بۇگىندە ەلىمىزدە 49 جوعارى وقۋ ورنىنىڭ پەداگوگيكالىق باعىتتاعى ليتسەنزيالارى بار, ولاردا جالپى سانى 186 مىڭنان استام ادام وقيدى. بۇل تۋرالى ۇكىمەت وتىرىسىندا عىلىم جانە جوعارى ءبىلىم ءمينيسترى ساياسات نۇربەك ايتىپ بەردى, دەپ حابارلايدى Egemen.kz.
«مەملەكەت باسشىسىنىڭ تاپسىرمالارىن جۇزەگە اسىرۋ اياسىندا پەداگوگيكالىق جوعارى وقۋ ورىندارىن اككرەديتتەۋ ستاندارتى مەن 2029 جىلعا دەيىنگى جوعارى ءبىلىم مەن عىلىمدى دامىتۋ تۇجىرىمداماسى بەكىتىلدى. پەداگوگيكالىق باعىتتار بويىنشا گرانتتار سانى سوڭعى جىلدارى بىرنەشە ەسە ءوسىپ, 15 923 بىرلىككە جەتتى. ولاردىڭ قۇنى ەكى ەسە ارتتى. ستۋدەنتتىك شاكىرتاقى دا ءوستى. سونىمەن قاتار مۇعالىمدىك ماماندىقتارعا قابىلداۋ تالاپتارى كۇشەيتىلدى», دەدى س.نۇربەك.
پەداگوگيكالىق جوعارى وقۋ ورىندارىنىڭ ءبىلىم بەرۋ باعدارلامالارىن جاڭارتۋ بويىنشا جۇمىس جالعاسىپ جاتىر, بۇگىنگى كۇنى ونىڭ 72 پايىزى جاڭارتىلدى.
ءمينيستردىڭ ايتۋىنشا, وسى جانە باسقا دا جۇرگىزىلىپ جاتقان وزگەرىستەر پەداگوگيكالىق كادرلاردى دايارلاۋ ساپاسىن ارتتىرۋعا جانە ولاردىڭ زامان تالابىنا بەيىمدەلۋىنە باعىتتالعان.