وسكەمەن قالاسىندا 3 وقۋشى اۋرۋحاناعا ءتۇستى, ۇشەۋىن دە ءبىر كولىك قاعىپ كەتكەن, دەپ حابارلايدى Egemen.kz.
شىعىس قازاقستان وبلىسى پوليتسيا دەپارتامەنتى ءباسپاسوز قىزمەتىنىڭ مالىمەتىنە سۇيەنسەك, جول-كولىك وقيعاسى 14 قاراشا كۇنى كەشكى ۋاقىتتا بولعان.
13-14 جاس ارالىعىنداعى بالالار جاتتىعۋدان شىعىپ, ۇيلەرىنە قايتىپ بارا جاتقان.
«ساتباەۆ كوشەسى مەن جىبەك جولى داڭعىلىنىڭ قيىلىسىندا كەلە جاتقان جەڭىل كولىك جۇرگىزۋشىسى جولدان ءوتىپ بارا جاتقان 3 بالانى قاعىپ كەتتى. سونىڭ سالدارىنان ءتۇرلى دەنە جاراقاتىن العان ۇشەۋى دە اۋرۋحاناعا جاتقىزىلدى», دەپ حابارلادى پوليتسيا دەپارتامەنتى.
قازىرگى ۋاقىتتا اتالعان فاكتى بويىنشا قازاقستان رەسپۋبليكاسى قىلمىستىق كودەكسىنىڭ 345-بابى 2-بولىگىنە سايكەس سوتقا دەيىنگى تەرگەۋ امالدارى ءجۇرىپ جاتىر.
«بىرقاتار سوت-مەديتسينالىق ساراپتاما تاعايىندالعان. سونىڭ قورىتىندىسى بويىنشا پروتسەسسۋالدىق شەشىم قابىلدانادى», دەلىنگەن حابارلامادا.