رەسپۋبليكا كۇنى قارساڭىندا استاناداعى بايقوڭىر اۋدانىنىڭ «بەلسەندى ۇزاق ءومىر ءسۇرۋ» ورتالىعىندا ەل دامۋىنا ەرەن ەڭبەك سىڭىرگەن تۇلعالار, ۇرپاق ساباقتاستىعى, ادال ەڭبەك تاقىرىپتارى قامتىلعان تانىمدىق ءىس-شارا ءوتتى. بۇعان اتالعان ورتالىقتىڭ ارداگەرلەرى, ستۋدەنتتەر مەن مەكتەپ وقۋشىلارى قاتىستى.
وسى جيىننىڭ قۇرمەتتى قوناعى رەتىندە پارلامەنت سەناتىنىڭ دەپۋتاتى, حيميا عىلىمدارىنىڭ دوكتورى, پروفەسسور, ۇعا كوررەسپوندەنت-مۇشەسى التىنبەك نۇح ۇلى شاقىرىلدى. ول ارداگەرلەردى مەرەكەمەن قۇتتىقتاپ, الاش ازاماتتارىنىڭ تۇلعاسىن اشاتىن مازمۇندى اڭگىمە ءوربىتتى. سونىمەن قاتار تۇڭعىش اكادەميگىمىز قانىش ساتباەۆتاي تۇلعالاردىڭ ەڭبەگىن ۇلىقتاۋدى دا ءسوز ەتتى.
باسقوسۋ بارىسىندا سەناتورعا جينالعان قاۋىم ءتۇرلى سۇراق قويدى. بۇل رەتتە قوعامدا بولىپ جاتقان كەلەڭسىز جايتتار, ءبىلىم, وقۋلىقتاردىڭ ساپاسى, مەكتەپتەگى بۋللينگ ماسەلەسى كوتەرىلدى.
بۇل كەزدەسۋگە سەناتور اكىمدىكتىڭ ۇسىنىسىمەن ەمەس, ارداگەرلەردىڭ شاقىرۋىمەن كەلدى. ول – تۋعان جەرىنە تۋىن تىككەن ازامات. پاراساتتى, ادامي قاسيەتى مول قايراتكەر. جۋرناليست رەتىندە بىلەتىنىم, ول تۋعان جەرى باياناۋىلدىڭ تەڭدىك اۋىلىندا «اسىل مۇراسىن اسقاقتاتقان بابالار» اتتى مەموريالدىق كەشەننىڭ قازىعىن ورناتىپ, اتا-بابالار رۋحىنا ارناپ اۋىلىندا ءبىر جىلدارى اس بەردى. كەزىندە ءماشھۇر ءجۇسىپ اتامىزعا ۇلكەن كەسەنە سالۋ جونىندە ۇسىنىس جاساپ, دەمەۋشىلەر تاۋىپ, ءوزى دە قارجىلاي كومەكتەسكەن ەدى. پاۆلودارداعى پەداگوگيكالىق ۋنيۆەرسيتەتتىڭ رەكتورى قىزمەتىندە جۇرگەندە مۇسا شورمان ۇلى, ابىكەي ساتباەۆ, بۇحار جىراۋ, ءماشھۇر ءجۇسىپ, جۇسىپبەك ايماۋىت ۇلى, سۇلتانماحمۇت تورايعىر ۇلى, قانىش ساتباەۆ, الكەي مارعۇلان, شاپىق شوكين, ەرمۇحان بەكماحانوۆتاردىڭ ەسكەرتكىش-بيۋستەرىن وقۋ ورنى الدىنا ورناتتى. التەكەڭنىڭ تاعى ءبىر ۇلكەن جۇمىسى – ادەبيەت پەن ونەرىمىزگە ەڭبەگى سىڭگەن ادامدار تۋرالى «ەرتىس-بايان ءوڭىرىنىڭ 100 تاريحي تۇلعاسى» اتتى قىسقامەتراجدى فيلم دايىنداتتى. قازاقتىڭ تاۋەلسىزدىگىنە ۇلەس قوسقان پاۆلودار وڭىرىنەن شىققان 100 اتاقتى ادام تۋرالى دەرەكتى فيلم بۇگىندە وڭىردە عانا ەمەس, رەسپۋبليكا كولەمىندە باعاسىن الىپ, التىن قوردا ساقتالىپ تۇر.
ال ەندى استانانىڭ تورىندە بوي كوتەرگەن اكادەميك قانىش ساتباەۆتىڭ ەسكەرتكىشىنىڭ تۇرعىزىلۋىنا ۇلەس قوسىپ, دەمەۋشىلەر تاپقان دا – التىنبەك نۇح ۇلى. ۇلت ۇستازى, الاشتىڭ كوشباسشىلارىنىڭ ءبىرى احمەت بايتۇرسىن ۇلىنىڭ 150 جىلدىعىن اتاپ ءوتۋدى پارلامەنت مىنبەرىنەن كوتەرىپ, وسى مەرەيتويدى ۇيىمداستىرۋعا بەلسەنە قاتىستى. سوندىقتان ەلدىڭ الدىندا جوعارى دەڭگەيدەگى باستامالارعا اتسالىسىپ جۇرگەن وسىنداي تۇلعانىڭ جۇرتشىلىققا ايتارى دا مول. بۇل كەزدەسۋ وسىنىسىمەن دە ءماندى.
اتالعان جيىنعا استانا قالالىق ارداگەرلەر كەڭەسى توراعاسىنىڭ ورىنباسارى ساتىبالدى جۇماعاتوۆ, ساياساتتانۋ دوكتورى ابدىجالەل باكىر, قالامگەر باياندى ءالپي, استانا قالالىق بيلەر كەڭەسىنىڭ توراعاسى انۋاربەك ەرالى, الماتى اۋدانى ارداگەرلەر كەڭەسىنىڭ توراعاسى مۇرات مۇستافين, بايقوڭىر اۋدانى ارداگەرلەر كەڭەسىنىڭ توراعاسى قۋانىش نامازشام, الماتى اۋدانى اقساقالدار كەڭەسىنىڭ توراعاسى امانكەلدى ءاشىروۆ, تاعى باسقا زيالى قاۋىم وكىلدەرى قاتىستى. ال باسقوسۋعا – بايقوڭىر اۋدانى «بەلسەندى ۇزاق ءومىر ءسۇرۋ» ورتالىعىنىڭ قازاق ءتىلى ءپانىنىڭ مۇعالىمى مارجان پىرىمبەتوۆا مودەراتورلىق ەتتى.
عاليا بالتاباي,
ارداگەر جۋرناليست