ۇلت ساۋلىعى ەرەكشە نازاردا

بيىل مەديتسينا سالاسىنا جاڭا تەحنيكا ساتىپ الۋعا جەرگىلىكتى بيۋدجەتتەن 4,7 ملرد تەڭگە بولىنگەن. بۇل مەديتسينالىق جابدىقتارمەن جاراقتاندىرۋ دەڭگەيىن 93,5 پايىزعا جەتكىزۋگە مۇمكىندىك بەرەدى. وڭىردە «اۋىلدىق دەنساۋلىق ساقتاۋدى جاڭعىرتۋ» ۇلتتىق جوباسى اياسىندا 18 مەديتسينالىق-سانيتارلىق كومەك نىسانىن سالۋ قاراستىرىلعان. ونىڭ ۇشەۋىن جىل سوڭىنا دەيىن پايدالانۋعا بەرۋ كوزدەل­گەن. ال 15 نىساننىڭ قۇرىلىسىن كەلەسى جىلى باستاۋ جوسپارلانىپ وتىر.

«جەرگىلىكتى بيۋدجەت ەسەبىنەن 19 نىساننىڭ قۇرىلىسىن سالۋ جوسپارلانعان ەدى. جىل سوڭىنا دەيىن 12 نىساننىڭ قۇرىلىسى اياقتالادى. ال 5 نىساننىڭ قۇرىلىسى 2024 جىلى باستالادى. اتىراۋ قالاسىنداعى «وركەن» جانە «نۇرسايا» شاعىن اۋدانىندا كۇنىنە 250 پاتسيەنت قابىلدايتىن 2 ەمحانانىڭ قۇرىلىسىن جەدەلدەتۋگە شەشىم قابىلداندى. سول سەبەپتەن, جەرگىلىكتى بيۋدجەتتەن قاراجات قاراستىرىلىپ, قۇرىلىس جۇمىستارى قولعا الىندى», دەيدى س.شاپكەنوۆ.

سونداي نىساننىڭ ءبىرى اتىراۋ قالا­سىنداعى «بەرەكە» شاعىن اۋدانىندا اشىلدى. وبلىس اكىمىنىڭ ورىنباسارى جاسۇلان بيسەمبيەۆتىڭ ايتۋىنشا, دارىگەرلىك امبۋلاتوريا مەملەكەتتىك باعدارلاما اياسىندا سالىنعان.

«مەملەكەتتىڭ ۇستانىپ وتىرعان باسىم باعىتىنىڭ ءبىرى – حالىقتىڭ ساۋلىعىن ارتتىرۋ, مەديتسينالىق كومەككە قولجەتىمدىلىكتى قامتاماسىز ەتۋ. سول سەبەپتەن, وبلىس اكىمدىگى قولدانىستاعى نىسانداردى جاڭارتىپ, جاڭا ەمدەۋ ورىندارىن سالۋعا باسا نازار اۋدارىپ وتىر», دەدى ج.بيسەمبيەۆ.

اتىراۋ قالالىق №3 ەمحانانىڭ ديرەك­تورى ايمان وتەگەنوۆانىڭ مالىمەتىنە سۇيەن­سەك, جاڭا امبۋلاتوريانىڭ 33 كابي­نەتى زاماناۋي كومپيۋتەرلىك تەحنيكامەن, ينتەرنەتپەن تولىق جابدىقتالعان. دارى­گەرلىك امبۋلاتوريا 7 مىڭنان اسا پا­تسيەنتتى قابىلداۋعا ەسەپتەلگەن. ءبىر اۋى­سىمدا 80 پاتسيەنت قابىلدانادى. مۇندا جالپى تاجىريبەلىك دارىگەرلەرگە 5 كابينەت قاراستىرىلعان. سونداي-اق كۇندىزگى ستاتسيونار, ەگۋ جانە ەمدەۋ, گينە­كولوگيا, ستوماتولوگ, دارىگەرگە دەيىن­گى قاراۋ كابينەتى, دەنى ساۋ بالالار بول­مە­سى, 8 كەرەۋەتتى كۇندىزگى ەمحانا جۇمىس ىستەيدى.

«وسى كەزگە دەيىن اتىراۋ قالالىق №3 ەمحانانىڭ دارىگەرلەرى «بەرەكە» شاعىن اۋدانىنىڭ تۇرعىندارىنا مەديتسينالىق قىزمەتتى كورسەتىپ كەلدى. ەندى وتباسىلىق-دارىگەرلىك امبۋلاتوريادا قىزمەت كورسە­تۋ­گە تولىق جاعداي جاسالدى», دەيدى ا.وتەگەنوۆا.

وبلىس اكىمىنىڭ دەرەگىنە قاراعاندا, بيىل 6 ايدا 406 شاعىم تۇسكەن. ونىڭ ىشىندە 74 شاعىمدا كورسەتىلگەن جايتتىڭ نەگىزدى ەكەنىنە دالەل تاپقان. ال 73 شاعىمداعى ايتىلعان دەرەكتەر ءىشىنارا نەگىزدى دەپ سانالعان. بىراق 259 شاعىمنىڭ نەگىزسىز ەكەنى انىقتالىپ وتىر. اكىم شاعىمداردا كورسەتىلگەن كەمشىلىكتەردى جويۋ, الدىن الۋ ماقساتىندا مەديتسينالىق-سانيتارلىق كومەك قولجەتىمدىلىگىن جاق­سار­تۋ, مەديتسينالىق كومەك ساپاسىن ارتتىرۋ شارالارىن باقىلاۋىنا العان.

ء«وڭىردىڭ مەديتسينا سالاسىندا كادر تاپشىلىعى ءالى دە بار. جىل باسىندا 185 ماماننىڭ جەتىسپەيتىنى انىقتالعان ەدى. وسى كەزگە دەيىن 102 مامان جۇمىسقا قابىلدانىپ وتىر. بيىل جەرگىلىكتى بيۋد­جەت ەسەبىنەن 39 مەديتسينالىق جەدەل جاردەم كولىگى ساتىپ الىندى. جاڭا كو­لىكتەر جەلتوقسان ايىندا جەتكىزىلەدى. قىر­كۇيەك ايىنا دەيىن ساقتاندىرىلماعان ادامدار سانى – 74 876. بۇل كورسەتكىش وت­كەن جىلمەن سالىستىرعاندا 17,6%-عا تو­مەندەدى. رەسپۋبليكالىق بيۋدجەتتەن امبۋلا­تورلىق ءدارى-دارمەكپەن قامتاما­سىز ەتۋ ءۇشىن 5,6 ملرد تەڭگە ءبولىنىپ, ءدارى-دارمەكپەن قامتاماسىز ەتىلىپ وتىر. جەر­گىلىكتى بيۋدجەتتەن 301 ملن تەڭگە قا­را­لىپ, دارىلىك زاتتارمەن 108 ناۋقاس قام­تاماسىز ەتىلدى», دەپ مالىمدەدى س.شاپكەنوۆ.

اتىراۋ وبلىستىق بالالار اۋرۋحانا­سى­نىڭ ديرەكتورى نۇرقابىل ايتمۇ­حام­بەتوۆتىڭ ايتۋىنشا, جاقىندا كوپفۋنك­تسيونالدى 115 كەرەۋەت ساتىپ الىنعان. وعان جەرگىلىكتى بيۋدجەتتەن بولىنگەن 127 ملن تەڭگە جۇمسالعان.

«Eleganza مودەلىنەن كوپفۋنكتسيو­نال­دى 15, LISA ماركالى 100 كەرەۋەت بالالار اۋرۋحاناسىنا جەتكىزىلدى. ەلەك­تروندى رەتتەگىشى بار ارنايى توسەك ناۋ­قاستى ستاتسيونارلىق ەمدەۋ مەكەمەلەرىنە ارنالعان. كەرەۋەتكە ءينتۋيتيۆتى تاڭبا­لارى بار باسقارۋ بلوگى ورناتىلعان. بۇل مەيىربيكەلەردىڭ پاتسيەنتكە كۇندەلىكتى كۇتىم جاساۋىن جەڭىلدەتەدى. كەرەۋەت جەڭىل جانە ىڭعايلى, ناۋقاس ءۇشىن جايلىلىقتى قامتاماسىز ەتەدى. امبەباپ كەرەۋەتتەردىڭ 100-ءى بولىمدەرگە بولىنسە, 15-ءى جانساقتاۋ بولىمىنە ورناتىلدى», دەدى ن.ايتمۇحامبەتوۆ.

بۇل اۋرۋحاناعا 17 ملن تەڭگەنىڭ كرا­نيوتوم قۇرىلعىسى سىيعا بەرىلدى. ونى ساتىپ الۋعا مۇناي كومپانياسى دەمەۋشىلىك كورسەتكەن. اۋرۋحانانىڭ نەيروحيرۋرگ دارىگەرى شودەر ءارىپوۆتىڭ اي­تۋىنشا, كرانيوتوم – باس سۇيەكتى بۇر­عىلاۋ, الىنبالى سۇيەك قاقپاعىن جا­ساۋ ءۇشىن قولدانىلاتىن امبەباپ حيرۋرگيالىق قۇرىلعى.

«بۇل قۇرىلعىنىڭ باس جانە مي جاراقاتىن ەمدەۋگە كومەگى كوپ. ماسەلەن, دارىگەردىڭ انىقتاعان دياگنوزىنا باي­لانىستى قان ۇيۋ مەن ىسىكتى جويۋعا, قان تامىرلارىن قالپىنا كەلتىرۋگە بولادى. دارىگەرلەردىڭ ءتۇرلى وپەراتسيانى ءساتتى جاساۋى ءۇشىن وسىنداي وزىق قۇرال-جابدىقتار قاجەت. اسىرەسە باس سۇيەگىنە وپەراتسيا جاساۋ كەزىندە زاماناۋي تەحنو­لوگيانىڭ ماڭىزى ەرەكشە ەكەنى بايقا­لادى. ويتكەنى نەيروحيرۋرگيادا مەدي­تسينالىق تەحنولوگيالار ارقىلى جوعارى ناتيجەلەرگە قول جەتكىزۋگە بولادى. ەندى قيىن وپەراتسيالاردى وسى اسپاپتىڭ كومەگىمەن وڭاي جاساۋعا مۇمكىندىك بار. سەبەبى بۇل قۇرىلعى جاراقاتتى ازايتادى», دەدى ش.ءارىپوۆ.

اتىراۋ وبلىسى