“نۇر وتان” حدپ اقتوبە وبلىسىنىڭ جاسوتاندىقتارى كوتەرگەن “اۋىلدىڭ گۇلدەنۋى – قازاقستاننىڭ گۇلدەنۋى” اكتسياسى ءبىزدىڭ ەلىمىزدىڭ بارلىق ايماقتارىندا كەڭىنەن قولداۋ تابۋدا. مىڭداعان جاس قازاقستاندىقتار ەلدى مەكەندەردى, اسىرەسە, اۋىلداردى كوركەيتۋ, الەۋمەتتىك نىساندار سالۋ جانە ولاردى ءجوندەۋ جونىندەگى ءوز قۇرداستارىنىڭ ۇندەۋىن جوعارى قۇلشىنىسپەن قولدادى.
7 ماۋسىمدا “اۋىلدىڭ گۇلدەنۋى – قازاقستاننىڭ گۇلدەنۋى” اكتسياسى مەڭدىقارا اۋدانىندا بولىپ ءوتتى. بۇل شاراعا “نۇر وتان” پارتياسى توراعاسىنىڭ ءبىرىنشى ورىنباسارى نۇرلان نىعماتۋلين قاتىستى. ول بوروۆسكوي اۋىلىنىڭ ورتالىق ءمادەنيەت جانە دەمالىس باعىندا ا.بايتۇرسىنوۆ اتىنداعى قوستاناي مەملەكەتتىك ۋنيۆەرسيتەتى, ز.الدامجار اتىنداعى قوستاناي الەۋمەتتىك-تەحنيكالىق ۋنيۆەرسيتەتى, قوستاناي پەداگوگيكا ينستيتۋتى, قوستاناي پەدكوللەدج ستۋدەنتتەرىمەن جۇزدەستى. ولار مۇندا كورتتاردى, ستاديونداردى جانە ولاردىڭ اۋماقتارىن جوندەۋگە, تازارتۋعا كەلگەن بولاتىن. ال وبلىس بويىنشا اكتسيا شەڭبەرىندە بارلىعى 268-گە جۋىق نىساندى اباتتاندىرۋ جوسپارلانىپ وتىر ەكەن. بۇلارعا 20 مىڭ جاس قاتىسادى.
وسى كۇنى نۇرلان نىعماتۋلين رۋدنىي قالاسىنداعى سوكولوۆ-سارىباي كەن-بايىتۋ وندىرىستىك بىرلەستىگىنىڭ مەتاللپروكات زاۋىتىندا بولدى. جىلدىق جالپى قۋاتى 75 مىڭ توننا مەتالل پروكاتىن شىعاراتىن بۇل زاۋىتتى ۇستىمىزدەگى جىلدىڭ ءشىلدە ايىندا ىسكە قوسۋ كوزدەلىپ وتىر. سونداي-اق, سارىباي كەنىشىندە بولدى. نۇرلان نىعماتۋلين: “نۇر وتاننىڭ” پارتيالىق باقىلاۋ توپتارى بۇگىندە اسا ماڭىزدى دەگەن, ەڭ الدىمەن, يندۋستريالىق-يننوۆاتسيالىق باعىتتاعى نىسانداردا جۇمىس ىستەيدى”, دەدى.
دامەر ءابىش, جۋرناليست – ارنايى “ەگەمەن قازاقستان” ءۇشىن.
قوستاناي وبلىسى.