بۇگىن اتوم ەلەكتر ستانساسىن سالۋ جونىندە وسكەمەن قالاسىندا جاريا تالقىلاۋ ءوتتى. شىعىس قازاقستان وبلىستىق ازاماتتىق اليانس زاڭدى تۇلعالار بىرلەستىگىنىڭ توراعاسى اياۋجان ءاشىموۆانىڭ ۇيىمداستىرۋىمەن وتكەن اۋقىمدى شاراعا ەنەرگەتيكا, اتوم سالاسىنىڭ ماماندارى كەلىپ, اەس-ءتىڭ ءتيىمدى تۇستارىن ايتتى.
ايتۋلارىنشا اەس-ءتىڭ ەڭ اۋەلى قورشاعان ورتاعا كەرى اسەرى جوق ەكەن. جىلىنا بولەتىن زياندى ساۋلەسى كۇندەلىكتى تۇرمىستا پايدالانىپ جۇرگەن زاتتارعا قاراعاندا تومەن. الايدا, حالىقتىڭ كوبى اتوم دەسە, ات توندارىن الا قاشادى. سەبەبى, سەمەي پوليگونىنىڭ زاردابى, سوناۋ چەرنوبىلدەگى اەس-تە بولعان الاپات اپات ەلدىڭ ەسىندە ءالى. مامانداردىڭ پىكىرىنشە, ول ۋاقىتتا كەتكەن قاتەلىكتەردىڭ ورنى تولتىرىلعان. قازىرگى تاڭدا دامىعان بىرنەشە مەملەكەت اتومنان ەنەرگيا ءوندىرىپ وتىرعان كورىنەدى.
– حالىق كەلىسىمىن بەرسە, اەس سالۋدىڭ بىرنەشە ساتىسى بار. الدىمەن ورنى بەكىتىلىپ, جوبالاۋ جۇمىستارى باستالادى. جوبالاۋعا 5 جىل ۋاقىت قاجەت. ازىرشە تۇرعىنداردىڭ كوبى پايدالى جاعىن تۇسىنە قويعان جوق. بىراق, اەس ەرتەلى-كەش ەلىمىزگە كەلەدى. ءبىزدىڭ تاراپتان اتومنان وندىرىلەتىن ەنەرگيا كوزى, تۇسەتىن تابىس, ەكولوگيالىق جاعىنان زيانىنىڭ بار-جوقتىعى سارالانادى. مۇنىڭ بارلىعىن «اتوم تۋرالى» زاڭ اياسىندا حالىقپەن تالقىلايمىز. قولداۋ تاپسا, قۇرىلىستىڭ ءوزى بەس جىلعا سوزىلادى, – دەدى ۇلتتىق يادرولىق ورتالىقتىڭ اتوم-ەلەكتر ينستيتۋتى ديرەكتورىنىڭ ورىنباسارى ەربولات قويانباەۆ.
ونىڭ مالىمەتىنشە, قازاقستاندا بۇل جۇمىستى ويداعىداي جۇزەگە اسىراتىن ماماندار بار. بۇعان كۋرچاتوۆ قالاسىنداعى ۇلتتىق يادرولىق ورتالىعى مىسال.قازاقستاندا اەس سالۋ ءۇشىن ەكى ورىن تاڭدالىپ وتىر. ول تۋرالى «قازاقستان اتوم ەلەكتر ستانساسى» جشس ديرەكتورى تيمۋر جانتيكين ايتىپ بەرگەن. انىقتالعانداي, اەس سالۋ ءۇشىن ءتورت مەملەكەتتەن تەحنيكالىق-كوممەرتسيالىق ۇسىنىس ءتۇسىپتى. وڭتۇستىك كورەيا, فرانتسيا, اقش جانە رەسەي ەلدەرىنىڭ 6 ۆەندورى تاجىريبەسىمەن بولىسۋگە ءازىر كورىنەدى.
– ەلەكتر ەنەرگياسى جاعىنان وزگە مەملەكەتتەرگە تاۋەلدى بولماۋىمىز ءۇشىن اەس سالىنۋى ءتيىمدى. ماسەلەن, وسىعان دەيىن كورشىلەس ەلدەن ساعاتىنا 426 ملن كيلوۆاتت ەلەكتر ەنەرگياسىن ساتىپ الىپ وتىردىق. وسىنى وزىمىزدە ءوندىرۋىمىز كەرەك. بىزدە ءتيىستى زەرتتەۋ رەاكتورلارى جەتكىلىكتى, – دەدى ەنەرگەتيكا مينيسترلىگىنىڭ وكىلى گۇلميرا مۋرسالوۆا.
ال تيمۋر جانتيكيننىڭ سوزىنشە, قازىرگى ۋاقىتتا اەس سالۋ ءۇشىن الماتى وبلىسىنداعى ۇلكەن اۋىلى مەن اباي وبلىسىنداعى كۋرچاتوۆ قالاسى قاراستىرىلىپ جاتىر.
شىعىس قازاقستان وبلىسى