سىبايلاس جەمقورلىققا قارسى ءىس-قيمىل اگەنتتىگىنىڭ مالىمەتىنشە, تۇركىستان وبلىسى ءبىلىم بەرۋ سالاسىنىڭ قىزمەتكەرلەرى 3 ملرد تەڭگە شاماسىنداعى قاراجاتتى جىمقىردى دەگەن كۇدىككە ءىلىنىپ وتىر. قازىرگى تاڭدا ءبىلىم مەكەمەلەرىندەگى جۇيەلى جەمقورلىقتى انىقتاۋ جۇمىستارى جالعاسىپ جاتىر.
بۇعان دەيىن الماتى, شىمكەنت قالالارى مەن قىزىلوردا, اقتوبە, الماتى جانە جەتىسۋ وبلىستارىندا قىلمىستىق سحەمالار اشىلعان بولاتىن. ەندى تۇركىستان وبلىسى بويىنشا سىبايلاس جەمقورلىققا قارسى قىزمەت شاردارا جانە سارىاعاش اۋداندارىنىڭ ءبىلىم بولىمدەرىنىڭ بۋحگالتەرلەرىنە قاتىستى سوتقا دەيىنگى تەرگەۋدى باستاعان. ولار بيۋدجەت قاراجاتىن اسا ءىرى كولەمدە جۇيەلى نەگىزدە جىمقىردى دەگەن كۇدىككە ءىلىندى.
تەرگەۋ مالىمەتتەرى بويىنشا كۇدىكتى ادامدار 2020-2023 جىلدار ارالىعىندا ءبىلىم بەرۋ سالاسىندا جۇمىس ىستەمەيتىن الدەكىمدەردىڭ شوتتارىنا جالاقى اۋدارۋ جانە مەكتەپ قىزمەتكەرلەرىنە ءتيىستى مەجەدەن جوعارى جالاقى ەسەپتەۋ ارقىلى شامامەن 2,6 ملرد تەڭگە جىمقىرعان. وسى ىستەر بويىنشا قازىرگى ۋاقىتتا تۇركىستان وبلىسىنىڭ ءبىلىم بەرۋ سالاسىنان 17 ادام قىلمىستىق جاۋاپكەرشىلىككە تارتىلىپ, ولاردىڭ 4-ءى قاماۋعا الىندى.
زالالدى وتەۋ ماقساتىندا 39 جىلجىمايتىن م ۇلىك, 44 اۆتوكولىك, زەرگەرلىك بۇيىمدار جانە قىلمىستىق ىستەر بويىنشا ايىپتالۋشىلاردىڭ اقشالاي قاراجاتتارى بۇعاتتالدى.
سونىمەن قاتار تەرگەۋ بارىسىندا تۇركىستان وبلىسىنىڭ تەكسەرۋ كوميسسياسىنىڭ مەملەكەتتىك اۋديتورى اشكەرەلەندى. ول سارىاعاش اۋدانىنداعى مەكتەپتەردىڭ بىرىندە اۋديت بارىسىندا انىقتالعان جىمقىرۋ فاكتىلەرىن پايداكۇنەمدىك نيەتپەن جاسىرعان.
بۇعان قوسا جەتىسۋ وبلىسىندا ۇيىمداسقان قىلمىستىق توپتىڭ قۇرامىندا ەكى جارىم جىل ىشىندە 4,4 ملرد تەڭگە جىمقىرعان قالالىق ءبىلىم ءبولىمىنىڭ قىزمەتكەرلەرىنە قاتىستى سوتقا دەيىنگى تەرگەۋ اياقتالعانىن ايتا كەتەيىك. قىلمىستىق توپقا جالپى سانى 13 ادام كىرگەن. قىلمىستىق-پروتسەستىك كودەكستىڭ 201-بابىنا سايكەس وزگە اقپارات جاريا ەتۋگە جاتپايدى.