الماتى پوليتسياسى جولاۋشىلار تاسىمالىمەن زاڭسىز اينالىساتىن شەتەلدىك تاكسي جۇرگىزۋشىلەرىن ىزدەستىرۋدە, دەپ حابارلايدى Egemen.kz.
الماتى پوليتسيا دەپارتامەنتىنىڭ مالىمەتىنشە, شەتەلدىكتەر تاراپىنان بارلىعى 217 جول ەرەجەسىن بۇزۋ فاكتىسى انىقتالعان, ونىڭ 44-ءى تاجىكستان ازاماتتارىنا تيەسىلى.
"مامانداندىرىلعان ايىپ الاڭىنا 79 اۆتوكولىك قويىلدى. شەتەلدىكتەردىڭ جەكە تاسىمالداۋ قىزمەتىن كورسەتۋ فاكتىلەرىن انىقتاۋعا ەرەكشە نازار اۋدارىلدى. سوڭعى تاۋلىكتە وسىعان ۇقساس 3 فاكتى بەلگىلى بولدى. تاجىكستان ازاماتتارى جولاۋشىلاردى زاڭسىز جولمەن تاسىمالداۋدى جۇزەگە اسىرعان. قۇقىق بۇزۋشىلىق جاساۋدىڭ سەبەپتەرى مەن شارتتارىن جويۋ جونىندە اتالعان جشس-نا ۇسىنىس جاسالدى», - دەدى الماتى قالالىق پوليتسيا دەپارتامەنتى جەرگىلىكتى پوليتسيا قىزمەتى باسقارماسى باستىعىنىڭ ورىنباسارى, پوليتسيا پولكوۆنيگى دياس دۋانبەكوۆ.
سونىمەن قاتار, بولىمشەنىڭ مالىمەتىنشە, شەتەلدىك جۇمىس كۇشىن زاڭسىز تارتقانى ءۇشىن قالالىق تاكسي فيرمالارىنىڭ ءبىرىنىڭ باسشىلىعى اكىمشىلىك جاۋاپكەرشىلىككە تارتىلدى.
جەرگىلىكتى پوليتسيا قىزمەتىنىڭ وكىلدەرى ءوز قۇزىرەتىنە سايكەس انىقتالعان زاڭ بۇزۋشىلىقتار بويىنشا الماتى قالاسىنىڭ كولىكتىك باقىلاۋ ينسپەكتسياسىنا ماتەريالدار جىبەردى.