كۇنى ن.بەكەجانوۆ اتىنداعى وبلىستىق قازاق اكادەميالىق مۋزىكالىق دراما تەاترىندا عاسىرلىق تاريحى بار ونەر ۇجىمىنىڭ كوركەمدىك جەتەكشىسى, كسرو جانە قازاقستاننىڭ حالىق ءارتىسى ءاسانالى ءاشىموۆ, تەاتر ديرەكتورى ەركىن جۋاسبەك, قازاقستاننىڭ ەڭبەك سىڭىرگەن قايراتكەرلەرى شىنار جانىسبەكوۆا, اسىلبەك بورانبايلار ءباسپاسوز كونفەرەنتسياسىن وتكىزدى.
– بۇل تەاتر استانا بولعان اقمەشىتتە اشىلعانىن بىلەسىزدەر. وسىدان دا بىزگە ونەر ۇجىمىنىڭ العاشقى ۋىعىن شانشىپ, ىرگەسىن قالاعان الدىڭعى بۋىننىڭ ءىزى قالعان بۇل قالا وتە ىستىق. ال بۇگىنگى ساپارعا كەلسەك, تالعامپاز كورەرمەننىڭ ويىنان شىعۋ – ءتىپتى بولەك اڭگىمە. كورەرمەننىڭ قۇرمەتىنەن بولەك ايتار سىنىنا دا ءازىرمىز. ويتكەنى «بولدىق, تولدىق» دەگەن ونەر ۇجىمى توقىرايدى, – دەدى ءاسانالى ءاشىم ۇلى.
قىزىلوردالىقتاردى اۋەزوۆ تەاترىنىڭ الەمىمەن «قاراگوز» دراماسى تانىستىردى. كورەرمەندەر الدىندا وبلىستىق ءماسليحات توراعاسى ناۋرىزباي بايقاداموۆ سويلەپ, ونەر ۇجىمىنا سىربويىلىقتاردىڭ ىقىلاسىن جەتكىزدى.
اۋەلگىدە بويىمىزدى «ساحنادان نەشە جىل تۇسپەگەن قويىلىمدى بۇگىنگى كورەرمەن قالاي قابىلدايدى ەكەن؟» دەگەن كۇدىك بيلەگەنى راس. بىراق كلاسسيكانىڭ اتى كلاسسيكا ەكەندىگى وسى جولى تاعى دالەلدەندى. ساحناداعى شيەلەنىسكەن وقيعا مەن كەيىپكەرلەر اراسىنداعى شىتىرمان, ءار ءساتتى ادەمى ادىپتەگەن اۋەن بۇرىنعى مەن بۇگىنگىنىڭ اراسىن ۇيلەستىرىپ جىبەردى.
اۋەزوۆ تەاترى وسى ساپار اياسىندا سىر كورەرمەندەرىنە «قاراگوز» دراماسىنان بولەك «قورقىتتىڭ كورى», «قوشتاسقىم كەلمەيدى», «قارا» جانە «بەس بويداققا ءبىر توي» قويىلىمدارىن ۇسىندى.
قىزىلوردا