كۇزگە سالىم كورشى-قولاڭ جينالىپ, ساقاردان سابىن قايناتۋدى قويعالى قاي زامان؟ زايسان اۋدانى, قاينار اۋىلىنىڭ تۇرعىنى ءبيباتيما ىبىرايحان عانا عوي دەيمىن, ۇمىت بولعان ۇلتتىق تەحنولوگيامەن سابىن ءوندىرىپ وتىر. تابيعي سابىنعا سۇرانىس تا جوعارى.
– سابىن قايناتۋ دا اتا-بابامىزدان بەرى كەلە جاتقان تۇرمىستىق سالت-ءداستۇر, – دەيدى ءبيباتيما ىبىرايحان قازانعا ماي قۇيىپ جاتىپ. – قازاقتا كيىز باسۋ, ارقان ەسۋ, سىرماق سىرۋ دەگەن سەكىلدى ونەردىڭ تۇرلەرى كوپ. سونىڭ ءبىرى – وسى قازاقتىڭ قارا سابىنى. بۇرىنعى اجەلەرىمىزدىڭ اپپاق كيمەشەكتەرىنە قاراپ-اق سابىننىڭ ساپاسىن بايقاۋعا بولادى, – دەيدى.
قارا سابىن قايناتامىن دەپ قارا قازاننىڭ قاسىندا جۇرگەن ءبيباتيما اپا سابىن قايناتۋدىڭ ءادىس-تاسىلدەرى تۋرالى ءتۇسىندىرىپ تە بەردى. بىلاي قاراساق, وپ-وڭاي سەكىلدى. ءشوپ ءپىسىپ جەتىلدى-اۋ دەگەندە وسى ءۇيدىڭ وتاعاسى ايدارحان سادۋاقاس الابوتا شاۋىپ الىپ كەلىپ, ونى ورتەيدى ەكەن. اياقتىڭ استىندا وسە بەرەتىن الابوتا وسىمدىگىنىڭ تۇيە الابوتا, سيىر الابوتا, قوي الابوتا دەگەن سەكىلدى بىرنەشە ءتۇرى بار. ءبارى دە سابىن قايناتۋعا جارامدى. ءسويتىپ, ورتەگەننەن قالعان كۇلدى ەرتەسى كۇنى سۋعا قايناتادى. بۇرق-سارق ەتىپ قايناعاندا قاپ-قارا كۇل اپپاق كوبىك بولىپ كوپىرىپ, اق ۇنتاققا اينالادى. ساقار دەپ وتىرعاندارى سول. ودان ونى مالدىڭ ءىش مايىنا قوسىپ ابدەن قايناتادى دا, قالىپ رەتىندە پايدالانىپ جۇرگەن كەسەلەرگە سالىپ شىعادى. كوپ ۇزاماي ەزىلىپ تۇرعان سۇيىقتىق قاتىپ, كادىمگى قارا سابىن بولىپ شىعا كەلەدى.
– مۇنىمەن 17 جاستان باستاپ اينالىسىپ كەلەمىن. اۋەلدە انامنان كورىپ, ۇيرەنگەن ەدىم. كەيىن كەلىن بولىپ تۇسكەندە ەنەم اينالىستى. بۇل ءداستۇرىمىز كەيىن ۇمىتىلىپ قالماسىن دەپ جاستارعا كورسەتكەن بولىپ ءجۇرمىن, – دەيدى ءبيباتيما ىبىرايحان.
ۇلتتىق تەحنولوگيامەن جاسالاتىن بۇل سابىن قولدىڭ كىرىن عانا كەتىرىپ قويمايدى, شاشتىڭ تۇسكەنىنە, تەرى اۋرۋلارىنا, بەتتىڭ سەكپىلىنە, تاباننىڭ قيىلعانىنا كومەكتەسەدى.
شىعىس قازاقستان وبلىسى,
زايسان اۋدانى