وڭىرلەردى دامىتۋ ماقساتىندا ەلىمىزدىڭ تۇكپىر-تۇكپىرىنەن ەڭبەك كۇشىن, بىلىكتى مامانداردى تارتىپ, وتباسىلارىمەن قونىستاندىرۋ, جۇمىس ورىندارىن ۇسىنۋ اباي وبلىسىندا دا قارقىندى ءجۇرىپ جاتىر. جىل باسىنان بەرى «قۋاتتى وڭىرلەر – ەل دامۋىنىڭ درايۆەرى» ۇلتتىق جوباسىنىڭ شەڭبەرىندە اباي وبلىسىنا 584 ادام (217 وتباسى) قونىس اۋدارعان ەكەن. ونىڭ 196-سى اتاجۇرتقا ات باسىن تىرەگەن قانداسىمىز بولسا, 388-ءى وزگە وبلىستاردان قونىس اۋدارۋشىلار قاتارىندا.
وتكەن ايدىڭ سوڭعى ونكۇندىگىندە (20 قاراشا – 1 جەلتوقسان) اباي وبلىسىنىڭ ەڭبەك موبيلدىلىگى ورتالىعى ديرەكتورىنىڭ مىندەتىن اتقارۋشى ەركەبۇلان تۇرسىن باستاعان مانساپ ورتالىقتارىنىڭ ماماندارى, جۇمىسپەن قامتۋ جانە الەۋمەتتىك باعدارلامالار ءبولىمىنىڭ باسشىسى سەرىك ءجۇمادىلوۆ, «ورالمانداردى بەيىمدەۋ ورتالىعى» قوعامدىق بىرلەستىگىنىڭ باسشىسى اينۇر ءتابىلتاي اتالعان ۇلتتىق جوبا اياسىندا جامبىل, الماتى, جەتىسۋ وبلىستارىنىڭ تۇرعىندارىمەن كەزدەسىپ قايتقان بولاتىن. جەرگىلىكتى تۇرعىندارمەن كەزدەسۋ بارىسىندا قونىس اۋدارۋ باعدارلاماسىمەن كوشىپ كەلۋشىلەرگە كورسەتىلەتىن مەملەكەتتىك كومەك تۇرلەرى تۋرالى كەڭىنەن باياندالدى. ونىڭ اياسىندا 700 تۇرعىن اقپاراتتىق كەڭەس الدى. كەزدەسۋگە قاتىسقاندار اراسىندا اباي وبلىسىنا قونىس اۋدارۋعا نيەت بىلدىرگەندەر سانى ارتا تۇسكەنى بايقالادى.
اباي وبلىسىنىڭ ەڭبەك موبيلدىلىگى ورتالىعىنىڭ مالىمەتىنە سۇيەنسەك, قازىرگى كۇندە وڭىرگە قونىس اۋدارعان جانە قانداس ازاماتتاردىڭ 168-ءى تۇراقتى جۇمىسپەن قامتاماسىز ەتىلسە, 12-ءسى ۋاقىتشا جۇمىس ورنىنان ناپاقا تاۋىپ وتىر.
سونداي-اق 587 ادامعا 70 اەك كولەمىندە كوشىپ كەلۋ ءۇشىن بىررەتتىك كومەك كورسەتىلگەن. مانساپ ورتالىعى ماماندارىنىڭ ايتۋىنشا, جاڭا تۇرعىلىقتى جەرىندە ەرىكتى تۇردە وڭىرارالىق قونىس اۋدارۋدى مەملەكەتتىك قولداۋ اياسىندا ورىن اۋىستىرۋعا نيەتتەنگەن وتباسىلارعا بىررەتتىك ماتەريالدىق كومەك بەرىلەدى. بۇل وتاعاسىنا جانە وتباسىنىڭ ءاربىر مۇشەسىنە 70 اەك (241 500 تەڭگە) كولەمىندە تولەنەدى.
بۇدان بولەك, وبلىس ىشىندە قونىس اۋدارعان 231 ادامنىڭ تۇرعىن ءۇي جالداۋ جانە كوممۋنالدىق شىعىندارى وتەلسە, 96 ادامعا باسپانا ساتىپ الۋعا ەكونوميكالىق ۇتقىرلىق سەرتيفيكاتى بەرىلگەن. سەرتيفيكات سوماسى ءبىر وتباسىنا تۇرعىن ءۇي قۇنىنىڭ 50%-ى, ياعني 1160 اەك-تەن اسپايتىن مولشەردە بەكىتىلگەن. وبلىس ىشىندە قونىس اۋدارۋشىلارعا قاتىستى ناقتىراق ايتار بولساق, مەملەكەتتىك تۇرعىن ءۇي قورىنان نەمەسە جۇمىس بەرۋشىلەردىڭ قاراجاتى ەسەبىنەن قالالىق جەرلەرگە قونىس اۋدارعاندارعا ءبىر ادامعا 20 اەك (69 000 تەڭگە); ال ءبىر وتباسىنداعى جان سانى 2-4 ادام بولسا, 25 اەك (86 250 تەڭگە); بەس جانە ودان كوپ ادام بولعان جاعدايدا 30 اەك (103 500 تەڭگە) ەسەپتەلگەن.
ال تىرشىلىگىن اۋىلدىق جەرلەردە دوڭگەلەتكەندى ءجون كورىپ, اۋىلعا قونىس اۋدارعاندار ءۇشىن ءبىر ادامعا 15 اەك (51 750 تەڭگە); وتباسى مۇشەلەرىنىڭ سانى 2-4 ادام بولعان كەزدە 18 اەك (62 100 تەڭگە), ال بەس جانە ودان كوپ بولعان جاعدايدا 21 اەك (72 450 تەڭگە) كولەمىندە قاراجات تولەنەدى.
اباي وبلىسى