كەشە پرەمەر-مينيستر كارىم ءماسىموۆ وبلىسقا جۇمىس ساپارىمەن كەلدى. ۇكىمەت باسشىسى بۇل ساپارىندا ەل دامۋىنا ارنالعان يندۋستريالىق-يننوۆاتسيالىق باعدارلامالار شەڭبەرىندە ايماقتا جۇزەگە اسىرىلاتىن بىرنەشە جوبامەن تانىسپاق.
پرەمەر-مينيستر ەڭ الدىمەن “باتىس ەۋروپا - باتىس قىتاي” حالىقارالىق اۆتوماگيسترالىنىڭ قۇرىلىسىندا بولدى. مۇنداعى جۇمىس قازىر ەكى اۋىسىمدا, ياعني قارقىندى جۇرگىزىلىپ جاتىر. كولدەنەڭىنەن كيلىگىپ, ىسكە كەدەرگى كەلتىرىپ تۇرعان ەشقانداي ءتۇيىندى ماسەلە جوق. اۆتوماگيسترالدىڭ وبلىستان وتەتىن شاقىرىمدارىن تەندەر بويىنشا جەڭىپ العان “اقمولا قۇرىلىس ماتەريالدارى”, “كسس ەgC/جامبىلجولقۇرىلىس” جانە “كازاحدورستوري” جشس-لار سياقتى كومپانيالار وزدەرىنە ءمىندەتتەلگەن تاپسىرمالاردى ابىرويمەن ورىنداپ كەلەدى. جۇمىس كەستەسىنەن اۋىتقۋشىلىق جوق. قۇرىلىس ماتەريالدارى مەن تەحنيكا جەتكىلىكتى. ادام كۇشى مول. مىسالى, تەك قانا “كسس ەgC/جامبىلجولقۇرىلىس” پەن “كازاحدورستروي” جشس-لارىندا تيىسىنشە 737 جانە 1379 ادام جۇمىس ىستەيدى.
ماڭىزدى قۇرىلىستىڭ كەدەرگىسىز جۇرگىزىلۋىنە وبلىس اكىمى ق.بوزىمباەۆ تا كوپ كوڭىل ءبولىپ, قاجەتتى كومەك كورسەتىپ وتىر. بيتۋمعا دەگەن سۇرانىستى قىزىلوردا زاۋىتى ورىندايتىن بولدى. ال تسەمەنت ءوسكەمەننەن الىنباق. وعان دەيىن جامبىل وڭىرىندەگى تسەمەنت زاۋىتتارى دا ىسكە قوسىلماقشى.
“باتىس ەۋروپا - باتىس قىتاي” حالىقارالىق اۆتوماگيسترالىنىڭ قۇرىلىسىنداعى وسىنداي جاقسى ىستەرمەن تانىسقاننان كەيىن پرەمەر-مينيستر قازاق-قىرعىز شەكاراسىنداعى “ايشا ءبيبى” كەدەن بەكەتىنە كەلدى.
قازاق ەلى قاشاننان ءۇيىن تاسپەن ەمەس, دوسپەن قورشاعان ەل رەتىندە بەلگىلى. بۇل ابزال ويدىڭ باسىندا ەلباسى نۇرسۇلتان نازارباەۆتىڭ ومىرشەڭ ساياساتى تۇرعانى بەلگىلى. جامبىل وبلىسىنداعى كەدەن ورگاندارى بۇگىندە قازاقستان-قىرعىز ەلدەرى اۋماعىنداعى رەسپۋبليكالىق جانە حالىقارالىق دارەجەدەگى 10 اۆتوجولدى, كوپ جاقتى بايلانىسقا ارنالعان 4 اۆتوجولدى جانە ەكى جاقتى بايلانىستاعى 6 اۆتوجولدى باقىلاۋدا. كەدەن قىزمەتىنىڭ كەدەندىك باقىلاۋدى جۇرگىزۋگە لايىقتى عيماراتتار مەن شەكارا شەبىندە بەكەتتەر, باقىلاۋ-وتكىزۋ پۋنكتتەرى اشىلىپ, ولار مۋلتيمەديالىق قۇرالدارمەن, زاماناۋي تەحنيكالارمەن جابدىقتالعانى كوزگە كورىنىپ تۇر. شىنىندا “ايشا ءبيبى” كەدەن بەكەتى مەن كورشى قىرعىز ەلىنىڭ كەدەنىن سالىستىرا قاراعان ادامعا كىمنىڭ كىم ەكەنى انىق بايقالادى.
بۇرناعى جىلى جامبىل وبلىسى بويىنشا كەدەندىك باقىلاۋ دەپارتامەنتى ەل قازىناسىنا 18 ميلليارد تەڭگە وندىرسە, اعىمداعى جىلدىڭ وتكەن 5 ايى ىشىندە 3,5 ميلليارد تەڭگە ءوندىردى. 2010 جىلى جەڭىلدەتىلگەن ءتارتىپ بويىنشا وندىرىلگەن كەدەندىك تولەمدەر مەن سالىقتار ەكى ەسەگە ارتىپ, جالپى سوماسى 59 ميلليون 41 مىڭ تەڭگەنى قۇرادى.
پرەمەر-مينيستر ك. ءماسىموۆ كەدەن بەكەتىندەگى بارلىق يگىلىكتى ىستەرمەن جانە جاڭا تەحنيكالارمەن تانىستى. شەكارا قىزمەتىنىڭ ارنايى ۇيرەتىلگەن يتتەرىنىڭ ارنايى قويىلعان سومكەلەر مەن شابادانداردىڭ ىشىنەن “جارىلعىش زاتتى” تاۋىپ الۋى جينالعانداردى ءتانتى ەتتى. ال بۇل كەدەنشىلەر ءۇشىن ۇيرەنشىكتى ءىس.
قىرعىز ەلىندەگى ۋاقىتشا ۇكىمەتتىڭ ءوتىنىشى بويىنشا ەكى ەل اراسىندا ازىرگە 3 كەدەن بەكەتىنىڭ اشىلعانى بەلگىلى. ەگەر كورشى ەلدە جاعداي جاقسارسا, باقىلاۋدا ۇستاۋعا بولاتىن باسقا كەدەن بەكەتتەرى دە اشىلۋى مۇمكىن. ودان كەيىن قىرعىز ەلىنىڭ ۋاقىتشا ۇكىمەتى الداعى ۋاقىتتا كەدەن وداعىنا كىرۋگە مۇددەلى ەكەندىكتەرىن جەتكىزىپتى. ول ەندى الداعى ۋاقىتتىڭ ەنشىسى.
پرەمەر-ءمينيستردىڭ جۇمىس ساپارى بۇگىن ودان ءارى جالعاسادى.
كوسەمالى ساتتىباي ۇلى, جامبىل وبلىسى.