كۇنى كەشە رەسەيدىڭ تاعى ءبىر دارىندى سپورتشىسى رەسمي تۇردە قازاقستان ازاماتتىعىن الدى. ول – مانەرلەپ سىرعاناۋشى سوفيا سامودەلكينا.
16 جاستاعى سوفيا ماسكەۋدە دۇنيەگە كەلدى. مانەرلەپ سىرعاناۋمەن بەس جاسىنان اينالىسادى. ءار جىلدارى ليلليا بيكتاگيروۆا, سەرگەي داۆىدوۆ, الەكساندرا كراۆوۆادان ءتالىم الدى. بۇل كۇندەرى ول وليمپيادانىڭ ەكى دۇركىن چەمپيونى جانە ەكى دۇركىن كۇمىس جۇلدەگەرى, الەمنىڭ ءۇش جانە ەۋروپانىڭ جەتى دۇركىن چەمپيونى ەۆگەني پليۋششەنكونىڭ قول استىندا جاتتىعىپ ءجۇر. سامودەلكينا – جاستار اراسىندا سلوۆەنيا گران-ءپريى مەن رەسەي بىرىنشىلىگىنىڭ كۇمىس جۇلدەگەرى, ەل كۋبوگى مەن ءبىرىنشى ارنا كۋبوگىنىڭ يەگەرى, رەسەي گران-ءپريى مەن دەنيس تەن مەموريالىنىڭ جەڭىمپازى.
قازىرگى كەزدە وسى ماسەلەگە بايلانىستى وتاندىق مامانداردىڭ پىكىرى ەكىگە جارىلدى. بىرەۋلەر «كەلىمسەكتەردىڭ بىزگە قاجەتى جوق» دەسە, ەندى بىرەۋلەر «اسا دارىندى جاس قازاقستان سپورتىنىڭ ابىرويىن اسقاقتاتۋعا وزىندىك ۇلەس قوساتىنى انىق» دەپ وعان بارىنشا قولداۋ ءبىلدىرىپ جاتىر.