بۇگىندە ازاتتىعىن بابالارىمىز عاسىرلار بويى ارمانداعان دەربەس مەملەكەتپىز. ونىڭ تاريحي ماڭىزىنىڭ قانداي ەكەندىگىن تانىتاتىن بىردەن-ءبىر جول – رەسپۋبليكا كۇنى. بۇل مەرەكەگە جالپىحالىقتىق سيپات بەرىلۋى دە بەكەر ەمەس.
1990 جىلدىڭ 25 قازانىندا قازاق كسر جوعارعى كەڭەسىنىڭ شەشىمىمەن ەلىمىزدىڭ ەگەمەندىگىن ايقىندايتىن دەكلاراتسيا قابىلداندى. وسى ايتۋلى كۇن قازاقستاننىڭ دەربەستىگىن تانىتاتىن قۇجاتپەن ناقتىلانىپ, تاريح تورىنەن ورىن الدى. بۇل دەكلاراتسيا اياسىندا قازاقستان ءوزىن جەكە رەسپۋبليكا رەتىندە جاريالاپ, مەملەكەتتىك شەكاراسىن, ازاماتتىعى, قارجىلىق الەۋەتى, حالىقارالىق قاتىناستارداعى دەربەستىگى, مەملەكەتتىك رامىزدەرىن بەكىتۋگە باتىل قادام باستى. سونىمەن قاتار رەسپۋبليكامىزدىڭ ساياسي-ەكونوميكالىق تۇراقتىلىعىن بەرىك ساقتاپ, مەملەكەتتىڭ دامۋ كەزەڭدەرىنىڭ العىشارتتارىن بەكىتتى.
دەكلاراتسيا ارقىلى الەم كارتاسىنان ورنىن قالىپتاستىرعان جاڭا مەملەكەت – قازاقستان رەسپۋبليكاسىنىڭ نەگىزى قالانعانىن قازىرگى ۇرپاق بۋىنى, ياعني تاۋەلسىز ەلىمىزدىڭ ەرتەڭگى ازاماتتارى الدەن ءبىلىپ-وسۋگە ءتيىس. بۇل – ءبارىمىزدىڭ ورتاق قاسيەتتى دە قاستەرلى بورىشىمىز. ەلىمىزدىڭ تاۋەلسىزدىك جولىنداعى تۇڭعىش قادامى وسى دەكلاراتسيانى قابىلداۋ ارقىلى جۇزەگە اسقانى بارلىعىمىزدىڭ ويىمىزدا ءار كەز جاڭعىرىپ تۇرۋعا ءتيىس.
بۇل كۇننىڭ ءارتۇرلى سەبەپتەرمەن, ون جىلدان اسا ۋاقىت بويى ەل كولەمىندە اتالماي كەلگەندىگىن دە جاسىرۋعا بولمايدى. وتكەن جىلدان باستاپ مەملەكەت باسشىسى قاسىم-جومارت توقاەۆ ادىلەتتى قازاقستان قۇرۋ يدەياسىن, ونىڭ دامۋ جولدارىن حالىققا تۇسىندىرە كەلە, 25 قازاندى رەسپۋبليكا كۇنى رەتىندە جاريالاپ قانا قويماي, وعان ۇلتتىق مەرەكە مارتەبەسىن قايتارۋدى ۇسىنعانى ەل كوكەيىندە جۇرگەن جايدى ءدوپ باستى. الەم ەلدەرىنىڭ اراسىندا وزىندىك جولىن تاپقان رەسپۋبليكامىزدى ودان ءارى قاراي دا وركەندەتۋگە بىرگە اتسالىسا بەرەيىك.
ەرنار سەيدىمبەك,
ادىلەت دەپارتامەنتىنىڭ باسشىسى
اباي وبلىسى