استانادا «Qazaqstan: ورنىقتى دامۋ جولىندا» اتتى ساراپتامالىق ماتەريالدار جيناعى كوپشىلىككە تانىستىرىلدى. وعان ەلىمىزدىڭ الەۋمەتتىك-ەكونوميكالىق دامۋىنىڭ نەگىزگى باعىتتارى بويىنشا جازىلعان ەڭبەكتەر جاريالانعان. اتالعان جيناقتى سەنات جانىنداعى جاس ساراپشىلار كلۋبىنىڭ مۇشەلەرى «تالداۋ مەكتەبىنىڭ» تۇلەكتەرىمەن بىرلەسىپ ازىرلەدى.
ءىس-شاراعا قاتىسقان سەنات توراعاسى ماۋلەن اشىمباەۆ بىلتىرعى پرەزيدەنت سايلاۋىنان كەيىن ەلىمىزدە ساياسي جۇيە كەشەندى تۇردە جاڭعىرتىلعانىن اتاپ ءوتتى. مەملەكەتتىك قۇرىلىمنىڭ بارىنشا دەموكراتيالىق جانە ورنىقتى ۇلگىسىنە كوشۋ ۇدەرىسى باستالدى. بۇل رەتتە ساپالى ساراپتاما ەلدىڭ قارقىندى دامۋىنىڭ ماڭىزدى شارتى ەكەنى انىق.
– مەملەكەتتىك باسقارۋ جۇيەسىنىڭ تيىمدىلىگىن ارتتىرۋ ءۇشىن مەملەكەتتىك ورگاندار قىزمەتىندە تالداۋ جۇرگىزۋ باعىتىن كۇشەيتۋ قاجەت. پرەزيدەنتىمىز قاسىم-جومارت توقاەۆ وسى ماسەلەگە ءاردايىم باسا ءمان بەرىپ كەلەدى. مەملەكەت باسشىسى ۇلتتىق قۇرىلتايدىڭ ەكىنشى وتىرىسىندا مەملەكەتتىك باسقارۋدىڭ تيىمدىلىگى نەگىزىنەن تالداۋمەن قامتاماسىز ەتۋدىڭ ساپاسىنا بايلانىستى ەكەنىن ايتتى, – دەدى م.اشىمباەۆ.
سونداي-اق ساياساتكەر بۇگىندە مەملەكەت الەۋمەتتىك ماسەلەلەردى شەشۋ ءۇشىن كەشەندى زەرتتەۋلەر مەن ۇسىنىستاردى قاجەت ەتەتىنىنە نازار اۋداردى. پالاتا سپيكەرى اتاپ وتكەندەي, بۇل ورايدا ساپالى تالداۋ ورىندى شەشىمدەر قابىلداۋ جانە بەلگىلى ءبىر سالانى دامىتۋدىڭ نەعۇرلىم ءتيىمدى جولىن تاڭداۋ ءۇشىن قاجەت.
ماۋلەن اشىمباەۆ سەنات زاڭ شىعارۋ قىزمەتى اياسىندا ساراپشىلارمەن تىعىز بايلانىستا جۇمىس ىستەپ وتىرعانىن دا تىلگە تيەك ەتتى. كلۋب مۇشەلەرى پالاتا كوميتەتتەرىنىڭ جۇمىس توپتارىنا قوسىلىپ, پارلامەنتتىك تىڭداۋلارعا, ورنىقتى دامۋ سالاسىنداعى ۇلتتىق ماقساتتار مەن مىندەتتەردىڭ ىسكە اسىرىلۋىنا مونيتورينگ جۇرگىزۋ جونىندەگى پارلامەنتتىك كوميسسيانىڭ جۇمىسىنا جانە تاعى باسقا ءىس-شارالارعا جۇيەلى تۇردە قاتىسىپ كەلەدى.
ايتا كەتەلىك, سەنات 2020 جىلدان باستاپ جاس ساراپشىلارمەن جۇيەلى بايلانىس ورناتىپ, بەلسەندى جۇمىس جۇرگىزىپ كەلەدى. ءار توقسان سايىن جاس ساراپشىلار كلۋبى اياسىندا وزەكتى ماسەلەلەر تالقىلانىپ وتىرادى. سونىڭ ناتيجەسىندە, سالالىق مەملەكەتتىك ورگاندارمەن جانە «تالداۋ مەكتەبى» جوباسىنا قاتىسۋشىلارمەن بىرلەسىپ, كەشەندى ۇسىنىمدار ازىرلەنەدى. بۇگىندە اتالعان ەكى الاڭ اياسىندا 150 جاس مامان جۇمىلدىرىلعان. ولار – ەكونوميكادا جانە ەلدىڭ قوعامدىق-ساياسي ءومىرىنىڭ باسقا دا سالالارىندا بەلسەندىلىگىمەن تانىلعان بىلىكتى ماماندار.
ءىس-شارا بارىسىندا «Qazaqstan: ورنىقتى دامۋ جولىندا» ساراپتامالىق جيناعىن قۇراستىرۋعا اتسالىسقان جاس ساراپشىلار ءوز تاقىرىپتارى بويىنشا بايانداما جاسادى. رۋستام بەكىشەۆ «ينفلياتسيانىڭ نەگىزگى فاكتورلارىن انىقتاۋ جانە ونى تومەندەتۋ شارالارى», اينۇر امىربەكوۆا «قازاقستاننىڭ كەڭ كولەمدى دامۋىنداعى ايماقتىق ەكونوميكالىق ساياسات», تەلمان شۋريەۆ «قازاقستاننىڭ ترانزيتتىك-كولىكتىك الەۋەتى: جاڭا قاتەرلەر مەن مۇمكىندىكتەر», ايدا احمەتجانوۆا ء«بىلىم بەرۋ پروبلەمالارىن شەشۋدەگى بيزنەستىڭ ءرولى», كارينا كوۆيازينا «تۇبىنە ءۇڭىلۋ نەمەسە قازاستاندىق جاستارعا قالايشا دۇرىس كومەك بەرۋگە بولادى؟», دينارا ەسىموۆا «ينكليۋزيۆتى قوعام دامۋى: ءبىلىم بەرۋ, دەنساۋلىق ساقتاۋ, مۇگەدەك ادامداردى الەۋمەتتەندىرۋ جانە جۇمىسپەن قامتۋ» تاقىرىپتارىندا ءسوز سويلەپ, اتالعان ماسەلەلەردىڭ شەشۋ جولدارىن ۇسىندى. بۇل باياندامالار جارىق كورىپ وتىرعان جيناقتا تولىعىراق قامتىلعان.
ءىس-شاراعا قاتىسقان جاقسىبەك قۇلەكەەۆ, ءادىل قوجىقوۆ, ت.ب. ماماندار جاس ساراپشىلاردىڭ ەڭبەكتەرىنە باعا بەرىپ, ارتىقشىلىقتارى مەن كەمشىلىكتەرى جايىندا پىكىر ءبىلدىردى.