ەلىمىزدە كادر جەتىسپەيتىن, ءبىلىم ساپاسى تومەن وڭىرلەرگە ۇزدىك پەداگوگتەردى تارتۋعا ارنالعان ارنايى باعدارلاما ىسكە اسىرىلىپ جاتىر. بيىل اتالعان باعدارلاما اياسىندا اتىراۋ وبلىسىندا جۇمىس ىستەۋگە 10 مۇعالىم نيەت بىلدىرگەن.
وبلىستىق ءبىلىم باسقارماسىنىڭ باسشىسى ەرلان سلامبەكوۆتىڭ ايتۋىنشا, مۇعالىمدەردى بوس لاۋازىمدارعا تارتۋ ەرەجەسى دايىندالعان. سالالىق مينيسترلىك جانىنان كونكۋرس كوميسسياسى قۇرىلعان. ال وبلىستىق ءبىلىم باسقارماسىندا ۇيلەستىرۋ كەڭەسى بار.
«وڭىرگە كەلەتىن مۇعالىمدەرگە لاۋازىمدىق جالاقىنىڭ 150 پايىز مولشەرىندە ىنتالاندىرۋ تولەمى, ونىڭ ىشىندە جالاقىنى كوتەرۋ, تۇرعىن ءۇيدى جالداۋ اقىسىن, كوممۋنالدىق تولەمدەر شىعىنىن وتەۋ بەلگىلەنگەن. بوس جۇمىس ورىندارىنا ورنالاسۋ ءۇشىن ۇمىتكەرلەر ەسسە جازىپ, تەستىلەۋدەن, اڭگىمەلەسۋدەن ءوتتى. بيىل اتىراۋ وبلىسىنا باستاۋىش سىنىپ, تاريح, ماتەماتيكا, فيزيكا پاندەرىن وقىتاتىن 10 مۇعالىم كەلدى. قازىر ولار مەكتەپتەردە ساباق بەرىپ ءجۇر. ولاردىڭ كەيبىرىنە جاڭا پاتەر بەرىپ وتىرمىز. 15 جەلتوقسانعا دەيىن تاعى 4 مۇعالىمگە باسپانا بەرۋ جوسپارلانعان», دەيدى ەرلان سلامبەكوۆ.
ماسەلەن, گۇلجان بورانباەۆا ءبىلىم سالاسىندا 20 جىلعا جۋىق جۇمىس ىستەپ, مول تاجىريبە جيناعان. بۇرىن باتىس قازاقستان وبلىسىنداعى دارىندى بالالارعا ارنالعان مامانداندىرىلعان اقپاراتتىق تەحنولوگيالىق مەكتەپ-ليتسەيىندە ماتەماتيكا پانىنەن ءدارىس بەرگەن. ەندى اتىراۋ قالاسىنداعى №31 گيمنازيادا جۇمىس ىستەپ ءجۇر.
كورشى وڭىردەن تاعى ءبىر مۇعالىم وتباسى كەلگەن. جاس مامان ەرجان ەگىنباەۆتىڭ ءوزى دە, زايىبى دا – پەداگوگ.
«مۇعالىمدەرگە جاس ۇرپاقتىڭ بولاشاعى ءۇشىن ۇلكەن جاۋاپكەرشىلىك جۇكتەلىپ وتىر. ءبىزدىڭ مىندەتىمىز – وقۋشىلاردىڭ ساپالى ءبىلىم الۋىنا, ەلدىڭ كەلەشەگىنە ادال قىزمەت ەتەتىن بىلىكتى مامان بولىپ قالىپتاسۋىنا ۇلەس قوسۋ. الاڭسىز جۇمىس ىستەۋىمىز ءۇشىن جاڭا پاتەر بەرىلىپ, قولداۋ كورسەتىلىپ وتىر», دەيدى ەرجان ەگىنباەۆ.
اتىراۋ وبلىسى