18 قاراشادا استانانىڭ توتەنشە جاعدايلار دەپارتامەنتى ەلوردا تۇرعىندارى مەن قوناقتارىن اۋا رايىنىڭ قولايسىزدىعىنا بايلانىستى ۇيدەن شىقپاۋعا شاقىردى, سونداي-اق كوشەگە شىعۋعا ءماجبۇر بولعاندارعا كەڭەس بەردى, دەپ حابارلايدى Egemen.kz.
18 قاراشادا استانادا قولايسىز اۋا رايى بولدى: جەلدىڭ جىلدامدىعى كەي ۋاقىتتا سەكۋندىنا 23 مەترگە دەيىن جەتتى.
قۇتقارۋشىلار ەلوردا تۇرعىندارى مەن قوناقتارىنىڭ كوشەگە شىقپاۋ كەرەكتىگىن ەسكەرتىپ, مالىمدەمە جاسادى.
"بالالاردى ەرەكشە باقىلاۋدا ۇستاۋ جانە ولاردى قاراۋسىز قالدىرماۋ ماڭىزدى. كوشەدە قاتتى جەل كەزىندە جەر استى وتكەلدەرىن نەمەسە قۇرىلىستاردىڭ كىرەبەرىستەرىن پانالاۋعا كەڭەس بەرەمىز. ءۇي قابىرعالارىنىڭ جانىنا قاتتى جەلدەن جاسىرىنباۋ كەرەك, ويتكەنى شاتىرلاردان شيفەر مەن پليتالار قۇلاپ كەتۋى مۇمكىن», دەلىنگەن توتەنشە جاعدايلار دەپارتامەنتىنىڭ حابارلاماسىندا.
استانا تۇرعىندارىنا ەلەكتر جەلىلەرى مەن جىلىتۋ پەشتەرىنىڭ جاي-كۇيىن تەكسەرىپ, ىشكى جانە سىرتقى ورتكە قارسى سۋ قۇبىرىنىڭ, تەلەفون بايلانىسىنىڭ جارامدىلىعىن قامتاماسىز ەتۋ, ورتكە قارسى قۇرالداردى دايىنداۋ ۇسىنىلادى.
سونىمەن قاتار, توتەنشە جاعدايلار دەپارتامەنتى ءۇيدىڭ نەمەسە پاتەردىڭ بارلىق تەرەزەلەرىن مىقتاپ جابۋ كەرەكتىگىن اتاپ ءوتتى. ءۇي-جايدا بولعان كەزدە تەرەزەدەن الشاق تۇرىپ, ەلەكتر قۇرالدارىن پايدالانباعان دۇرىس.
«ەگەر پاتەردە ەلەكتر جەلىسىندە كەرنەۋدىڭ جوعارىلاۋى ورىن السا, ءسىز بولماعان كەزدە كەنەتتەن ەلەكتر جارىعى قوسىلىپ كەتسە, ءورت شىقپاۋى ءۇشىن بارلىق ەلەكترلىك تۇرمىستىق قۇرىلعىلاردىڭ قۋاتىن دەرەۋ ءوشىرىڭىز, اشالاردى روزەتكادان اجىراتىڭىز. قۇرىلىس الاڭدارى حالىق پەن اۋماقتى قولايسىز اۋا رايىنىڭ اسەرىنەن قورعاۋ ءۇشىن قوسىمشا شارالار قابىلداۋى كەرەك», دەپ قوستى قۇتقارۋشىلار.
توتەنشە جاعداي تۋىنداعان جاعدايدا 112 نومىرىنە تاۋلىك بويى حابارلاسۋعا بولادى.
بۇعان دەيىن قازاقستاندا قار مەن بوران سالدارىنان جولدار جابىلا باستاعانى بولاتىن.