«اۋىرىپ ەم ىزدەگەنشە, اۋىرمايتىن جول ىزدە» دەيتىن ءتامسىلدى العا تارتۋدىڭ قيسىنى كەلىپ تۇر. ويتكەنى بالتىرى سىزداپ, باسى اۋىرعاننىڭ ءومىرى ءۇشىن كۇرەسەتىن اق جەلەڭدىلەر جۇقپالى ۆيرۋستارعا قارسى ۆاكتسينا الۋدىڭ ماڭىزىن ۇدايى ايتىپ كەلەدى.
اتىراۋ وبلىستىق سانيتاريالىق-ەپيدەميولوگيالىق باقىلاۋ دەپارتامەنتىنىڭ ءبولىم باسشىسى ايناگۇل سارسەنعاليەۆانىڭ ايتۋىنشا, الەم ەلدەرىندە قىزىلشانىڭ تارالۋ قاۋپى ارتىپ كەلەدى. ويتكەنى بۇعان COVID-19 پاندەمياسىنان كەيىن قىزىلشاعا قارسى ۆاكتسينالاۋ, وسى ينفەكتسياعا ەپيدەميالىق باقىلاۋ جاساۋدىڭ تومەندەگەنى سەبەپ بولىپ وتىر.
«بۇل وڭىردە قىزىلشا اۋرۋى سوڭعى رەت 2019 جىلى تىركەلگەن ەدى. ءتورت جىلدان كەيىن بيىلعى ناۋرىز ايىندا اتالعان اۋرۋدىڭ 4 جاعدايى تىركەلدى. العاشقى جاعداي بىزگە شەتەلدەن كەلگەن جاسوسپىرىمنەن انىقتالدى. تۇركيا ەلىنەن كەلگەن ازاماتتىڭ بالاسى ۆيرۋستى سول جاقتان جۇقتىرىپ كەلگەن», دەپ حابارلادى ا.سارسەنعاليەۆا.
ونىڭ دەرەگىنە سۇيەنسەك, بيىل 1-15 قازان ارالىعىندا ءجىتى رەسپيراتورلىق ۆيرۋستىق ينفەكتسيالاردى (جرۆي) جۇقتىرۋدىڭ 9 119 جاعدايى تىركەلگەن. ونىڭ ىشىندە 14 جاسقا دەيىنگى بالالاردا 5 967 (65,4%), ەرەسەكتەردە 3 152, ونىڭ ىشىندە جۇكتى ايەلدەر اراسىندا 44 (0,7%) دەرەك بار.
«قىزىلشا ينفەكتسياسىنىڭ الدىن الۋعا باعىتتالعان كۇرەستىڭ جالعىز ءارى ءتيىمدى شاراسى – ۆاكتسينا سالدىرۋ. بالالاردى ۆاكتسينالاۋ قىزىلشا, قىزامىق جانە ەپيدەميالىق پاروتيتكە قارسى بىرىكتىرىلگەن ۆاكتسينا ەگۋ ارقىلى جۇزەگە اسىرىلادى. بۇل ۆاكتسينا دۇنيەجۇزىلىك دەنساۋلىق ساقتاۋ ۇيىمى تاراپىنان سەرتيفيكاتتالعان. ۆاكتسينانى ۇلتتىق ەگۋ كۇنتىزبەسىنە سايكەس 12-15 ايلىق كەزدە, ءارى قاراي رەۆاكتسينالاۋ 6 جاستا جۇرگىزىلەدى», دەدى ا.سارسەنعاليەۆا.
اتىراۋ وبلىستىق №2 اۋرۋحانانىڭ ديرەكتورى ناديا ەرعاليەۆانىڭ مالىمەتىنشە, قىزىلشانى جۇقتىرۋ كورسەتكىشى ارتقان. تەز جۇعاتىن اۋرۋدىڭ ورشۋىنە ۆاكتسينادان باس تارتۋشىلاردىڭ كوپتىگى سەبەپ بولعان.
«بيىل تامىز ايىندا قىزىلشانى 45 ادام جۇقتىردى. قىركۇيەكتەگى كورسەتكىش – 201 دەرەك. قىزىلشا دياگنوزىمەن بىلتىر – 2 ادام, بيىل 9 ايدا 444 جۇقتىرۋشى تىركەلدى. قىزىلشا اۋرۋىن جۇقتىرعاندار اۋرۋحاناعا وزدەرى كەلىپ ءجۇر. بۇل – ورەسكەل قاتەلىك. جۇقپالى اۋرۋدى جۇقتىرعان ادامدار ءوز ۇيىندە وقشاۋلانۋعا نەمەسە اۋرۋحاناعا جەدەل جاردەم بريگاداسىنىڭ كولىگىمەن جەتكىزىلۋگە ءتيىس», دەپ مالىمدەدى ن.ەرعاليەۆا.
وبلىس اكىمىنىڭ ورىنباسارى جاسۇلان بيسەمبيەۆتىڭ پىكىرىنشە, قىزىلشا اۋرۋىنا قارسى كۇرەس تومەن دەڭگەيدە قالىپ وتىر. سول سەبەپتەن سالا قىزمەتكەرلەرىنىڭ ۇيىمداستىرۋشىلىق جۇمىسىن «شيكى» دەۋگە بولادى.
«اۋداندارداعى كورسەتكىشتەر كوڭىل قۋانتپايدى. تۇرعىنداردى اقپاراتتاندىرۋ دەڭگەيى تومەن. بۇقارا بۇل دەرتتىڭ قاۋىپتى ەكەنىن ءالى سەزىنبەيدى. سول سەبەپتەن قىزىلشا اۋرۋىنا قارسى كۇرەستى جانداندىرۋ ءۇشىن ارنايى كوميسسيا قۇرىپ, جاعدايدى تولىق باقىلاۋعا الۋىمىز كەرەك», دەدى ج.بيسەمبيەۆ.
جۇقپالى دەرتتىڭ كوبەيۋىنە كادر تاپشىلىعىنىڭ اسەرى بولۋى مۇمكىن. ويتكەنى «كازمەدپروەكت» جشس-نىڭ مامانى ەرىك شونباەۆتىڭ ايتۋىنشا, بۇل دەنساۋلىق ساقتاۋ سالاسىندا كوپ جىلدان شەشىمىن تاپپاعان وزەكتى ماسەلەنىڭ بىرىنە اينالىپ وتىر.
«مەديتسينا سالاسىنداعى باستى ماسەلەنىڭ ءبىرى – كادر جەتىسپەۋشىلىگى. وسىعان بايلانىستى كادرمەن قامتۋدى جەتىلدىرۋدى ۇسىنامىن. ەكىنشى وزەكتى ماسەلە, جول-كولىك اپاتىنان تىركەلەتىن ءولىم-ءجىتىمنىڭ كوبەيۋىنە بايلانىستى بولىپ وتىر. وسىنداي وقيعالاردان بولاتىن ءولىمنىڭ 70 پايىزى جەدەل جاردەم بريگاداسى كەلگەنگە دەيىن تىركەلەدى. سول سەبەپتەن جەدەلدىلىكتى ارتتىرۋىمىز كەرەك», دەگەن ويىمەن ءبولىستى ە.شونباەۆ.
ال وبلىستىق دەنساۋلىق ساقتاۋ باسقارماسى باسشىسىنىڭ ورىنباسارى الماگۇل ءابىلوۆانىڭ دەرەگىنە سۇيەنسەك, ءولىم كورسەتكىشى تومەندەگەن. تابيعي ءوسىم ارتقان.
«ماسەلەن, بىلتىر وبلىستا ءولىم كورسەتكىشى 100 مىڭ ادامعا شاققاندا 3,9 پايىز بولسا, بيىل 3,5 پايىزعا تومەندەدى. نارەستە ءولىمى 9 پايىزدان 7,4 پايىزعا ازايدى. ايماقتا تۇراقتى تابيعي ءوسىم بار. جۇكتى ايەلدەرگە امبۋلاتوريالىق قىزمەت دەڭگەيى مەن سكرينگتى تەكسەرۋ كورسەتكىشى قۇرمانعازى, يساتاي اۋداندىق اۋرۋحانالارىندا تومەن», دەپ حابارلادى ا.ءابىلوۆا.
ونىڭ دەرەگىنە قاراعاندا, بىلتىر مەديتسينالىق كومەكتىڭ كورسەتىلمەۋىنە بايلانىستى 123 شاعىم تۇسكەن. ال بيىل 9 ايدا وسىنداي شاعىم ايتۋشىلار سانى كوبەيىپ, 153-ءتى قۇراعان. بىراق جەدەل جاردەم بريگاداسى كەشىگۋىنە بايلانىستى ارىزدانۋشىلار قاتارى ازايعان. ماسەلەن, بۇل قىزمەتتى كورسەتۋشىلەردىڭ جايباسارلىعىنا رەنىشىن بىلدىرۋشىلەردەن 64 شاعىم تىركەلگەن. بيىل كولل-ورتالىقتا وسىنداي 8 قوڭىراۋ سوعىلعان.
وبلىستىق دەنساۋلىق ساقتاۋ باسقارماسىنىڭ باسشىسى قايسار ابداليەۆتىڭ ايتۋىنشا, تۇماۋعا قارسى «گريپپول+» ۆاكتسيناسىنىڭ 65 مىڭ دوزاسى ساتىپ الىنعان. وڭىردەگى جەدەل جاردەم قىزمەتىنىڭ 50 بريگاداسى قىزمەت كورسەتەدى. اتىراۋ قالاسىندا – 26, ال اۋداندارعا 24 بريگادا بولىنگەن.
«دەنساۋلىق ساقتاۋ مينيسترلىگىنىڭ ۇسىنىسىنا وراي ءموبيلدى توپتار قايتا جانداندىرىلىپ, سۇزگى كابينەتتەرىنىڭ جۇمىسى كۇشەيتىلدى. بالالارعا, جۇكتى ايەلدەرگە ۇيدەن قاراۋ, ميكروايماقتار بويىنشا ءۇي ارالاۋ, ۇيدەگى ستاتسيونارلاردى ۇيىمداستىرۋ, كومەك كورسەتۋدىڭ بارلىق كەزەڭىندە ناۋقاستاردىڭ جاعدايىن باعالاۋ كومەگى ۇيىمداستىرىلىپ وتىر. بالالارعا ساپالى مەديتسينالىق كومەك كورسەتۋ ماقساتىندا پەدياتريالىق مۋلتيديستسيپلينارلى ماماندار توبى قۇرىلدى», دەيدى ق.ابداليەۆ.
اتىراۋ وبلىسى