استاناداعى ەركەعالي راحماديەۆ اتىنداعى مەملەكەتتىك اكادەميالىق فيلارمونيادا كورنەكتى كومپوزيتور, مەملەكەتتىك سىيلىقتىڭ لاۋرەاتى تولەگەن مۇحامەدجانوۆتىڭ «مەنىڭ جىر الەمىم» اتتى شىعارماشىلىق كەشى ءوتتى.
رۋحاني كەلىسىم كۇنىنە ارنالعان اسەم سازعا تولى كەشتە ەلوردالىق فيلارمونيانىڭ سيمفونيالىق وركەسترىنىڭ, كامەرالىق حوردىڭ جانە سوليستەردىڭ ورىنداۋىنداعى كومپوزيتوردىڭ ۇزدىك شىعارمالارى ورىندالدى. سونىڭ ىشىندە 1979 جىلى جازىلعان «ماحامبەت» سيمفونيالىق پوەماسىن ەرەكشە ايتۋعا بولادى. بۇل تۋىندىنى كەزىندە رەسەي فەدەراتسياسىنىڭ مەملەكەتتىك سيمفونيالىق وركەسترى ورىنداعان. درامالىق شىعارما جالىندى جىرشى ماحامبەت وتەمىس ۇلىنا ارنالعان.
كونتسەرت بارىسىندا كەش يەسىنىڭ «قالىڭ ەلىم, قازاعىم, قايران جۇرتىم», «تۋعان جەر», «دالا», «تاعزىم» جانە تاعى باسقا دا شىعارمالارى شارىقتادى.
سونداي-اق تولەگەن مۇحامەدجانوۆتىڭ كوڭىلدىڭ قىلىن شەرتەتىن مۋزىكاسى بىرقاتار كوركەم فيلمدەر ارقىلى دا جاقسى تانىس. كەشتە تىڭدارمانداردى كومپوزيتوردىڭ تالعات تەمەنوۆتىڭ «ماحاببات بەكەتى», «ادامدار اراسىنداعى بولتىرىك», ء«بىزدىڭ قالانىڭ كىشكەنتاي حانزاداسى», دوسحان جولجاقسىنوۆتىڭ ء«بىرجان سال», «قۇنانباي» فيلمدەرىنە جازعان سازدى اۋەندەرى ءسۇيسىنتتى.
شىعارماشىلىق كەشتە قازاقستاننىڭ جانە تاتارستاننىڭ حالىق ءارتىسى, مەملەكەتتىك سىيلىقتىڭ لاۋرەاتى نۇرجامال ۇسەنباەۆا, «دارىن» مەملەكەتتىك جاستار سىيلىعىنىڭ لاۋرەاتى التىنبەك ءابىلدا, سكريپكاشى, قازاقستاننىڭ ەڭبەك سىڭىرگەن قايراتكەرى باعدات ءابىلحانوۆ, كۇيشى ايبەك بەكبوسىن ونەر كورسەتتى.