شىمكەنت قالالىق پوليتسيا دەپارتامەنتىنىڭ ۇيىمداسقان قىلمىسقا قارسى كۇرەس باسقارماسىنىڭ قىزمەتكەرلەرى جەرگىلىكتى تۇرعىننان اقشا بوپسالاعان وزبەكستان ازاماتىن ۇستادى, دەپ حابارلايدى Egemen.kz.
جابىرلەنۋشى بويجەتكەن الەۋمەتتىك جەلىدە ەر اداممەن تانىسىپ, بىرنەشە اي بويى حات الماسقان. كەيىن كۇدىكتى سەنىمگە يە بولىپ, ونىڭ جەكە دەرەكتەرى مەن فوتوسۋرەتتەرىنە جانە ينتيمدىك سۋرەتتەرىنە قول جەتكىزگەن. كەيىن بۇل سۋرەتتەردى «جاقىندارىنا تاراتامىن» دەپ قورقىتىپ, اقشا تالاپ ەتە باستاعان.
ۇيىمداسقان قىلمىسقا قارسى كۇرەس باسقارماسىنىڭ قىزمەتكەرلەرى جۇرگىزگەن ارنايى وپەراتسيانىڭ ناتيجەسىندە بوپسالاۋشى اتىراۋ قالاسىندا ۇستالدى. ول 34 جاستاعى وزبەكستان ازاماتى بولىپ شىقتى.
«پوليتسيا اتالعان جايتقا قاتىستى قىلمىستىق كودەكستىڭ 194-بابى «بوپسالاۋ» بويىنشا تەرگەۋ جۇرگىزىپ جاتىر. كۇدىكتىنىڭ وسىعان ۇقساس باسقا دا قىلمىستارعا قاتىسى بار-جوعى تەكسەرىلۋدە. ءتارتىپ ساقشىلارى الەۋمەتتىك جەلىلەردە بەيتانىس ادامدارمەن جەكە تاقىرىپتاردا حات الماسۋعا جانە جەكە سيپاتتاعى فوتوسۋرەتتەر مەن بەينەلەردى ساقتاۋعا جانە جىبەرۋگە بولمايتىنىن ەسكەرتەدى», - دەلىنگەن شىمكەنت قالاسى پوليتسيا دەپارتامەنتىنىڭ ءباسپاسوز قىزمەتى تاراتقان اقپاراتتا.