سەناتتا «اگرارلىق عىلىمدى دامىتۋداعى جانە اگروونەركاسىپتىك كەشەن ءۇشىن مامانداردى دايارلاۋداعى وزەكتى ماسەلەلەر جانە ولاردى شەشۋ جولدارى» تاقىرىبىنداعى ۇكىمەت ساعاتى ءوتتى.
سەنات توراعاسىنىڭ ورىنباسارى جاقىپ اسانوۆ مەملەكەت باسشىسى ءوز جولداۋىندا ەلىمىزدەگى اگرارلىق سالانىڭ وزەكتى ماسەلەلەرىنە ەرەكشە نازار اۋدارعانىن اتاپ ءوتتى.
«قازاقستانداعى اگرارلىق سالا قۋاتتى بولۋى كەرەك, عىلىمعا جانە جوعارى بىلىكتى مامانداردى دايارلاۋعا ەرەكشە نازار اۋدارىلۋعا ءتيىس. وكىنىشكە وراي, شارۋالارعا كەرەكتىنىڭ كوبىسىن شەتەلدەن الامىز. بيداي تۇقىمىن, مينەرالدى تىڭايتقىشتاردى, تەحنيكانى سىرتتان تاسيمىز. جەردىڭ قۇنارلىعىن جاقسارتاتىن عىلىمي نەگىزدەردى دە ەنگىزە الماي ءجۇرمىز. كەيبىر تەحنيكا مەن تەحنولوگيانى باسقا ەلدەن الىپ كەلۋگە ءبىز قارسى ەمەسپىز. مۇمكىن, ول ءتيىمدى بولار. بىراق جەردىڭ قۇنارلىعىن ارتتىرۋ, سەبەتىن تۇقىم مەن ورگانيكالىق تىڭايتقىشتاردى ءوندىرۋ, ءوز جاعدايىمىزعا بەيىمدەلگەن شارۋاشىلىقتى دامىتۋ, ونىڭ ونىمدىلىگىن كوبەيتۋ, الەمگە ۇلتتىق ونىمدەردى شىعارۋ – تەك ءوزىمىزدىڭ مىندەتىمىز, عىلىمنىڭ مىندەتى», دەدى ج.اسانوۆ.
اگرارلىق ماسەلەلەر, تابيعاتتى پايدالانۋ جانە اۋىلدىق اۋماقتاردى دامىتۋ كوميتەتىنىڭ توراعاسى ءالي بەكتاەۆ وتىرىس بارىسىندا ەلىمىزدەگى اگرارلىق سالا ءالى دە زور شىعىنداردى تالاپ ەتەتىنىن جەتكىزدى.
«ەلىمىزدىڭ اگروونەركاسىپ كەشەنىن دامىتىپ, ازىق-ت ۇلىك قاۋىپسىزدىگىن قامتاماسىز ەتۋدە – ءوندىرىستى عىلىممەن ۇشتاستىرۋ, عىلىمدى جاڭا دەڭگەيگە كوتەرۋ ارقىلى جاڭا تەحنولوگيالاردى ەنگىزۋ, سونداي-اق وسى سالادا ەڭبەك ەتەتىن بىلىكتى مامانداردى دايارلاۋ ماڭىزدى ءرول اتقاراتىنى بارىمىزگە بەلگىلى. مەملەكەت باسشىسى بيىلعى جولداۋدا قازىرگى اۋىل شارۋاشىلىعى جوعارى تەحنولوگيالى سالا بولۋعا ءتيىس, ونى جەر جاعدايى نەمەسە اۋا رايى ەمەس, يننوۆاتسيالىق امال-تاسىلدەر تابىسقا جەتكىزەدى دەگەن بولاتىن», دەدى ءا.بەكتاەۆ.
ۇكىمەت ساعاتى وتىرىسىنا سەنات دەپۋتاتتارى, اۋىل شارۋاشىلىعى ءمينيسترى ايداربەك ساپاروۆ, عىلىم جانە جوعارى ءبىلىم ءمينيسترى ساياسات نۇربەك, اگرارلىق سالاداعى جوعارى وقۋ ورىندارى مەن عىلىمي-زەرتتەۋ ينستيتۋتتارىنىڭ باسشىلارى, تاۋەلسىز ساراپشىلار جانە باسقالار قاتىستى.
سەناتور ءا.بەكتاەۆ ۇكىمەت ساعاتىنىڭ جۇمىسىن قورىتىندىلاي كەلىپ, باسقوسۋدا تالقىلانعان ماسەلەلەر مەن ولاردىڭ شەشىمدەرى جانە ۇسىنىستار پىسىقتالاتىنىن, ودان كەيىن ۇكىمەت اتىنا جىبەرىلەتىن ۇسىنىمدارعا ەنگىزىلەتىنىن اتاپ ءوتتى.