تۇرعىنداردىڭ اقىلدى كامەرالاردى جاپپاي ورناتۋىنىڭ ارقاسىندا, كەيىنگى بىرەر جىلدا پاتەر ۇرلىعى ەداۋىر ازايعان. دەي تۇرعانمەن, وزگەنىڭ نەسىبەسىنە قول سۇققان قاسكۇنەمدەر ءالى دە بولسا مەگاپوليس تۇرعىندارىنىڭ مازاسىن قاشىرىپ تۇر. كۇنى كەشە الماتىلىق پوليتسەيلەر پاتەر توناۋمەن اينالىسقان تاجىكستان ازاماتتارىن قولعا ءتۇسىردى.
جىمىسقى ارەكەتىن جۇزەگە اسىرىپ جۇرگەندەر «شاڭىراق» شاعىن اۋدانىنداعى تۇرىسوۆ كوشەسىندەگى ۇيلەردىڭ ءبىرىن توناعاننان كەيىن كوپ ۇزاماي ۇستالعان. تاڭعى 5-تەر شاماسىندا پوليتسيا قولىنا تۇسكەن كورشى ەلدىڭ قوس ازاماتىنان پاتەر ۇرلىعىنا قاتىستى ايعاقزات تاركىلەنگەن. پوليتسياداعىلار كۇدىكتىلەردىڭ بىرنەشە كۇن بۇرىن اۋەزوۆ اۋدانىندا بولعان پاتەر ۇرلىعىنا دا قاتىسى بار بولۋى مۇمكىن ەكەنىن ايتادى.
«توناۋشىلاردى «قۇقىقتىق ءتارتىپ» ءىس-شاراسى اياسىندا قالالىق كريمينالدىق پوليتسيا باسقارماسىنىڭ الاتاۋ اۋداندىق پب جانە پوليتسيانىڭ ارنايى جاساعىنىڭ قىزمەتكەرلەرى ۇستادى. قاسكويلەر قالادا وزدەرى جالعا العان «Kia» ماركالى كولىگىمەن جۇرگەندىگى بەلگىلى بولدى. ولار قىلمىستىق كودەكستىڭ 188-بابى 3-بولىگى بويىنشا تەرگەلىپ جاتقان قىلمىستىق ءىس ماتەريالدارىنا تىركەلدى. ۇستالعانداردىڭ باسقا دا قىلمىستارعا قاتىسى بار-جوعى جان-جاقتى تەكسەرىلىپ جاتىر», دەيدى الاتاۋ اۋداندىق پوليتسيا باسقارماسى باسشىسىنىڭ ورىنباسارى دانيار وماروۆ.
ءۇي توناۋ قىلمىسى قالا ىرگەسىندەگى جاڭادان قالىپتاسىپ جاتقان جەر ۇيلەردە ءجيى تىركەلەتىن كورىنەدى. جىل باسىندا تانىسىمىزدىڭ ءۇيىن توناعان باۋكەسپەلەر ناق سول كۇنى, سول كوشەدە تۇراتىن تاعى ءبىر ءۇيدىڭ دۇنيە-مۇلكىن قولدى ەتكەن. ارىزدانۋشىلار مۇنى ۇرىلاردىڭ ءبىر ۇيدەن العان باعالى زاتتى كەلەسى ءبىر ۇيگە تاستاپ كەتكەنىنەن بىلگەن. اڭعارعانىمىزداي, بوگدەنىڭ قاسىقتاپ جيناعان نەسىبەسىنە قول سۇعىپ, وڭاي ولجاعا كەنەلەمىز دەگەن قىلمىسكەرلەر تال تۇستە بىرەۋدىڭ پاتەرىنە باس سۇعىپ كىرۋگە ەش قىمسىنبايتىن بولعان.
الماتى قالالىق پوليتسيا دەپارتامەنتىنىڭ اقپاراتىنا سايكەس, شاھارداعى تۇرعىن ءۇي اۋلالارى مەن قوعامدىق نىساندار اۋماعىنا ورناتىلعان بەينەكامەرالاردىڭ ارقاسىندا بوتەننىڭ مۇلكىن ۇرلاۋ فاكتىلەرى ازايعان. ماماندار قىلمىستىڭ الدىن الۋ ماقساتىندا IT تەحنولوگيالاردىڭ مۇمكىندىگىن بەلسەندى پايدالانىپ ءجۇر. بۇگىندە قالادا 130 مىڭعا جۋىق بەينەباقىلاۋ كامەراسى بار دەسەك, ولاردىڭ 90 پايىزى بيۋدجەتتەن تىس قارجىعا ورناتىلعان. بەينەتاسپاعا جازىلعان ماتەريالداردى قولدانۋ ناتيجەسىندە كەيىنگى ءۇش جىلدا پاتەر ۇرلىعى تومەندەپتى.
قالا اۋماعىنداعى پاتەر ۇرلىعىنىڭ ازايۋىنا تۇرعىنداردىڭ ءوز دۇنيە-مۇلكىنە ىقتياتپەن قاراپ, كۇزەت مەكەمەلەرىنىڭ قىزمەتىنە جۇگىنۋى سەپ بولىپ وتىر.
الماتى