قاڭتار وقيعاسى كەزىندە اسكەريلەردىڭ وعىنان جازىم بولعان 4 جاسار ايكوركەمنىڭ اكەسى ايدوس مەلدەحان ۇلى كورىنەۋ جالعان اقپارات تاراتقانى ءۇشىن جاۋاپقا تارتىلدى, دەپ حابارلايدى Egemen.kz.
الماتى قالالىق سوتىنىڭ ءباسپاسوز قىزمەتى تاراتقان مالىمەتكە قاراعاندا, وعان قاتىستى اكىمشىلىك ءىستى الماتى قالاسىنىڭ اكىمشىلىك قۇقىق بۇزۋشىلىقتار جونىندەگى مامانداندىرىلعان اۋدانارالىق سوتى قاراعان. ءىس ماتەريالدارىنان وسى جىلدىڭ 8 قاراشاسىندا ايدوس مەدەلحان ۇلى Facebook-تەگى پاراقشاسىندا ۆيدەوۇندەۋ جاريالاعانى بەلگىلى بولدى.
"21 قازان كۇنى وعان كورشىسى شابۋىلداعان. ول بۇل جونىندە پوليتسياعا ارىز جازعانىن, بىراق پوليتسيا شاعىمىن قاراماي, ءىس قوزعاماعانىن ايتادى", دەلىنگەن سوتتىڭ جازباسىندا.
سوت ا. مەدەلحان ۇلى پوليتسياعا قانداي دا ءبىر ارىز جازباعانىن جانە جۇگىنبەگەنىن انىقتادى. وسىلايشا, ول الەۋمەتتىك جەلىدە جالعان اقپارات جاريالاعان.
ايدوس مەدەلحان ۇلى ءوز كىناسىن مويىنداعان جوق. الايدا, ول سوت قاۋلىسىمەن اكىمشىلىك قۇقىقبۇزۋشىلىق تۋرالى كودەكستىڭ 456-2 بابىنىڭ 3-بولىگى بويىنشا كىنالى دەپ تانىلىپ, 69 000 تەڭگە مولشەرىندە بالاماسىز اكىمشىلىك ايىپپۇل سالىندى.
سوت قاۋلىسى زاڭدى كۇشىنە ەنگەن جوق.