استانادا ءۇندىستان مەن ورتالىق ازيا مەملەكەتتەرىنىڭ ۇلتتىق قاۋىپسىزدىك جونىندەگى كەڭەسشىلەرى مەن قاۋىپسىزدىك كەڭەسى حاتشىلارىنىڭ ەكىنشى كەزدەسۋى ءوتتى. جيىنعا ەلىمىز اتىنان قاۋىپسىزدىك كەڭەسىنىڭ حاتشىسى عيزات نۇرداۋلەتوۆ قاتىستى.
ءىس-شارادا سويلەگەن سوزىندە ع.نۇرداۋلەتوۆ قاتىسۋشىلارعا مەملەكەت باسشىسى قاسىم-جومارت توقاەۆتىڭ قۇتتىقتاۋحاتىن وقىپ بەردى. وندا «ورتالىق ازيا – ءۇندىستان» مەملەكەتتەرىنىڭ باسشىلارى قاتىسقان ءبىرىنشى سامميتتە وڭىرلىك قاۋىپسىزدىكتى نىعايتۋ ءوزارا ءىس-قيمىلدىڭ باستى باسىمدىقتارىنىڭ ءبىرى رەتىندە بەلگىلەنگەنى ايتىلعان.
«ەلدەرىمىزدىڭ قاۋىپسىزدىك كەڭەسى حاتشىلارىنىڭ, ۇلتتىق قاۋىپسىزدىك جونىندەگى كەڭەسشىلەرىنىڭ ەكىنشى كەزدەسۋى وسىناۋ وزەكتى مىندەتتى جۇزەگە اسىرۋعا ماڭىزدى ۇلەس قوسادى. قازاقستان شانحاي ىنتىماقتاستىق ۇيىمى سامميتىندە ادىلەتتى الەم مەن كەلىسىمگە قول جەتكىزۋ جولىندا الەمدىك بىرلىك تۋرالى باستاما كوتەردى. وندا ۇسىنىلعان قاۋىپسىزدىكتىڭ جاڭا پاراديگماسى جاھاندىق وڭتۇستىك پەن جاھاندىق سولتۇستىك اراسىنداعى اشىق ديالوگ ۇستانىمدارىنا نەگىزدەلگەن. وڭىرلىك دەڭگەيدەگى ىنتىماقتاستىعىمىز بۇكىل ەۋرازيا كەڭىستىگىندەگى ءوزارا ءىس-قيمىلدى دامىتۋعا سەپتىگىن تيگىزەرىنە سەنىمدىمىن. مەملەكەتتەرىمىزدىڭ الدىندا ورتاق كۇش-جىگەردى تالاپ ەتەتىن بىرقاتار جالپى وزەكتى سىن-تەگەۋرىن تۇر. ونىڭ قاتارىندا حالىقارالىق تەرروريزم, ەكسترەميزم, ەسىرتكى تاسىمالى جانە ترانسۇلتتىق قىلمىس بار», دەلىنگەن پرەزيدەنتتىڭ قۇتتىقتاۋحاتىندا.
مەملەكەت باسشىسى جيىنعا قاتىسۋشىلارعا جولداعان ۇندەۋىندە تاۋەكەلدەردىڭ باسىم بولىگى اۋعانستانداعى اسكەري-ساياسي جانە الەۋمەتتىك-ەكونوميكالىق احۋالعا بايلانىستى ەكەنىنە نازار اۋدارادى. ورتالىق ازياداعى مەملەكەتتەر مەن ءۇندىستان ازىق-ت ۇلىك قاۋىپسىزدىگىن نىعايتۋعا بىرلەسە كۇش سالۋعا ءتيىس.
«قازاقستان اوك ونىمدەرىن جەتكىزۋدىڭ وڭىرلىك حابىن قۇرۋ ءۇشىن قاجەتتى رەسۋرستار مەن ينفراقۇرىلىمعا يە. وزگە دە سالالار سياقتى بۇل باعىتتى دامىتۋ كولىك قاۋىپسىزدىگىن قامتاماسىز ەتۋگە تىكەلەي بايلانىستى. قازىردىڭ وزىندە قازاقستان ازيا مەن ەۋروپا اراسىنداعى قۇرلىقتاعى ترانزيتتىك تاسىمال جۇيەسىندە ماڭىزدى بۋىن سانالادى. ورتالىق جانە وڭتۇستىك ازيا وڭىرىندەگى كولىك بايلانىسى ماسەلەسىن شەشۋ ءبىزدىڭ جان-جاقتى ىنتىماقتاستىعىمىزدى ساپالى جاڭا دەڭگەيگە شىعارۋعا قابىلەتتى. ەلدەرىمىز اقپاراتتىق قاۋىپسىزدىككە اسەر ەتەتىن ىقتيمال جانە ناقتى قاۋىپ-قاتەرلەرگە تاپ بولىپ وتىر. سوندىقتان ءوزارا تاجىريبە الماسىپ, تەحنولوگيالاردى ۇيرەنۋدىڭ پايداسى مول بولماق», دەدى ۇندەۋدە قاسىم-جومارت توقاەۆ.
پرەزيدەنت ۇنەمى اقپارات پەن ساراپتامالىق باعالاۋلارمەن, ونىڭ ىشىندە وڭىرلىك قاۋىپسىزدىكتىڭ ارحيتەكتۋراسىنا قاتىستى جاڭا ادىستەرمەن الماسۋ ماڭىزىنا توقتالدى.
«جالپى, وڭىردەگى تۇراقتىلىق پەن قاۋىپسىزدىكتى قامتاماسىز ەتىپ, ءبىز ساۋدا-ەكونوميكالىق ىنتىماقتاستىقتىڭ ودان ءارى تەرەڭدەتۋ جانە مادەني-گۋمانيتارلىق بايلانىستاردى كەڭەيتۋ ءۇشىن مىعىم ىرگەتاس قالايمىز. وسىنداي فورماتتاعى كوپجاقتى ديالوگ قازىرگى زامانعى سىن-تەگەۋرىندەگى ۇنقاتۋ بويىنشا بىرلەسكەن ءىس-شارالاردى جۇزەگە اسىرۋ ءۇشىن لايىقتى الاڭعا اينالارىنا سەنىمدىمىن», دەلىنگەن مەملەكەت باسشىسىنىڭ قۇتتىقتاۋحاتىندا.
پرەزيدەنتتىڭ سالەمدەمەسىن وقىپ شىققاننان كەيىن ع.نۇرداۋلەتوۆ جيىنعا قاتىستى ءوز پىكىرىن ءبىلدىردى. ونىڭ ايتۋىنشا, قاۋىپسىزدىك – ءوزارا ىنتىماقتاستىقتىڭ باستى باعىتىنا اينالىپ وتىر.
«بۇل باعىتتاعى بايلانىس كۇشەيدى. ءبىرىنشى كەزدەسۋدەن كەيىن بيىلعى ناۋرىزدا شىۇ الاڭىندا كەزدەستىك. جالپى, وڭىرلىك جانە حالىقارالىق قاۋىپسىزدىك سالاسىنداعى احۋال ديالوگ دەر كەزىندە, ۋاقتىلى باستالعانىن كورسەتەدى. بۇل زاماناۋي قاۋىپ-قاتەرلەرگە قارسى تۇرۋعا كۇش بىرىكتىرۋدە جاقسى مۇمكىندىك بەرەدى», قاۋىپسىزدىك كەڭەسىنىڭ حاتشىسى.