الەۋمەتتىك جەلىدە قازاق ۇلتىنا ءتىل تيگىزگەن استانالىق ايەلگە سوت ۇكىمى شىقتى

استانا قالاسىنىڭ سوتىندا ناتاليا سۆيريدەنكوعا قاتىستى ۇكىم شىعارىلدى. ول ۇلتارالىق الاۋىزدىقتى قوزدىرعانى ءۇشىن كىنالى دەپ تانىلىپ, ءتورت جىلعا باس بوستاندىعىنان ايىرىلدى.

ناتاليا سۆيريدەنكو 7 تامىزعا قاراعان ءتۇنى تيك-توك جەلىسىندە ونلاين-ترانسلياتسيا جاساعان. ەفير بارىسىندا ول ءوزىنىڭ وقىرماندارىنىڭ اراسىندا باسقا دا ۇلت وكىلدەرى بار ەكەنىن بىلە تۇرا, قازاقتاردىڭ ۇلتتىق ار-نامىسى مەن قادىر-قاسيەتىن قورلاۋعا تىرىسقان.

وعان قوسا سۆيريدەنكو قازاقتاردى مايمىلدارعا تەڭەپ, كورەرمەندەرىنىڭ ءبىرىنىڭ بالاسىنا ءولىم تىلەسە, ەندى ءبىرىن "ناۋقاس" دەگەن. سونىمەن قاتار ول قازاقتاردى 2022 جىلداعى قايعىلى قاڭتار وقيعاسىنا جاۋاپتى دەپ اتاعان.

سونداي-اق اۋزىنا كەلگەنىن ايتقان ايەلدىڭ ەفير كەزىندە ماس بولعانى بەلگىلى بولدى.

– سۆيريدەنكو ناتاليا ۆالەنتينوۆنا قر قك-ءنىڭ 174-بابى 1-بولىگىندە («الەۋمەتتىك, ۇلتتىق, رۋلىق, ناسىلدىك, تاپتىق نەمەسە ءدىني ارازدىقتى قوزدىرۋ») كوزدەلگەن قىلمىستىق قۇقىقبۇزۋشىلىق جاساعانى ءۇشىن كىنالى دەپ تانىلسىن جانە وعان ورتاشا قاۋىپسىزدىكتەگى قىلمىستىق-اتقارۋ جۇيەسى مەكەمەسىندە جازاسىن وتەي وتىرىپ, 4 جىل مەرزىمگە باس بوستاندىعىنان ايىرۋ تۇرىندەگى جازا تاعايىندالسىن, – دەلىنگەن استانا قالاسى قىلمىستىق ىستەر جونىندەگى اۋدانارالىق سوتىنىڭ ۇكىمىندە.