10 قازان كۇنى ورتالىق كوممۋنيكاتسيالار قىزمەتىندە ەڭبەك جانە حالىقتى الەۋمەتتىك قورعاۋ ءمينيسترى سۆەتلانا جاقىپوۆا قازاقستاندىقتاردان زەينەتكە شىعۋ كەزىندە ەڭبەك كىتاپشاسى تالاپ ەتىلە مە, جوق پا دەگەن ساۋالعا «ازاماتتىڭ جۇمىس ورنى ەڭبەك كىتاپشاسىن تسيفرلاندىرسا, ول ەڭبەك بازاسىندا ساقتالادى, مۇنداي جاعدايدا ەڭبەك كىتاپشاسى قاجەت ەمەس» دەگەن مالىمدەمە جاساعان بولاتىن, دەپ جازادى Egemen.kz
ءمينيستردىڭ بۇل جاۋابى قوعامدا قىزۋ تالقىلانىپ, تۇرعىندار ساناسىندا ساۋال تۋىنداتتى.
سۆەتلانا جاقىپوۆا بۇل ماسەلە بويىنشا جۇمىسشى ازاماتتاردى شارتتى تۇردە ەكى توپقا بولۋگە بولاتىنىن ايتتى. ولار: 1998 جىلعا دەيىن ەڭبەك ءوتىلى بارلار جانە بۇل كەزەڭنەن كەيىنگى ەڭبەك ءوتىلى بار ەل تۇرعىندارى. سەبەبى قازاقستاندا مىندەتتى زەينەتاقى جارنالارى جۇيەسى 1998 جىلدان باستاپ جۇمىس ىستەي باستادى.
ءبىرىنشى توپ زەينەتاقى الۋ ءۇشىن مىناداي قۇجاتتاردى تاپسىرۋ كەرەك:
ەڭبەك كىتاپشاسى;
ەرلەر ءۇشىن اسكەري بيلەت;
ايەلدەر ءۇشىن بالالارىنىڭ تۋ تۋرالى كۋالىكتەرى;
كۇندىزگى ءبولىمنىڭ ديپلومى.
ەڭبەك كىتاپشاسى - 1998 جىلعا دەيىنگى ەڭبەك ءوتىلىن راستايتىن نەگىزگى قۇجات. بۇل تالاپ كەڭەس وداعى كەزەڭىندە جۇمىس ىستەگەن ادامدارعا قاتىستى. مەملەكەت اتالعان ازاماتتارعا دا زەينەتاقى تولەيدى. ول ءۇشىن ەڭبەك كىتاپشاسىنداعى بارلىق جازبالار راستالۋ كەرەك. قۇزىرلى ورگان ەگەر زەينەتاقى الۋعا ءوتىنىش بەرۋشى ەڭبەك ءوتىلىن راستاماسا كورسەتىلگەن مەرزىم ەسەپكە الىنباۋى مۇمكىن ەكەنىن ەسكەرتەدى.
ال 1998 جىلعا دەيىن جۇمىس ىستەمەگەن ازاماتتاردان ەڭبەك كىتاپشاسى سۇرالمايدى.
1998 جىلدان كەيىن جۇمىس ىستەي باستاعاندار ءۇشىن ەڭبەك ءوتىلى تەك زەينەتاقى اۋدارىمدارى, سالىمشى قاراجاتىنىڭ تۇسۋىنە قاراي ەسەپتەلەدى. ماماندار تولىق بازالىق زەينەتاقى الۋ ءۇشىن شتاتتان تىس جۇمىس ىستەيتىندەر مەن فريلانسەرلەرگە دە مىندەتتى زەينەتاقى اۋدارىمدارىن جاساۋعا كەڭەس بەرەدى. زەينەتاقى كاپيتالىن جاساعان ادام ومىردەن ەرتە كەتسە, ونىڭ جيعان سومماسى كەلىسىمشارتتا كورسەتىلگەن كولەمدە عانا بالالارى مەن جۇبايىنا مۇراعا قالادى.