كەلەسى جىلدىڭ كوكتەمىندە ارالاس جەكپە-جەكتەگى ەڭ بەلدى پروموۋشەن – UFC-ءدىڭ مەرەيتويلىق ءتۋرنيرى وتەدى دەپ جوسپارلانىپ وتىر. ءدال قازىرگى كەزدە 300 مارتە ۇيىمداستىرىلعالى وتىرعان جارىستا كىمدەردىڭ ونەر كورسەتەتىنى انىقتالىپ جاتىر.
اتالعان تۋرنيردە ەڭ تاڭداۋلى ءارى ساناۋلى عانا سپورتشىلار كۇش سىناسادى. ۇمىتكەرلەر قاتارىندا ءبىزدىڭ شاۆقات «نوماد» راحمونوۆ تا بار. ارينە, 29 جاستاعى قانداسىمىزعا ونداي قۇرمەت تەگىن كورسەتىلىپ وتىرعان جوق. ولاي دەۋگە نەگىز, وسى كۇنگە دەيىن 17 جەكپە-جەك وتكىزگەن شاۆقات سونىڭ بىردە-بىرەۋىندە جەڭىلگەن ەمەس. ول از دەسەڭىز, قازاقتىڭ قايسار ۇلى بارلىق قارسىلاسىن مەرزىمىنەن بۇرىن ۇتتى. تارقاتىپ ايتساق, ءوز باسەكەلەرىنىڭ توعىزىن – ءبىرىنشى جانە التاۋىن ەكىنشى كەزەڭدە اياقتادى. تاجىكستاندىق فاريدۋن وديلوۆ (2018 جىلى) پەن امەريكالىق دجەفف نيل (2023 جىلى) عانا ءۇشىنشى راۋندقا دەيىن شىدادى. دەسەك تە راحمونوۆ سوڭعى ساتتە ولاردىڭ دا وسال تۇسىن تاپتى. «نوماد» وديلوۆتى ۇرىپ جىقسا, نيلدى قىلقىندىرىپ تاستادى.
كوپشىلىك شاۆقات راحمونوۆتىڭ 37 جاستاعى گيلبەرت بەرنسپەن كۇش سىناسقانىن قالايدى. ول دا وتە مىقتى سپورتشى. ريو-دە-جانەيرونىڭ تۋماسى 2012 جىلدان بەرى وسى سپورت ءتۇرىن سەرىك ەتىپ كەلەدى. سول كەزدەن بەرى 28 مارتە وكتاگونعا شىعىپ, 22 رەت جەڭىس تويىن تويلادى. 15 ايقاستا ايقىن باسىمدىق تانىتتى. 2021 جىلدىڭ باسىندا بەرنستىڭ جارتىلاي ورتا سالماق دارەجەسى بويىنشا چەمپيوندىق بەلبەۋدى يەلەنۋگە جاقسى مۇمكىندىگى بولدى. بىراق ول لاس-ۆەگاستا وتكەن باستى باسەكەدە كامارۋ ۋسمانعا ەسە جىبەردى. سوڭعى رەت برازيليالىق فايتەر بيىل مامىر ايىندا بەلال مۇحاممادپەن ايقاسىپ, ودان ۇپاي سانىمەن ۇتىلدى. قازىرگى كەزدە گيلبەرت UFC-ءدىڭ رەيتينگىندە ءتورتىنشى ورىندى يەلەندى. ال شاۆقات وڭتۇستىك امەريكانىڭ وعىلانىنان ءبىر ساتى تومەن تۇر.
سونىمەن قاتار سپورتسۇيەر قاۋىم UFC 300 مەرەيتويلىق تۋرنيرىندە كونور ماكگرەگور (يرلانديا) مەن مايكل چەندلەر (اقش), يسلام ماحاچەۆ (رەسەي) پەن چارلز وليۆەيرا (برازيليا), داستين پورە (اقش) مەن دجاستين گەدجي (اقش) جانە حامزات چيماەۆ ء(باا) پەن پاۋلو كوستا (برازيليا) اراسىنداعى ايقاستى كورۋگە ايرىقشا قۇشتارلىق تانىتىپ وتىر.