وسكەمەندە تۇڭعىش رەت ساداق اتۋ ورتالىعى اشىلدى. ورتالىق دەگەننەن گورى مەكتەپ دەگەنىمىز دۇرىس. ولاي دەيتىنىمىز, مۇندا كاسىبي مامان ساداق اتۋدىڭ قىر-سىرىن ۇيرەتەدى, ءتۇرلى دەڭگەيدەگى جارىستارعا جولداما بەرەدى.
وبلىس ورتالىعىندا مەرگەندىك مەكتەبىن اشۋ اجار راحمەتقىزىنىڭ ارمانى ەدى. ول بۇعان دەيىن گلۋبوكوە اۋدانىندا ءداستۇرلى ساداق اتۋ ۇيىرمەسىن ۇيىمداستىرىپ, جاس مەرگەندەردى دايىنداعان. دايىنداي دا بەرمەك. وبلىستا باسقا ساداق اتۋ مەكتەبى بولماعاندىقتان, قالالىق جەردەن اشۋدى وسىدان ەكى-ءۇش جىل بۇرىن جوسپارلاعان. بىراق جەبە ۇشاتىنداي عيمارات تابۋ وڭايعا سوقپادى. تاباندىلىقتىڭ ارقاسى شىعار, كۇنى كەشە مەرگەن قىز ەرتىس پەن ءۇلبى وزەندەرىنىڭ تۇيىسكەن تۇسىندا كەڭ سارايداي عيماراتتا «وسكەمەن ساداق اتۋ» ورتالىعىن اشتى.
– ءبىر جىل بۇرىن ء«داستۇرلى ساداق اتۋ» فەدەراتسياسى قۇرىلىپ, وبلىستان دا ورتالىعىن اشىپ قويۋدى ويلاستىردىق. ارمان-ماقساتىم وتباسىمنىڭ, جاقىندارىمنىڭ ارقاسىندا جۇزەگە استى. ەندى جاتتىعۋ كەستەسىن جاساپ, بالالارعا, جاستارعا, جاسوسپىرىمدەرگە ساداق اتۋدى ۇيرەتەمىز. جالپى, جاس شەكتەۋى جوق. ەسىگىمىز اشىق, – دەيدى ورتالىقتىڭ جەتەكشىسى اجار راحمەتقىزى.
ەرتەسىندە وسكەمەننىڭ تورىندە ساداق اتۋدان تارتىستى تۋرنير ءوتتى. ساداقشىلار سايىسىنا 80 مەرگەن قاتىسىپ, باعى مەن بابىن سىنادى. ايتا كەتۋ كەرەك, جارىستىڭ وتۋىنە «كەرەمەت ساداق اتۋ» جانە «كەرەمەت مەبەل» ورتالىقتارى دەمەۋشىلىك كورسەتتى, وبلىستىق سپورت باسقارماسى قولدادى. ال ءتۋرنيردى ۇيىمداستىرۋدىڭ باسى-قاسىندا اجار راحمەتقىزى ءوزى ءجۇردى. سايىس سوڭىندا جۇلدەگەرلەرگە اقشالاي سىيلىقتار مەن مەدالدار تابىس ەتىلدى.
وسكەمەن