سەنات سپيكەرى ماۋلەن اشىمباەۆتىڭ توراعالىعىمەن پالاتا جانىنداعى جاس ساراپشىلار كلۋبىنىڭ وتىرىسى ءوتتى. باسقوسۋعا قاتىسۋشىلار مەملەكەت باسشىسى حالىققا جولداۋىندا بەلگىلەپ بەرگەن كرەاتيۆتى يندۋستريانى دامىتۋ ماسەلەلەرىن جانە وسى باعىتتاعى باستى مىندەتتەردى ىسكە اسىرۋعا ارنالعان بىرلەسكەن جۇمىس فورماتىن تالقىلادى. ءىس-شاراعا مادەنيەت جانە اقپارات ءمينيسترى ايدا بالاەۆا قاتىستى.
ماۋلەن اشىمباەۆ قازىرگى تاڭدا كرەاتيۆتى يندۋستريا قارقىندى دامىپ كەلە جاتقانىن جانە بۇل سالا جاھاندىق ەكونوميكانىڭ ماڭىزدى بولىگىنە اينالعانىن اتاپ ءوتتى. سوندىقتان مەملەكەت باسشىسى قاسىم-جومارت توقاەۆ قىركۇيەك ايىندا جاريالاعان جولداۋىندا ەلىمىزدە وسى سەكتوردى دامىتۋعا قاتىستى باسىمدىقتارعا نازار اۋداردى. پالاتا توراعاسىنىڭ ايتۋىنشا, قولعا الىنعان ءىستى ساپالى جۇزەگە اسىرۋ ءۇشىن بارلىق مۇددەلى تاراپ بىرلەسىپ, جۇيەلى جۇمىس جۇرگىزۋى قاجەت.
«پرەزيدەنت جولداۋدا قازاقستاندا كرەاتيۆتى يندۋستريانى دامىتۋ جونىندە ناقتى مىندەتتەر جۇكتەدى. بۇل باعىتتا مەملەكەتتىك ورگاندار قۇقىقتىق جاعداي قالىپتاستىرىپ, وڭىرلەردە كرەاتيۆتى جوبالاردى دامىتىپ, ونىمدەردى كوممەرتسيالاندىرۋعا كومەك كورسەتىپ, كەشەندى جۇمىس جۇرگىزۋگە ءتيىس. بۇگىندە ەلىمىزدىڭ زاڭناماسىنا ەنگىزۋ ءۇشىن بىرقاتار وزگەرىس ازىرلەنىپ جاتىر. جالپى, قازىر سالانى ودان ءارى ءتيىمدى دامىتۋعا قاجەتتى نەگىز قالىپتاسىپ كەلەدى. وسى جۇمىس اياسىندا دەپۋتاتتار, مەملەكەتتىك ينستيتۋتتار, كرەاتيۆتى يندۋستريا وكىلدەرى جانە ساراپشىلار اراسىندا ناتيجەلى ديالوگ قالىپتاستىرۋ اسا ماڭىزدى», دەدى پالاتا توراعاسى.
تالقىلاۋ بارىسىندا م.اشىمباەۆ وتاندىق كرەاتيۆتى يندۋستريانىڭ دامۋ الەۋەتى ايتارلىقتاي جوعارى ەكەنىنە نازار اۋداردى. ول, ەڭ الدىمەن, ازاماتتاردىڭ شىعارماشىلىق جانە زياتكەرلىك كاپيتالىنا نەگىزدەلگەن. سونداي-اق ينكليۋزيۆتى ەكونوميكانىڭ دامۋ كوزى رەتىندە جۇمىس ىستەپ كەلەدى. دەگەنمەن قازاقستاندا بۇل سالانىڭ جالپى ىشكى ونىمگە قوسقان ۇلەسى بۇگىندە 1 پايىزعا دا جەتپەيدى. جۇمىسپەن قامتۋ باعىتىنداعى ۇلەس تە تومەن.
«بۇگىندە كرەاتيۆتى يندۋستريا سالاسىندا جۇرگەن ازاماتتار ءۇشىن پراكتيكالىق قادامدار ماڭىزدى ەكەنىن بىلەمىز. سوندىقتان ءبىز قاجەتتى زاڭنامالىق وزگەرىستەر قابىلداماس بۇرىن وسى ماسەلەگە توقتالىپ, وزدەرىڭىزبەن بىرگە سالانى ەگجەي-تەگجەي زەردەلەپ الۋدى ءجون كوردىك. قازىر پارلامەنتتىڭ ءبىر توپ دەپۋتاتى «مادەنيەت تۋرالى» جانە «اۆتورلىق قۇقىق جانە ساباقتاس قۇقىقتار تۋرالى» زاڭدارعا وزگەرىستەر مەن تولىقتىرۋلار ەنگىزۋ ماسەلەسىن پىسىقتاۋدا. وسى ورايدا سەناتورلار كرەاتيۆتى يندۋستريانى دامىتۋ ماسەلەسى بويىنشا بىرقاتار كەزدەسۋ وتكىزدى. الداعى ۋاقىتتا سونىڭ ناتيجەلەرى بويىنشا ءتيىستى ۇسىنىستار دايىندايدى», دەگەن م.اشىمباەۆ مۇددەلى تاراپتاردى پالاتانىڭ زاڭ شىعارۋ جۇمىسىنا قاتىسۋعا شاقىردى.
كەزدەسۋ بارىسىندا مادەنيەت جانە اقپارات ءمينيسترى ايدا بالاەۆا كرەاتيۆتى يندۋستريا سالاسىن دامىتۋعا ارنالعان كەشەندى شارالار مەن ستارتاپ-جوبالار تۋرالى ايتتى. ول بۇل باعىتتا ءىرى قالالاردان وڭىرلەرگە قاراي ويىسۋ باسىم مىندەتتەردىڭ ءبىرى ەكەنىن اتاپ ءوتتى. مۇنداي قادام مامانداردىڭ ءار وبلىس ورتالىعىندا نەمەسە قالادا جەرگىلىكتى تالانتتارمەن جۇمىس ىستەپ, ولاردىڭ الەۋەتىن اشۋىنا مۇمكىندىك بەرەدى. سونىمەن قاتار زياتكەرلىك مەنشىكتى قوسىمشا قۇندى قۇرايتىن جابدىق نەمەسە تەحنولوگيا سياقتى م ۇلىك رەتىندە قاراستىرۋدىڭ ماڭىزى زور.
ءىس-شارادا سەنات جانىنداعى جاس ساراپشىلار كلۋبىنىڭ مۇشەلەرى ءسوز الىپ, جاڭا ەكونوميكالىق ۇلگىگە كوشۋ جاعدايىندا كرەاتيۆتى يندۋستريانى دامىتۋعا قاتىستى ءوز ۇسىنىستارىن ايتتى. ولار نەگىزىنەن مەديا, كينو, مۋزىكا, ديزاين, ءبىلىم بەرۋ, اقپاراتتىق تەحنولوگيالار جانە تاعى باسقا سالالار بويىنشا ازىرلەنىپ جاتقان جوبالاردى قامتيدى. سونداي-اق قولدانىستاعى جوبالار جونىندە دە ءسوز بولدى. بۇل تاجىريبەلەردى ەسكەرۋدىڭ جانە ولاردى نارىقتىڭ قازىرگى سۇرانىستارىنا بەيىمدەۋدىڭ ماڭىزى زور.
كلۋب وتىرىسىندا اقىن جانە مۋزىكانت ماقپال جۇماباي, «Pygmalion» گالەرەياسىنىڭ كوركەمدىك ديرەكتورى ءانۋار مۇسىرەپوۆ, «قاش» ءفيلمىنىڭ پروديۋسەرى, «Qara Studios»-ءتىڭ باس پروديۋسەرى ەركەبۇلان كۇرىشباەۆ, «JUZ Entertainment» لەيبلىنىڭ پروديۋسەرى ەربولات بەدەلحان, زاڭگەر, كرەاتيۆتى پروديۋسەر نۇرداۋلەت بەكجان, «مانۋفاكتۋرا ER» كومپانياسىنىڭ نەگىزىن قالاۋشى الەكساندر ەرماكوۆ جانە «Kazakh Tourism» ۇلتتىق كومپانياسى كرەاتيۆتى تۋريزم دەپارتامەنتىنىڭ باسشىسى يرينا حاريتونوۆا ءوز جۇمىستارى جانە سالانىڭ دامۋ پەرسپەكتيۆالارى تۋرالى ءسوز سويلەدى.