رەسپۋبليكا كۇنىنە وراي قورعانىس ءمينيسترى ۇزدىك اسكەري قىزمەتشىلەردى ماراپاتتادى. سالتاناتتى جيىن ەلوردانىڭ ە.راحماديەۆ اتىنداعى مەملەكەتتىك اكادەميالىق فيلارمونياسىندا قورعانىس ۆەدومستۆوسى, قارۋلى كۇشتەر تۇرلەرى, اسكەر تەكتەرى, اسكەري بولىمدەر مەن مەكەمەلەر, وقۋ ورىندارى باسشىلىق قۇرامىنىڭ, اسكەري قىزمەتشىلەردىڭ, ازاماتتىق پەرسونال وكىلدەرىنىڭ جانە قارۋلى كۇشتەر ارداگەرلەرىنىڭ قاتىسۋىمەن ءوتتى.
قورعانىس ءمينيسترى, گەنەرال-پولكوۆنيك رۋسلان جاقسىلىقوۆ جينالعان قاۋىمدى, جەكە قۇرام مەن ارداگەرلەردى ۇلتتىق مەرەكە – رەسپۋبليكا كۇنىمەن قۇتتىقتادى.
– وسىندا جينالعانداردىڭ كوبى – تاۋەلسىز قازاقستاننىڭ قالىپتاسۋ جولىنداعى العاشقى تاريحي قادامداردىڭ قالاي باستالعانىن كورگەندەر. ەلىمىز بۇۇ-عا مۇشە بولعان كەزدە مەملەكەتتىك رامىزدەر بەكىتىلدى, قازاق ءتىلى مەملەكەتتىك مارتەبەگە يە بولدى. ءوز ءومىرىن بوستاندىق ءۇشىن كۇرەسكە ارناعان قازاق حالقىنىڭ زيالى قاۋىمىنىڭ ادال ەسىمدەرى اقتالدى. بۇل شارالار مەملەكەتتىڭ تۇراقتى دامۋىنىڭ, ونىڭ حالىقارالىق بەدەلى ءوسۋىنىڭ, ەلدەگى بىرلىك پەن كەلىسىمنىڭ نىعايۋىنىڭ كەپىلى بولدى, – دەپ اتاپ ءوتتى ول. قورعانىس ۆەدومستۆوسىنىڭ باسشىسى قارۋلى كۇشتەردىڭ بەيبىتشىلىكتى ساقتاۋداعى جانە ەلدىڭ قورعانىس قابىلەتىن نىعايتۋداعى ءرولىن, سونداي-اق ارداگەرلەردىڭ ەگەمەن قازاقستان ارمياسىنىڭ قالىپتاسۋىنا جانە اسكەري-پاتريوتتىق تاربيە ىسىنە قوسقان باعا جەتپەس ۇلەسىن ەرەكشە اتاپ ءوتتى.
رەسپۋبليكا كۇنىنە وراي بىرقاتار اسكەري قىزمەتشىگە قورعانىس ءمينيسترى رۋسلان جاقسىلىقوۆ مەملەكەتتىك ماراپاتتار تابىس ەتتى. اتاپ ايتقاندا, II دارەجەلى «داڭق» وردەندەرى باس شتاب باستىعىنىڭ ورىنباسارى – جەدەل جوسپارلاۋ دەپارتامەنتىنىڭ باستىعى گەنەرال-مايور مارات ايماشەۆقا, «استانا» وڭىرلىك قولباسشىلىعى اسكەرلەرىنىڭ قولباسشىسى, گەنەرال-مايور شايح-حاسان جازىقباەۆقا بەرىلدى. قۇرلىق اسكەرلەرى باس قولباسشىسىنىڭ باسقارماسى ينجەنەرلىك اسكەرلەر باس باسقارماسىنىڭ باسشىسى, پولكوۆنيك باقىتبەك تاجىباەۆقا II دارەجەلى «ايبىن» وردەنى تابىس ەتىلدى. سەمەي قالاسى اۋە قورعانىسى كۇشتەرى 54835 اسكەري ءبولىمى تاربيە جانە يدەولوگيالىق جۇمىس ءبولىمىنىڭ وفيتسەرى, لەيتەنانت ءنازيرا ءالبوسىنوۆا ازاماتتىق جانە اسكەري بورىشىن ۇلگىلى ورىنداعانى ءۇشىن «جاۋىنگەرلىك ەرلىگى ءۇشىن» مەدالىمەن ماراپاتتالدى. استانا قالاسى قارۋ-جاراق باستىعىنىڭ باسقارماسى 83205 اسكەري ءبولىمىنىڭ تەحنيك-جۇرگىزۋشىسى, سەرجانت ەرىك ىسقاقوۆ ەلىمىزدىڭ قورعانىس قابىلەتىن, اسكەري قاۋىپسىزدىگىن نىعايتۋعا قوسقان ەلەۋلى ۇلەسى ءۇشىن «ەل قورعانى» مەدالىنە لايىق دەپ تانىلدى. «قازاقستان رەسپۋبليكاسى قارۋلى كۇشتەرىنىڭ ۇزدىگى» توسبەلگىلەرىمەن 68665 اسكەري ءبولىمىنىڭ مامانى, مەرزىمدى قىزمەتتىڭ قاتارداعى جاۋىنگەرى ەركەبۇلان سەيداحمەت, اقمولا وڭىرلىك گارنيزونى اسكەري پوليتسيا باسقارماسىنىڭ اعا ساربازى, مەرزىمدى قىزمەتتىڭ ەفرەيتورى يليا ماماتوۆ ماراپاتتالدى. پرەزيدەنت جارلىعىمەن قارۋلى كۇشتەردىڭ 31 اسكەري قىزمەتشىسى مەملەكەتتىك ناگرادالارعا يە بولدى. ۆەدومستۆولىق ماراپات – «ەل قورعانى» مەدالىن 27 اسكەري قىزمەتشى يەلەندى. «ميناسىزداندىرۋداعى ەرلىگى ءۇشىن» توسبەلگىلەر مينادان تازارتۋعا قاتىسقان 25 مامانعا بەرىلدى. العاش رەت «قازاقستان رەسپۋبليكاسى قارۋلى كۇشتەرىنىڭ ۇزدىگى» توسبەلگىسىمەن مەرزىمدى قىزمەتتىڭ 70 اسكەري قىزمەتشىسى ماراپاتتالدى. سونداي-اق قورعانىس ءمينيسترىنىڭ بۇيرىعىمەن قر قارۋلى كۇشتەرىنىڭ 42 اسكەري قىزمەتشىسىنە مەرزىمىنەن بۇرىن كەزەكتى اسكەري اتاق بەرىلدى. ماراپاتتاۋ ءراسىمى قارۋلى كۇشتەر ۇلتتىق اسكەري-پاتريوتتىق ورتالىعىنىڭ شىعارماشىلىق ۇجىمى دايىنداعان مەرەكەلىك كونتسەرتپەن جالعاستى.