ەركەعالي راحماديەۆ اتىنداعى مەملەكەتتىك اكادەميالىق فيلارمونيانىڭ قازاق وركەسترى XXVII كونتسەرتتىك ماۋسىمىن «استانا – ونەر ورداسى» باعدارلاماسىمەن اشتى. سازدى كەشتە قازاق جانە الەم كومپوزيتورلارىنىڭ تاڭداۋلى شىعارمالارى ورىندالدى.
قازاق وركەسترى – استانا فيلارمونياسىنىڭ 1996 جىلى قۇرىلعان شىعارماشىلىق ۇجىمى. 2008 جىلدان باستاپ وركەستردىڭ كوركەمدىك جەتەكشىسى ءارى باس ديريجەرى – قازاقستاننىڭ ەڭبەك سىڭىرگەن قايراتكەرى, «پاراسات» وردەنىنىڭ يەگەرى ايتقالي جايىموۆ.
«استانا – ونەر ورداسى» باعدارلاماسىندا ماەسترو ايتقالي جايىموۆ پەن وركەستر ديريجەرى, مادەنيەت قايراتكەرى نۇرلان بەكەنوۆتىڭ جەتەكشىلىگىمەن تۇركەشتىڭ «كوڭىلاشار», تاتتىمبەتتىڭ «سارجايلاۋ», دينا نۇرپەيىسوۆانىڭ «اسەمقوڭىر», قۇرمانعازىنىڭ «سارىارقا», «سەرپەر», جانار ءجۇسىپوۆانىڭ «تۇران», ايتباي مۇزداحانوۆتىڭ «امانكەلدى ءدۇبىرى», نۇرلان بەكەنوۆتىڭ «مۇقالي» شىعارمالارىنىڭ وركەسترلىك وڭدەۋلەرى ورىندالدى. سونىمەن قاتار كورەرمەن جورج بيزەنىڭ «كارمەن» جانە ۆولفگانگ امادەي موتسارتتىڭ «فيگارونىڭ ۇيلەنۋ تويى» وپەرالارىنان ۇلتتىق اسپاپتار وركەسترىنە ارنالعان ۋۆەرتيۋرالاردى تىڭداي الدى.
ۆيرتۋوز مۋزىكانتتار دا ءوز كاسىبيلىگىن كورسەتە الدى. انار مۇزداحانوۆا نۇرعيسا تىلەنديەۆتىڭ «اققۋ» كۇيىن ۇسىنسا, جانار ءجۇسىپوۆا «ىقىلاس» كۇيىن شەبەرلىكپەن شەرتتى. سونداي-اق وركەسترمەن بىرگە بوتاگوز ءتاشىموۆا ەدىل قۇسايىنوۆتىڭ «قىپشاق جىرى» شىعارماسىن ۇسىندى. ايتقالي جايىموۆتىڭ «وتپان تاۋ» كۇيىن حالىقارالىق بايقاۋلاردىڭ لاۋرەاتى قايرات جۇماعاليەۆ ورىندادى.
وسى كەشتە فيلارمونيانىڭ اكادەميالىق ۆوكال ءبولىمىنىڭ ارتىستەرى دە ساحناعا شىقتى. تالعات اللابيرينوۆ وركەسترمەن بىرگە ابايدىڭ «ايتتىم سالەم, قالامقاس» جانە دي كاپۋانىڭ «O, sole mio» اندەرىن شىرقادى. ال التىنبەك ءابىلدا سىدىق مۇحامەدجانوۆتىڭ «ايسۇلۋ» وپەراسىنان سەركە كاۆاتيناسى مەن ەركەعالي راحماديەۆتىڭ «بالا عاشىق» تۋىندىسىن پاش ەتتى. حالىقارالىق بايقاۋلاردىڭ لاۋرەاتى فيرۋزا راحمەتوۆا قازاق وركەسترىمەن بىرگە لۋيدجي ءارديتيدىڭ «پوتسەلۋەم» جانە لاتيف ءحاميديدىڭ «بۇلبۇل» شىعارمالارىن ورىنداپ, ەرەكشە اسەر قالدىردى. كەش سوڭىندا ورىنداۋشىلار ارمان جايىمنىڭ «قازاق ەلى» جانە ەرمۇرات ۇسەنوۆتىڭ «استانا» اندەرىمەن كونتسەرتتىك باعدارلامانى اياقتادى.