پرەمەر-مينيستر ءاليحان سمايىلوۆ 22-28 قازان ارالىعىندا قىتايدىڭ حانچجوۋ قالاسىندا وتكەن IV ازيا پاراويىندارىنىڭ جەڭىمپازدارىمەن جانە جۇلدەگەرلەرىمەن كەزدەستى.
جارىستا قازاقستان اتىنان پاراپاۋەرليفتينگ, بوچچا, پاراجەڭىل اتلەتيكا, پاراۆەلوسپورت, اكادەميالىق ەسكەك ەسۋ, پارادزيۋدو, وتىرىپ وينايتىن ۆولەيبول, پاراۇستەل تەننيسى, شاحمات, پاراوق اتۋ, پاراساداق اتۋ, پاراتاەكۆوندو, ءپاراجۇزۋ جانە پاراكانوە سياقتى 14 سپورت تۇرىنەن 131 سپورتشى قاتىستى. ناتيجەسىندە, ەل قۇراماسى 41 مەدال جەڭىپ الدى, ونىڭ ىشىندە 8 التىن, 12 كۇمىس جانە 21 قولا مەدال يەلەندى. مەدال سانى بويىنشا قازاقستان 44 قاتىسۋشى ەل اراسىندا 11-ورىنعا كوتەرىلدى.
كەزدەسۋ بارىسىندا ءاليحان سمايىلوۆ مەملەكەت باسشىسى قاسىم-جومارت توقاەۆتىڭ العىسحاتىن وقىپ, وتاندىق پاراليمپيادا ويىنشىلارىن وتكەن پاراويىندارىنداعى جارقىن جەڭىستەرىمەن قۇتتىقتادى.
«سىزدەردىڭ بويلارىڭىزداعى جانقيارلىق رۋح پەن جەڭىسكە دەگەن قۇشتارلىق ميلليونداعان ادامداردى ومىردەگى قيىندىقتاردى ەڭسەرۋگە جانە تابىسقا جەتەلەيدى. سىزدەردىڭ كەرەمەت سپورتتىق ونەرلەرىڭىز ادامنىڭ ەرىك-جىگەرىنىڭ شەكسىز ەكەنىن پاش ەتتى. سىزدەردىڭ ارقايسىلارىڭىزدىڭ ءومىر جولدارىڭىز – وسكەلەڭ ۇرپاق ءۇشىن شەبەرلىكتىڭ, باتىلدىقتىڭ, سونداي-اق تاباندىلىقتىڭ ۇلگىسى. ونسىز, ارينە, جوعارى سپورتتىق ناتيجەلەرگە قول جەتكىزۋ مۇمكىن ەمەس», دەدى پرەمەر-مينيستر.
ءاليحان سمايىلوۆتىڭ ايتۋىنشا, جەتىستىككە جەتۋ جولىندا پاراليمپياداشىلارعا قولداۋ كورسەتكەن تالىمگەرلەر مەن جاتتىقتىرۋشىلار دا ەرەكشە قۇرمەتكە لايىق.
«سىزدەر تابىسقا جەتۋ جولىندا تالماي كۇرەستىڭىزدەر. ازيا پاراويىندارىنداعى بۇگىنگى جەڭىستەر – بولاشاق پاراليمپيادا جەتىستىكتەرى ءۇشىن ماڭىزدى قادام», دەدى ول.
ۇكىمەت باسشىسىمەن كەزدەسۋگە قۇرلىقتىق جارىستاردىڭ جەڭىمپازدارى داۆيد دەگتيارەۆ (پاراپاۋەرليفتينگ), نۇرداۋلەت جۇماعالي جانە دياس كەنجەبەك ء(پاراجۇزۋ), اقمارال ناۋاتبەك, ەرعالي شامەي جانە ولجاس ورازالى ۇلى (پارادزيۋدو), داستان مۇقاشبەكوۆ (جەڭىل اتلەتيكا) قاتىستى.
ازيا رەكوردشىسى نۇرداۋلەت جۇماعالي مۇنداي ءىرى جارىس الاڭىندا ونەر كورسەتۋ ارقاشان ۇلكەن جاۋاپكەرشىلىك جۇكتەيتىنىن اتاپ ءوتتى.
«جاتتىعۋ بارىسىندا ءبىز بارلىق تاپسىرمانى بۇلجىتپاي ورىندادىق. جارىس الدىندا دايىندىعىمىز جوعارى دەڭگەيدە ءوتتى. ازيا پاراويىندارىندا بۇكىل قازاق ەلىنىڭ قولداۋىن ەرەكشە سەزىندىم. بارلىق سپورتشىنىڭ اتىنان, قازاقستان حالقىنا زور العىسىمدى بىلدىرەمىن. الداعى پاراليمپيادا ويىندارىندا ەلىمىز ءانۇرانىنىڭ شىرقالۋىنا بار كۇشىمىزدى سالامىز», دەدى ول.
پارادزيۋدوشى اقمارال ناۋاتبەك ازيا پاراويىندارى قازاقستان سپورتشىلارى ءۇشىن پاراليمپيادا الدىنداعى ۇلكەن سىناق بولعانىن اتاپ ءوتتى.
ء«بىزدىڭ جەتىستىگىمىز – بارلىق جاتتىقتىرۋشى مەن مەديتسينا قىزمەتكەرىنىڭ بىرلەسكەن ەڭبەگىنىڭ ناتيجەسى. بارلىق سپورتشى اتىنان الداعى پاراليمپيادا ويىندارىنا تىڭعىلىقتى دايىندالىپ, ەلىمىزدى جاقسى جەتىستىكتەرمەن قۋانتامىز دەپ تولىق سەنىممەن ايتامىن», دەدى ول.
كەزدەسۋ بارىسىندا ءاليحان سمايىلوۆ ازيا پاراويىندارىنىڭ جەڭىمپازدارى مەن جۇلدەگەرلەرىنە, سونداي-اق ولاردى دايارلاعان جاتتىقتىرۋشىلارعا مەملەكەت باسشىسىنىڭ اتىنان العىسحاتتار مەن ەستەلىك سىيلىقتار تابىس ەتتى. قازاقستاننىڭ پاراليمپيادالىق دزيۋدو فەدەراتسياسى دا پرەزيدەنتتىڭ العىسحاتىمەن ماراپاتتالدى.