پرەمەر-مينيستر ءاليحان سمايىلوۆتىڭ توراعالىعىمەن تسيفرلاندىرۋ ماسەلەلەرى جونىندەگى كوميسسيانىڭ كەزەكتى وتىرىسى ءوتتى. جيىنعا قاتىسۋشىلار مەملەكەت باسشىسىنىڭ تاپسىرماسىن ورىنداۋ ماقساتىندا ازىرلەنگەن جىلجىمايتىن م ۇلىكتىڭ بىرىڭعاي مەملەكەتتىك كاداسترىنا (جبمك) قاتىستى ماسەلەلەردى تالقىلادى, دەپ حابارلايدى Egemen.kz ۇكىمەتتىڭ ءباسپاسوز قىزمەتىنە سىلتەمە جاساپ.
بوس جەر تەلىمدەرىن جەدەل ءارى اشىق تۇردە ءبولۋدى, سونداي-اق رەسپۋبليكانىڭ جەر قورى تۋرالى اقپاراتقا ازاماتتاردىڭ تولىق قول جەتكىزۋىن قامتاماسىز ەتۋگە ارنالعان. جاڭا تاسىلگە سايكەس, تاڭداۋ, ءوتىنىم بەرۋ مەن تىركەۋدەن باستاپ جەر تەلىمدەرىن بەرۋدىڭ بۇكىل پروتسەسى ەلەكتروندى فورماتقا كوشىرىلدى. بارلىق بيزنەس-پروتسەستەر تولىعىمەن قايتا قارالدى. قاجەتتى قادامدار سانى بىرنەشە ەسەگە ازايتىلدى, مەملەكەتتىك قىزمەت كورسەتۋ مەرزىمى شامامەن 1 جىلدان 30 كۇنگە دەيىن قىسقاردى.
جالپى, 1 شىلدە مەن 28 قاراشا ارالىعىندا جبمك ارقىلى 1 ملن-نان استام قىزمەت كورسەتىلدى, ونىڭ ىشىندە 238 مىڭ كاداسترلىق تولقۇجات بەرىلدى. 25 ملن-نان استام انىقتاما مەن مالىمەت قىزمەت الۋشىلاردان ءوتىنىش بەرمەي-اق الىندى. تالداۋ ناتيجەسىندە اكىمدىكتەر جۇكتەگەن تسيفرلىق دەرەكتەردىڭ بارلىعى تالاپقا ساي ەمەس ەكەنى انىقتالدى. اتاپ ايتقاندا, قولدانىستاعى باس جوسپارلار مەن ەگجەي-تەگجەيلى جوسپارلاۋ جوبالارىنا (ەجج) تۇزەتۋ ەنگىزۋ قاجەت. سونىمەن قاتار پلاتفورمادا وتىنىمدەردى ۋاقتىلى قاراماۋ جانە نەگىزسىز باس تارتۋ فاكتىلەرى انىقتالدى.
ءا.سمايىلوۆ كەلەسى جىلدان باستاپ مەملەكەتتىك قىزمەتتەردى تەك تسيفرلىق فورماتتا ساپالى تۇردە كورسەتۋ ءۇشىن بارلىق كەمشىلىكتەردى قىسقا مەرزىمدە جويۋدى مىندەتتەدى.
«تسيفرلاندىرۋدىڭ ءوزى ءدال وسى سىبايلاس جەمقورلىقتى ازايتۋعا جانە قاتە دەرەكتەر كولەمىن قىسقارتۋعا, سايكەس كەلمەيتىن كوورديناتتار بويىنشا جەر تەلىمدەرىن بەرۋ فاكتىلەرىن جويۋعا باعىتتالعان. بۇل ماسەلەلەردىڭ بارلىعى تسيفرلاندىرۋ ناتيجەسىندە شەشىلۋى ءتيىس. ءبىز ءار وڭىردەگى جاعدايدى جان-جاقتى قارايمىز. ەگەر جاڭا جىلدان باستاپ ادامدارعا رۇقسات بەرۋ تۇرىپ قالاتىن بولسا, وڭىرلەردەگى ءتيىستى جاۋاپتى تۇلعالاردى جۇمىستان بوساتۋعا دەيىن جاۋاپقا تارتامىز. ءبىز اتالعان مەملەكەتتىك قىزمەتتى اشىق قىلىپ, تسيفرلاندىرعىمىز كەلەدى, ال باس جوسپارلار مەن ەجج قازىرگى مالىمەتتەرگە سايكەس كەلمەيدى. سوندىقتان كوپ جاعدايدا اۆتوماتتى تۇردە رۇقسات بەرىلمەي جاتادى. بىراق ءبىز كەرى شەگىنبەيتىنىمىزدى ەرەكشە اتاپ وتكىم كەلەدى. ءبارىبىر العا جۇرەمىز. بۇل پروتسەستى تەجەيتىندەردى جۇمىستان شىعارامىز. ولاردىڭ ورنىنا ءوز قىزمەتىن لايىقتى اتقارۋعا بەل بۋعان ادامداردى قويۋ كەرەك», دەدى پرەمەر-مينيستر.