رەسپۋبليكا كۇنى قارساڭىندا ەل دامۋىنا ەلەۋلى ۇلەس قوسىپ جۇرگەن ءبىر توپ ازامات مەملەكەتتىك ماراپاتتارعا يە بولدى. پرەزيدەنت قاسىم-جومارت توقاەۆتىڭ جارلىعىمەن ەلدىڭ الەۋمەتتىك-ەكونوميكالىق جانە مادەني-رۋحاني دامۋىنا, حالىقتار اراسىنداعى دوستىق پەن ىنتىماقتاستىقتى نىعايتۋعا قوسقان ەلەۋلى ۇلەسى, بەلسەندى قوعامدىق قىزمەتى ءۇشىن بىرقاتار ازامات مەملەكەتتىك ناگرادالارمەن ماراپاتتالدى.
ولاردىڭ قاتارىندا وندىرىستىك سالانىڭ, بيزنەستىڭ, ءبىلىم بەرۋ, دەنساۋلىق ساقتاۋ سالالارىنىڭ كورنەكتى وكىلدەرى, اسكەري قىزمەتشىلەر, قۇقىق قورعاۋ ورگاندارىنىڭ قىزمەتكەرلەرى, سپورتشىلار, ەڭبەك ارداگەرلەرى, مادەنيەت جانە عىلىم قايراتكەرلەرى بار. مادەنيەت جانە اقپارات ءمينيسترى ايدا بالاەۆا سالتاناتتى جيىنعا قاتىسۋشىلاردى ۇلتتىق مەرەكە – رەسپۋبليكا كۇنىمەن قۇتتىقتادى.
«1990 جىلى 25 قازاندا ەگەمەندىك تۋرالى دەكلاراتسيا قابىلداندى. بۇل ءبىزدىڭ تاۋەلسىزدىگىمىزگە دەگەن العاشقى ماڭىزدى قادام بولدى. وتكەن جىلى قاسىم-جومارت كەمەل ۇلىنىڭ باستاماسىمەن رەسپۋبليكا كۇنىنە ۇلتتىق مارتەبە قايتارىلدى. بۇل كۇن بۇكىل ەلىمىزدىڭ رۋحىن كوتەرەتىن جانە ونىڭ بولاشاعىن نىعايتاتىن جالپىحالىقتىق بىرلىكتىڭ سيمۆولىنا اينالدى. يگى ءداستۇر بويىنشا مەملەكەت باسشىسىنىڭ جارلىعىمەن ەلدىڭ مادەني-رۋحاني دامۋىنا ەلەۋلى ۇلەس قوسقان بىرقاتار ازامات جوعارى ناگرادالارعا يە بولدى. ءوز ەڭبەكتەرىڭىزبەن سىزدەر ۇلتتىڭ, مادەنيەتتىڭ, ادەبيەتتىڭ, ونەردىڭ رۋحاني بايلىعىن دامىتۋعا ىقپال ەتىپ كەلەسىزدەر. پرەزيدەنتتىڭ تاپسىرماسى بويىنشا سىزدەرگە لايىقتى ماراپاتتاردى تاپسىرۋعا رۇقسات ەتىڭىزدەر», دەدى ا.بالاەۆا.
«پاراسات» وردەنىمەن «ەۋرازيالىق مەديتسينالىق قاۋىمداستىق» زتب باسقارما توراعاسى نادەجدا پەتۋحوۆا, «قۇرمەت» وردەنىمەن «قازاق ۇلتتىق ونەر ۋنيۆەرسيتەتى» رمم پروفەسسورى روزا مۇقانوۆا جانە قوعام قايراتكەرى, پرەزيدەنت جانىنداعى ايەلدەر ىستەرى جانە وتباسىلىق-دەموگرافيالىق ساياسات جونىندەگى ۇلتتىق كوميسسيا توراعاسىنىڭ ورىنباسارى ءلاززات رامازانوۆا ماراپاتتالدى. ال «Egemen Qazaqstan» گازەتىنىڭ اردەگەرى قايسار ءالىم «قۇرمەت» وردەنىن, وسى باسىلىمنىڭ جاۋاپتى حاتشىسى سامات مۇسا «ەڭبەك ارداگەرى» مەدالىن يەلەندى. سونداي-اق ەلۋدەن استام ادام «ەرەن ەڭبەگى ءۇشىن» مەدالىمەن, ۆەدومستۆولىق ناگرادالارمەن, قۇرمەت گراموتالارىمەن جانە العىسحاتتارمەن ماراپاتتالدى.
ء«بىز سىزدەرگە ارقاشان قولداۋ كورسەتەمىز جانە وتان يگىلىگى ءۇشىن جۇمىس ىستەۋدى جالعاستىرۋلارىڭىز ءۇشىن جاعداي جاسايمىز. سىزدەردىڭ جاس ۇرپاقتى تاربيەلەۋگە قوسىپ جۇرگەن ولشەۋسىز ۇلەسىڭىز بەن جارقىن بولاشاققا دەگەن ۇمتىلىسىڭىزعا باعا جەتپەيدى. بۇل ءبىزدىڭ ەلىمىزدى وركەندەتەتىن نەگىزگى فاكتورلار», دەپ ءسوزىن قورىتىندىلادى مادەنيەت جانە اقپارات ءمينيسترى.