بۇگىن ۇكىمەت وتىرىسىندا كولىك ءمينيسترى مارات قاراباەۆ قۇرىلىسى ۇزاققا سوزىلىپ, حالىق كوپ شاعىمدانعان 6 باعىتتاعى جولدار كەلەر جىلى پايدالانۋعا بەرىلەتىنىن ايتتى, دەپ جازادى Egemen.kz.
قۇرىلىسى 4-5 جىلعا سوزىلعان 6 نەگىزگى جوبا بار. بۇل تالدىقورعان-وسكەمەن, قاراعاندى-الماتى, مەركە-بۋرىلبايتال, اقتوبە-قاندىاعاش جانە اتىراۋ-استراحان جولدارى.
«ەرەكشە نازار باتىس قازاقستان وبلىسىنداعى كۇردەلى جوندەۋ جۇمىستارىنا اۋدارىلعان. وڭىردە جالپى ۇزىندىعى 245 شاقىرىم بولاتىن قازتالوۆ-جانىبەك جانە ونەگە-بيسەن-سايقىن جولدارى جوندەلىپ جاتىر, ونىڭ 220 شاقىرىمىندا قوزعالىس قامتاماسىز ەتىلگەن. جوبالاردى تولىق اياقتاۋ 2024 جىلعا جوسپارلانىپ وتىر», دەدى مارات قاراباەۆ.
ءمينيستردىڭ مالىمەتشە, بيىل ەل بويىنشا بارلىعى 10700 شاقىرىم جولدا قۇرىلىس-مونتاجداۋ جۇمىستارى جۇرگىزىلگەن. ونىڭ ىشىندە 6500 شاقىرىم رەسپۋبليكالىق جانە 4200 شاقىرىم جەرگىلىكتى ماڭىزداعى جولدار.