ەكىنشى دۇنيەجۇزىلىك سوعىستا ەرلىكپەن قازا تاپقان مانشۇك مامەتوۆا تۋرالى جازىلعان كىتاپ تا, ءتىپتى كينو دا از ەمەس. بىراق بۇل جولعى ەكى تۋىندىنىڭ ءجونى بولەك.
ەكى كىتاپتىڭ ءبىرى – قازاقشا, ەكىنشىسى ورىس تىلىندە جازىلعان. قوس تۋىندىنى جازعان بەلگىلى قالامگەر, ادەبيەتتانۋشى عالىم, فيلولوگيا عىلىمدارىنىڭ كانديداتى ماقسات ءتاج-مۇراتتىڭ ايتۋىنشا, «نەيزۆەستنايا ۆوينا مانشۋك» كىتابى باتىردىڭ تۋعانىنا 100 جىل تولۋى قارساڭىندا مادەنيەت مينيسترلىگىنىڭ ماڭىزدى ادەبيەتتەر ءتىزىمى بويىنشا جارىققا شىققان. كەيىن باتىس قازاقستان وبلىسىنىڭ اكىمدىگى باتىر تۋرالى باياننىڭ قازاقشاسىن ازىرلەۋدى سۇراعان.
«قازاقتىڭ باتىر قىزىنىڭ ەسىمى وشپەۋى كەرەك. ول جايىندا جازۋ يدەياسى 1986 جىلى ورال قالاسىنداعى مانشۇك مۋزەيىنە بارعاندا تۋىنداعان ەدى. «مانشۇك: مۇز بەن جالىن جىرى» اتتى كىتاپقا باتىردىڭ عۇمىرناماسىنا قاتىستى تابىلعان دەرەكتەر قوسىلدى. بىراق تولىق عۇمىرناماسى الدا ءتۇزىلۋى كەرەك. كىتاپ – انتيسوعىستىق, انتيميليتاريستىك ەسسە», دەيدى ماقسات ءتاج-مۇرات.
قازاقتىڭ قايسار قىزىنىڭ تۋىسى, دەنساۋلىق ساقتاۋ ءىسىنىڭ ۇزدىگى شولپان مۇحامەدياردىڭ ايتۋىنا قاراعاندا, مانشۇك تە تاعدىردىڭ قاتال سىنىنا ۇشىراعان. اتا-اناسىنان ەرتە ايىرىلعان. سول سەبەپتەن, تۋىسى احمەت مامەتوۆ ونى ءوز قىزىنداي تاربيەلەگەن. الماتىداعى №28 مەكتەپتى بىتىرگەن سوڭ مەديتسينالىق رابفاكتا, كەيىن مەديتسينا ينستيتۋتىندا وقىعان.
الايدا 1942 جىلى 20 جاسىندا مايدانعا ءوز ەركىمەن اتتانعان. دالا گوسپيتالىندە مەدبيكە بولىپ, كەيىن 21-اتقىشتار ديۆيزياسىنا قوسىلعان. «ماكسيم» پۋلەمەتىمەن جاۋعا قارسى وق جاۋدىرعان مەرگەن قىز ءبىر جىلدان كەيىن قازا تاپقان. وعان 1944 جىلى كەڭەس وداعىنىڭ باتىرى اتاعى بەرىلگەن.
ال ەلىمىزدە باتىر قىزدىڭ ەسىمىن يەلەنگەن بىرنەشە ءبىلىم ورداسى, وزگە دە نىساندار بار. ماسەلەن, ورالداعى حالىقارالىق اۋەجاي, قىزىلوردا قالاسىنداعى پەداگوگيكالىق كوللەدج مانشۇك مامەتوۆانىڭ اتىمەن اتالادى.
اتىراۋ وبلىسى