قولدانىستاعى ەرەجەلەرگە ساي ساۋساق ءىزىن مىندەتتى تىركەۋ 2024 جىلدىڭ 1 قاڭتارىنان باستالۋى كەرەك بولاتىن. الايدا ەلىمىزدە مىندەتتى داكتيلوسكوپيالىق تىركەۋدى (ساۋساق ىزىمەن انىقتاۋ) ەنگىزۋدى الىپ تاستاۋ جوسپارلانىپ وتىر. قۇجات ءماجىلىس قاراۋىنا جىبەرىلگەن, دەپ جازادى Egemen.kz.
«زاڭ جوباسىنىڭ ماڭىزدى جاڭالىعى – 2024 جىلدىڭ 1 قاڭتارىنان باستاپ قۇجاتتاندىرۋ ءۇشىن حالىققا قىزمەت كورسەتۋ ورتالىقتارىندا مىندەتتى تۇردە داكتيلوسكوپيالىق تەكسەرۋدى الىپ تاستاۋ. قاۋىپسىزدىك ماسەلەلەرى مەن ازاماتتاردىڭ كونستيتۋتسيالىق قۇقىقتارىنىڭ ساقتالۋىنا قاتىستى كوپتەگەن وتىنىشتەرگە, ساراپشىلاردىڭ پىكىرلەرىنە بايلانىستى وسىنداي شەشىم قابىلداندى. ساۋساق ىزدەرى ازاماتتىڭ ءوتىنىشى بويىنشا قالادى. سونىمەن قاتار شەتەلدىكتەر ءۇشىن ساۋساق ءىزىن الۋ مىندەتتى بولىپ قالا بەرەدى», دەدى ءماجىلىس دەپۋتاتى ەكاتەرينا سمىشلياەۆا.