24 قازاندا پرەزيدەنت قاسىم-جومارت توقاەۆ رەسپۋبليكا كۇنىنە وراي بىرقاتار ازاماتتى مەملەكەتتىك ناگرادالارمەن ماراپاتتادى. مەرەكە قارساڭىندا قۇرمەتكە يە بولعانداردىڭ اراسىندا ۇلتتىق ۇلاننىڭ اسكەري قىزمەتشىلەرى دە بار, دەپ حابارلايدى Egemen.kz.
مەملەكەت باسشىسىنىڭ جارلىعىمەن 5571 اسكەري ءبولىمىنىڭ اعا مامانى اعا سەرجانت جارقىنبەك ايدارحانبەكوۆ «جاۋىنگەرلىك ەرلىگى ءۇشىن» مەدالىمەن, ال 3477 اسكەري ءبولىمىنىڭ اسكەري قىزمەتشىسى ەفرەيتور تىلەك قۇماربەكوۆ «ەرلىگى ءۇشىن» مەدالىمەن ماراپاتتالدى. ۇلتتىق ۇلاننىڭ اسكەري قىزمەتشىلەرىنە مەملەكەتتىك ناگرادانى ىشكى ىستەر ءمينيسترى پوليتسيا گەنەرال-لەيتەنانتى ەرجان سادەنوۆ رەسپۋبليكا كۇنى مەرەكەسىنە وراي ۇيىمداستىرىلعان سالتاناتتى ءىس-شارادا ءوز قولىمەن تابىستادى.
- بۇگىن مەن مەملەكەتتىك ناگرادا - «جاۋىنگەرلىك ەرلىگى ءۇشىن» مەدالىمەن ماراپاتتالدىم. بۇل سىيلىق ماعان ەكى ايەلدى سۋىق قارۋمەن جاراقاتتاعان قىلمىسكەردى ۇستاعانىم ءۇشىن بەرىلەدى. ۇلتتىق ۇلاننىڭ باس قولباسشىسى گەنەرال-لەيتەنانت ەركىن بوتاقانوۆقا, ماعان وسى مەملەكەتتىك ناگرادانى بەرۋ تۋرالى ءوتىنىش بىلدىرگەنى ءۇشىن العىسىمدى بىلدىرەمىن, - دەدى اعا سەرجانت جارقىنبەك ايدارحانبەكوۆ.
ەسكە سالساق, وقيعا 2022 جىلدىڭ 18 شىلدەسىندە الماتى قالاسىندا بولعان. جارقىنبەك ايدارحانبەكوۆ ساعات تۇنگى 00:50 شاماسىندا ۇيىنەن شىققان بەتتە كومەك سۇراعان ايەل ادامداردىڭ اششى داۋىسىن ەستىگەن. ايعاي شىققان جەرگە جەتكەن اسكەري قىزمەتشى بەلگىسىز ەر ازاماتتىڭ ەكى ايەلدى سۋىق قارۋمەن جاراقاتتاپ جاتقانىن بايقايدى. ۇلاندىقتى كورگەن ساتتە بۇزاقى وقيعا ورنىنان ءىزىن سۋىتۋعا تىرىسادى. الايدا جارقىنبەك قاۋىپتى قىلمىسكەردى تەز ۇستادى.
- رەسپۋبليكا كۇنى قارساڭىندا «ەرلىگى ءۇشىن» مەدالىن العانىما قۋانىشتىمىن. بۇل ءۇشىن اسكەر قولباسشىلىعىنا شىن جۇرەكتەن العىسىمدى بىلدىرگىم كەلەدى. وتكەن جىلى مەن ءۇلبى وزەنىنە باتىپ بارا جاتقان 6 جاسار بالانى قۇتقاردىم. كومەككە ءزارۋ ءبۇلدىرشىندى قۇتقارۋعا ۇمتىلعان ساتتە ءوز ءومىرىمدى ويلاپ جاتاتىن ۋاقىت بولعان جوق, - دەدى ەفرەيتور تىلەك قۇماربەكوۆ.
2022 جىلدىڭ 16 شىلدەسى كۇنى سۋ اعىنىن ەڭسەرە الماي تۇنشىعىپ جاتقان بالانى بايقاعان ەفرەيتور تىلەك قۇماربەكوۆ دەرەۋ سۋعا سەكىرگەن بولاتىن. ونىڭ قولىنان ۇستاپ, جاعاعا شىعارعانى سول ەدى, كەنەت ءوزى سۋ جۇتىپ, تۇنشىعا باستايدى. بالانى قۇتقارىپ ۇلگەرگەنىمەن, ءوزى وزەنگە باتىپ بارا جاتتى. مۇنى كورگەن جاعاداعىلار لەزدە كومەككە كەلىپ, تىلەكتى سۋدان شىعارىپ الدى. سۋدا ءبىراز قالىپ قويعان اسكەري قىزمەتشى ەسىنەن تانىپ قالعان. اۋرۋحاناعا بارا جاتقان جولدا جەدەل جاردەم كولىگىندە وعان رەانيماتسيالىق شارالار جاسالىپ, ول ەسىن جيعان ەدى.
ايتا كەتەيىك, تاۋەلسىزدىك جىلدارىندا ۇلتتىق ۇلاننىڭ 260-قا جۋىق اسكەري قىزمەتشىسى اسكەري جانە قىزمەتتىك بورىشىن ۇلگىلى ورىنداعانى, زاڭدىلىق پەن قۇقىقتىق ءتارتىپتى قامتاماسىز ەتۋگە بەلسەندى قاتىسقانى, قىزمەتتە كورسەتكەن ەرلىكتەرى, باتىلدىعى مەن جانقيارلىعى ءۇشىن مەملەكەتتىك ناگرادالارمەن ماراپاتتالعان.