پاۆلوداردا ءۇش اۋداننىڭ حالقى ءوز اكىمدەرىن سايلاۋعا بەلسەنە قاتىسىپ, داۋىس بەردى. اقتوعاي, شارباقتى, جەلەزين وڭىرلەرىندە بۇل كۇنى 87 سايلاۋ ۋچاسكەسى جۇمىس ىستەدى.
ءۇش اۋداننىڭ جۇرتشىلىعى الا تاڭنان تۇرىپ, سايلاۋ ۋچاسكەلەرىنە شۇبىردى. مىسال ءۇشىن اقتوعاي اۋدانىندا 28 سايلاۋ ۋچاسكەسى اشىلسا, مۇنداعى سايلاۋشىلار سانى 8 480 ادامدى قۇرادى. ونىڭ ىشىندە 108 تۇرعىن العاش رەت داۋىس بەردى. حالىق سانى بويىنشا ءتورت ءىرى سايلاۋ پۋنكتى تىركەلسە, ەڭ الىسى شولاقسور اۋىلى اۋدان ورتالىعىنان 164 شاقىرىم جەردە ورنالاسقان.
جەلەزين اۋدانىنىڭ حالقى دا بۇل كۇنى ەرەكشە بەلسەندىلىك تانىتتى. اكىم سايلاۋىندا بارلىعى 10 443 ازاماتتىڭ داۋىس بەرۋگە مۇمكىندىگى بولسا, ساعات ون بىرلەر شاماسىندا 2,5 مىڭعا جۋىق ادام سايلاۋ ۋچاسكەلەرىنە بارعانى تىركەلدى. اۋداندىق اۋماقتىق سايلاۋ كوميسسياسىنىڭ توراعاسى التىن كارىموۆا اتاپ وتكەندەي, وڭىردە 242 تۇرعىن ۇيدەن داۋىس بەرۋگە ءوتىنىش تۇسىرگەن. ولار ءۇشىن بارلىق وڭتايلى جاعداي جاسالدى. ال شارباقتى اۋدانىندا بۇل كۇنى 12 897 داۋىس بەرۋشى ءۇشىن 26 سايلاۋ ۋچاسكەسى جۇمىس ىستەدى.
اتاپ وتەيىك, بۇل كۇنى جەلەزين اۋدانىندا – ءۇش, اقتوعايدا – ءۇش جانە شارباقتى اۋدانىندا ەكى كانديدات داۋىسقا ءتۇستى.
وبلىستىق اۋماقتىق سايلاۋ كوميسسياسىنىڭ توراعاسى گۇلنار امانجولوۆا حابارلاعانداي, ساعات 16.00-دە ءۇش ءوڭىر بويىنشا داۋىس بەرۋشىلەردىڭ 46,6 پايىزى ءوز تاڭداۋلارىن جۇزەگە اسىرىپ ۇلگەردى.
تورايعىروۆ ۋنيۆەرسيتەتىنىڭ پروفەسسورى, ساياسي عىلىمدار كانديداتى يلدار قاليەۆتىڭ پىكىرىنشە, اۋدان اكىمى لاۋازىمى – جەرگىلىكتى مەملەكەتتىك اپپاراتتىڭ تىرەگى جانە نەگىزگى بۋىنى. «حالىق جەرگىلىكتى اتقارۋشى بيلىكتىڭ باسشىسىنىڭ ءوز قالاۋىمەن سايلاعان سوڭ وڭىرلەردە مەملەكەت باسشىسى جاريالاعان سالىق جانە بيۋدجەت ساياساتىن ورتالىقسىزداندىرۋ ەسەبىنەن ەكونوميكالىق دەربەستىك پايدا بولادى», دەپ ەسەپتەيدى مامان.
پاۆلودار وبلىسى