ارقالىق – تورعاي اۆتوكولىك جولىندا مەكتەپ وقۋشىلارى مىنگەن «گازەل» اۆتوكولىگى جانىپ كەتتى. ابىروي بولعاندا, بالالاردىڭ ءبارى ءدىن امان. كولىك تۇتىندەي باستاعاندا-اق جۇرگىزۋشى مەن مۇعالىم شاكىرتتەردى تۇگەلدەي سىرتقا شىعارىپ ۇلگەرگەن.
«بۇگىن ساعات 09:00-دە ارقالىق – تورعاي اۆتوكولىك جولىنىڭ بويىندا, ميرنىي اۋىلىنان 15 شاقىرىم جەردە «گاز 322131-288» كولىگى ورتەندى دەگەن حابار ءتۇستى. 66 وقۋشى, 3 ۆولونتەر, 6 مۇعالىم, 1 مەديتسينا قىزمەتكەرى, 1 ينسپەكتور مىنگەن ءتورت كولىك اۋىل وقۋشىلارىنا ارنالعان «IQanat» وليمپياداسىنا بارا جاتقان.
دۇرىس ءارى شۇعىل شەشىم قابىلداي بىلگەن جۇرگىزۋشى مەن مۇعالىمدەردىڭ جەدەل قيمىلىنىڭ ناتيجەسىندە 14 وقۋشى جانىپ جاتقان «گازەلدەن» دەر كەزىندە ەۆاكۋاتسيالانىپ, لەككە ىلەسىپ كەلە جاتقان 3 اۆتوكولىككە وتىرعىزىلدى. بالالاردىڭ ءومىرى مەن دەنساۋلىعىنا ەش قاۋىپ تونگەن جوق. ءورت ساعات 10-نان 25 مينۋت كەتكەندە ءسوندىرىلدى», دەپ حابارلادى تجد قوعاممەن بايلانىس توبى.
قوستاناي وبلىسى