«اۋىل – ەل بەسىگى» جوباسى اياسىندا جامبىل وبلىسىندا قولعا الىنعان جۇمىستىڭ اۋقىمى زور. ماسەلەن, بيىل 98 ەلدى مەكەندە 301 جوبانى جۇزەگە اسىرۋ ماقساتىندا 15,7 ميلليارد تەڭگە قاراجات قاراستىرىلعان. بولىنگەن قاراجات ەسەبىنەن 56 نىساننىڭ قۇرىلىسىن جۇرگىزۋ جوسپارلانعان ەدى.
تۇرار رىسقۇلوۆ اۋدانىنا قاراستى كوگەرشىن اۋىلىنىڭ تۇرعىندارى ەلدى مەكەندە دەربەس اۋىلدىق كلۋب جوقتىعىن جىلدار بويى ايتىپ جۇرەتىن. وسى جىلى ەلدى مەكەن تۇرعىندارىنىڭ تىلەگى ورىندالدى. «اۋىل – ەل بەسىگى» جوباسى اياسىندا 106 ميلليون تەڭگە قاراجات ءبولىنىپ, 90 ورىندىق مادەنيەت ءۇيى سالىندى.
«اۋداننىڭ مادەنيەت سالاسىن وركەندەتۋگە ايرىقشا دەن قويىپ وتىرمىز. سوڭعى ءۇش جىلدىڭ بەدەرىندە «اۋىل – ەل بەسىگى» جوباسى اياسىندا 4 مادەنيەت نىسانى جوندەۋدەن ءوتتى. سونداي-اق وتكەن جىلى قۇرىلىسى باستالعان كوگەرشىن اۋىلىنداعى كلۋب پايدالانۋعا بەرىلىپ وتىر. وسىلايشا, اۋدانداعى حالىق تىعىز ورنالاسقان ەلدى مەكەندەردىڭ ءبىرىنىڭ ماسەلەسى شەشىلدى.
جالپى العاندا اۋداننىڭ 2027 جىلعا دەيىنگى دامۋ جوسپارىنا سايكەس التى اۋىلدا مادەنيەت ءۇيى مەن كلۋب بوي كوتەرەدى دەپ جوسپارلاپ وتىرمىز», دەيدى تۇرار رىسقۇلوۆ اۋدانى اكىمىنىڭ مىندەتىن ۋاقىتشا اتقارۋشى ەرعازى ەسپەنوۆ.
كوگەرشىندە اۋىلدىق كلۋب ۋاقىتىندا جەكەنىڭ قولىنا ءوتىپ كەتكەنى بەلگىلى. قىسقاسى, ۇزاق جىلدار بويى ەلدى مەكەندەگى مادەني نىسان جاپسارلاس عيماراتتا ورنالاسقان بولاتىن. «اۋىل – ەل بەسىگى» جوباسى اياسىندا اۋىلدىقتاردى الاڭداتقان ماسەلە وڭىنان شەشىلگەنى – قۇپتارلىق قادام.
«اۋىلىمىزدا تالانتتى جاستار از ەمەس. جاڭا كلۋبتىڭ سالىنعانىنا بەك قۋانىشتىمىز. ەندى وسى مادەنيەت نىسانىندا ءتۇرلى ۇيىرمەلەر اشىلىپ, تالانتتى بالالارىمىزدىڭ تالابىن ۇشتاي تۇسسە دەگەن تىلەگىمىز بار», دەيدى اۋىل تۇرعىندارى.
جامبىل وبلىسى,
تۇرار رىسقۇلوۆ اۋدانى,
كوگەرشىن اۋىلى