قازاقستان ۇكىمەتى «قولجەتىمدى ينتەرنەت» ۇلتتىق جوباسىن بەكىتتى. پرەمەر-مينيستر ءاليحان سمايىلوۆ ءتيىستى قاۋلىعا قول قويدى.
ۇلتتىق جوبا مەملەكەت باسشىسىنىڭ رەسپۋبليكانىڭ ينتەرنەت سالاسىن دامىتۋ جونىندەگى تاپسىرمالارىن ورىنداۋ ماقساتىندا قابىلداندى. ونىڭ نەگىزگى ماقساتى – حالىقتى جىلدامدىعى كەمىندە 100 مبيت/س كەڭ جولاقتى ينتەرنەتپەن قامتۋ.
«قولجەتىمدى ينتەرنەت» ۇلتتىق جوباسى 2024 جىلدان باستاپ 2027 جىلعا دەيىنگى كەزەڭدى قامتيدى جانە ونى ىسكە اسىرۋعا 1,5 ترلن تەڭگەدەن اسا قاراجات كوزدەلگەن. ايتا كەتۋ كەرەك, بۇل سومانىڭ كولەمدى بولىگى, ياعني 1,3 ترلن تەڭگەدەن استامى – بيۋدجەتتەن تىس قاراجات.
جوبا اياسىندا ايتارلىقتاي قاراجات سىمدى جانە سىمسىز بايلانىس ينفراقۇرىلىمىن دامىتۋعا باعىتتالادى. اۋىلدىق جەرلەردە تالشىقتى-وپتيكالىق بايلانىس جەلىلەرىنىڭ تارماقتالعان جۇيەسىن سالۋعا باسا نازار اۋدارىلماق. ماسەلەن, مەملەكەتتىك-جەكەشەلىك ارىپتەستىك تەتىگى ارقىلى 3 مىڭنان اسا اۋىلدا ءتيىستى بايلانىس جەلىلەرىن مونتاجداۋ جوسپارلانىپ وتىر.
جالپى شاعىن جانە ورتا بايلانىس وپەراتورلارىن قولداۋ ارقىلى 400 مىڭ ءۇي شارۋاشىلىعىنا جىلدامدىعى جوعارى ينتەرنەت تارتىلادى. جەكەمەنشىك وپەراتورلار تاراپىنان ينۆەستيتسيالاردىڭ جالپى سوماسى 92 ملرد تەڭگە بولعان جاعدايدا, ونىڭ جارتىسىن مەملەكەت كۇردەلى شىعىندارعا سۋبسيديالار تۇرىندە قايتارادى.
ۇلتتىق جوبا اياسىندا رەسپۋبليكالىق جانە نەگىزگى وبلىستىق اۆتوجولداردى ءموبيلدى ينتەرنەتپەن قامتۋ ءۇشىن تسيفرلىق ينفراقۇرىلىم سالۋ جوسپارلانعان. اتاپ ايتقاندا, 487 انتەننا-دىڭگەك قۇرىلىسىن ورناتۋ جوسپارلانىپ وتىر. بۇل 17 مىڭ شاقىرىم اۆتوجولدى ءموبيلدى ينتەرنەتپەن قامتۋعا مۇمكىندىك بەرەدى.
تاعى ءبىر باعىت – 5G جەلىسىن ودان ءارى ورىستەتۋ بولماق. بۇگىنگى تاڭدا 605 بازالىق ستانسا ورناتىلعان. 2025 جىلدىڭ سوڭىنا دەيىن 5G تەحنولوگياسىن رەسپۋبليكالىق ماڭىزى بار قالالار مەن وبلىس ورتالىعىنىڭ بارلىعىنا ەنگىزۋ جوسپارلانىپ وتىر. وسى جۇمىس اياسىنداعى بايلانىس وپەراتورلارىنىڭ ينۆەستيتسيالارى شامامەن 300 ملرد تەڭگەنى قۇرايدى.
ۇلتتىق جوبا اياسىندا ءىرى دەرەكتەر ورتالىقتارىن جانە ترانسشەكارالىق تالشىقتى-وپتيكالىق ماگيسترالداردى سالۋ بويىنشا شارالار جوسپارلانعان. سونداي-اق رەسپۋبليكاعا جەتەكشى حالىقارالىق IT-كومپانيالاردى تارتۋ ءۇشىن زاڭنامانى وزەكتەندىرۋ قاجەت.
جالپى, ۇلتتىق جوبانى ىسكە اسىرۋ 2027 جىلعا دەيىن وتانداستاردى جىلدامدىعى جوعارى ينتەرنەتپەن قامتۋ دەڭگەيىن 100%-عا دەيىن جەتكىزۋگە جانە ەلدىڭ وڭىردەگى تسيفرلىق حاب رەتىندەگى پوزيتسياسىن نىعايتۋعا مۇمكىندىك بەرەدى.