استانادا دەنساۋلىق ساقتاۋ مينيسترلىگىنىڭ قولداۋىمەن «قازاقستاننىڭ رەسپيراتورلىق مەديتسيناسى: كوزقاراستارمەن شەشىمدەردىڭ ەۆوليۋتسياسى» اتتى II ۇلتتىق رەسپيراتورلىق مەديتسينا كونگرەسى ءوتتى. وندا رەسپيراتورلىق مەديتسينانى دامىتۋ كەلەشەگى تالقىلاندى.
كونگرەسكە پۋلمونولوگ, فتيزياتر, توراكالدى حيرۋرگ, اللەرگولوگ, رەانيماتولوگ, كارديولوگ, ەندوكرينولوگ, پەدياتر, تەراپەۆت, ت.ب. تاجىريبەلى دارىگەر ماماندار قاتىستى. سالانىڭ بىلگىر ماماندارى وكپەنىڭ ينتەرستيتسيالدى اۋرۋلارىن, برونح دەمىكپەسىن ەمدەۋدىڭ زاماناۋي تاسىلدەرىن, اۋىر دەمىكپەنى, تىنىس الۋ ورگاندارىنىڭ ونكولوگيالىق اۋرۋلارىن ەمدەۋدىڭ زاماناۋي ادىستەرىمەن قوسا تاعى بىرنەشە ماسەلەنى قاراستىردى. سەبەبى كونگرەسس رەسپيراتورلىق مەديتسينا سالاسىنداعى وڭىرلەردىڭ باس ماماندارىمەن وزەكتى ماسەلەلەردى تالقىلاۋعا, ەلدەگى پۋلمونولوگيالىق قىزمەتتىڭ جانە ونىمەن بايلانىستى باعىتتاردىڭ جۇمىسىن قورىتىندىلاۋعا ارنالدى.
بۇل ءىس-شارانىڭ وتۋىنە استانا مەديتسينا ۋنيۆەرسيتەتىنىڭ ۇجىمى ءبىر كىسىدەي ۇلەس قوستى. ۋنيۆەرسيتەتتىڭ جەتەكشى ماماندارى پۋلمونولوگياداعى وزىق ءبىلىم بەرۋ تەحنولوگيالارى مەن يننوۆاتسيالىق عىلىمي باعىتتاردى وقۋ قۇرالدارىنا ەنگىزۋدەن كەندە قالعان ەمەس. پۋلمونولوگيا بويىنشا رەزيدەنتۋرا باعدارلاماسى ۋنيۆەرسيتەتتە 2011 جىلدان باستاپ ىسكە اسىپ كەلەدى. بۇل باعىتتى 100-دەن اسا رەزيدەنت يگەرگەن. وسى كۇنى وتكەن دوڭگەلەك ۇستەل بارىسىندا جەتەكشى وتاندىق جانە شەتەلدىك ماماندار, ەۋروپالىق رەسپيراتورلىق قوعامنىڭ وكىلدەرى قاتىستى. سونداي-اق كونگرەستە رەسپيراتورلىق مەديتسينا سالاسىندا قولدانىلاتىن دارىلىك زاتتار, مەديتسينالىق بۇيىمدار مەن جابدىقتار جونىندە پوستەرلىك سەسسيا, كورمە ۇيىمداستىرىلدى.