ۇلتتىق مەرەكە – رەسپۋبليكا كۇنى قارساڭىندا پرەمەر-مينيستر ءاليحان سمايىلوۆ مەملەكەت باسشىسىنىڭ جارلىعىنا سايكەس مەملەكەتتىك ورگاندار مەن ۇيىمداردىڭ قىزمەتكەرلەرىنە مەملەكەتتىك ناگرادالار تابىس ەتتى.
اتاپ ايتقاندا, «پاراسات» وردەنىمەن قارجى مينيسترلىگى قازىناشىلىق كوميتەتىنىڭ توراعاسى راحات توقباەۆ پەن «ى.التىنسارين اتىنداعى ۇلتتىق ءبىلىم اكادەمياسى» شجق رمك باس عىلىمي قىزمەتكەرى جاۋمباي قاراەۆ ماراپاتتالدى.
ءبىر ەسكەرەتىنى, بيىل كوپتەگەن پەداگوگ پەن دارىگەر مەملەكەتتىك ناگرادالارعا يە بولدى. ولاردىڭ قاتارىندا وتاندىق ترانسپلانتولوگيانىڭ ساپالى جاڭا دەڭگەيگە شىعۋىنا جانە مىڭداعان ناۋقاستىڭ تولىققاندى ءومىر ءسۇرۋ مۇمكىندىگىن ارتتىرۋعا مۇمكىندىك بەرەتىن بىرەگەي «QazMedics organ care system» وتاندىق جۇيەسىن ازىرلەۋشىلەر دە بار.
«قۇرمەت» وردەنىمەن «شىمكەنت جۇرەك ورتالىعى» كەاق باسقارما توراعاسى دارحان سۇيگەنباەۆ, دسم ترانسپلانتتاۋدى جانە جوعارى تەحنولوگيالىق مەديتسينالىق قىزمەتتى ۇيلەستىرۋ جونىندەگى رەسپۋبليكالىق ورتالىقتىڭ ديرەكتورى ساۋلە شايسۇلتانوۆا, «ى.التىنسارين اتىنداعى ۇلتتىق ءبىلىم اكادەمياسى» شجق رمك باس عىلىمي قىزمەتكەرى وردەنبەك مازباەۆ, سونداي-اق «ۇلتتىق عىلىمي كارديوحيرۋرگيا ورتالىعى» كەاق قىزمەتكەرلەرى: كارديوحيرۋرگيا كاد ديرەكتورى تيمۋر لەسبەكوۆ, ينتەرۆەنتسيالىق كارديولوگيا جانە راديولوگيا كاد ديرەكتورى مارات اريپوۆ, وپەراتسيالىق بولىمشە مەڭگەرۋشىسى رىمباي قاليەۆ, دارىگەر كارديولوگ سالتانات اندوسوۆا, دارىگەر كارديوحيرۋرگ اسەل مەدرەسوۆا جانە سۆەتلانا نوۆيكوۆا ماراپاتتالدى.
«ۇلتتىق عىلىمي كارديوحيرۋرگيا ورتالىعى» كەاق وپەراتسيالىق مەيىرگەرى مارال شاردەنوۆا «ەرەن ەڭبەگى ءۇشىن» مەدالىنىڭ يەگەرى اتاندى. «University Medical Center» كورپوراتيۆتىك قورىنىڭ باسقارما توراعاسى يۋري پياعا قازاقستان پرەزيدەنتىنىڭ العىسى جاريالاندى.
سونىمەن قاتار «قۇرمەت» وردەنىمەن جانە «ەرەن ەڭبەگى ءۇشىن» مەدالىمەن اۋىل شارۋاشىلىعى, ەنەرگەتيكا, ساۋدا جانە ينتەگراتسيا, تۋريزم جانە سپورت, تسيفرلىق دامۋ مينيسترلىكتەرىنىڭ, سونداي-اق ۇكىمەت اپپاراتىنىڭ قىزمەتكەرلەرى ماراپاتتالدى.