قىتايدىڭ حانچجوۋ قالاسىندا جازعى پارا ازيا ويىندارى وتەدى. ءبىزدىڭ ەلىمىزدىڭ سپورتشىلارى بىرنەشە سپورت تۇرىنەن سىنعا تۇسەدى. وتىرىپ وينايتىن ۆولەيبول (پارا ۆولەيبول) سپورتىنان ۇلتتىق قۇراماعا ۇلكەن سەنىم ارتىلىپ وتىر. جۋىردا پارازيا ويىندارىنا باراتىن سپورتشىلاردى سالتاناتتى شىعارىپ سالۋ ءراسىمى ءوتتى. ەلىمىزدىڭ سپورتشىلارىن باستاپ, تۋ ۇستاپ شىعۋ قۇرمەتى پاراۆولەيبولشى جانعالي سۇيەۋوۆكە بۇيىردى. جانعالي سۇيەۋوۆ كىم؟ بۇل سپورتقا قالاي تاپ بولدى؟ وزىنەن سۇرادىق.
«اتىراۋ وبلىسىنىڭ تۋماسىمىن. اكەمىز ەرتە ومىردەن ءوتتى دە, ءۇيدىڭ تۇڭعىش بالاسى بولعان سوڭ اناما قولعابىس ەتىپ, مەكتەپتى ءتامامداپ بىردەن جۇمىس ىستەدىم. جۇك كولىگىن جۇرگىزدىم. 2006 جىلى 23 جاسىمدا جول كولىك اپاتىنا ۇشىراپ, اۋىر جاراقاتپەن اۋرۋحاناعا ءتۇستىم. دارىگەرلەر وتا جاساپ ءبىر اياعىمدى كەستى. ارينە, مورالدىق تۇرعىدان دا, رۋحاني, فيزيكالىق جاعىنان دا اۋىر سوققى بولدى. «اناما قالاي كومەكتەسەمىن؟ باۋىرلارىم دا كىشكەنتاي, سولارعا ماسىل بولام با؟» دەگەن وي مازا بەرمەيتىن. ءبىر جىلدان كەيىن باۋىرجان تاحاۋوۆ ەسىمدى باپكەر اعاي وتىرىپ وينايتىن ۆولەيبول سپورتى بار ەكەنىن ايتىپ, سول سپورتپەن شۇعىلدانۋعا شاقىردى. العاشىندا ىڭعايسىزداندىم. ءبىر اياعىنان ايىرىلعان مەن ءۇشىن سپورتپەن شۇعىلدانۋ دەگەن مۇمكىن ەمەستەي كورىندى. بىراق باپكەر باۋىرجان اعاي ءوزىنىڭ اقىل-كەڭەسىن ايتىپ, كەرىسىنشە رۋحىمدى جىگەرلەندىردى. وسىلايشا 2007 جىلدان باستاپ پاراۆولەيبولمەن شۇعىلدانىپ ءجۇرمىن. ۇلتتىق قۇراما ساپىنا ءوتۋ دە وڭاي بولعان جوق, ءوزىڭدى دالەلدەي العاندا عانا قابىلدايدى. 2008 جىلى ۇلتتىق قۇراماعا قابىلداندىم. حالىقارالىق دارەجەدەگى سپورت شەبەرى اتاعىن الدىم. كەلىنشەگىم زاۋىتتا زەرتحانا قىزمەتكەرى, بەس بالام بار. ۇلكەن ۇلىم ۋنيۆەرسيتەتتە وقيدى, ەكىنشى قىزىمىز كوللەدج ستۋدەنتى. ودان كەيىنگى ەكى بالامىز مەكتەپ جاسىندا, كەنجەمىز ەكىدەن استى. كەلىنشەگىم ازىرگە بالا كۇتىمىمەن ۇيدە. ءبىز كوبىنەسە سىرتتا بولامىز, وقۋ-جاتتىعۋ جيىنى, ءتۇرلى جارىسقا قاتىسۋ ءۇشىن ايلاپ ءۇي كورمەيمىز. كەلىنشەگىم بالالاردىڭ ساباعىن دا ءوزى قاداعالاپ كەلەدى. «ەر ازىعى مەن ءبورى ازىعى جولدا» دەمەي مە, مەنىڭ مىندەتىم - شاڭىراقتىڭ تۇتقاسى رەتىندە بالا-شاعاما اقشا تاۋىپ اكەلۋ. تەك مەملەكەت تاراپىنان مۇگەدەكتىگىم ءۇشىن بەرىلەتىن جاردەماقىعا قاراپ وتىرۋعا بولمايدى. پاراۆولەيبولدان ۇلتتىق قۇرامادا ويناعانىمىز ءۇشىن بىزگە اي سايىن جالاقى تولەنەدى. وسىلاي بىرەۋدەن ىلگەرى, بىرەۋدەن كەيىن ءومىر كەشىپ كەلەمىز.
پاراۆولەيبول سپورتىن تاڭداعانىما ەش وكىنبەيمىن. كەرىسىنشە, وسى سپورتتىڭ ارقاسىندا ەلىمىزدىڭ ءار وڭىرىنەن جولداس, دوس تاپتىم. قازاقستان چەمپيوناتى, قازاقستان كۋبوگى, سپارتاكيادا سىندى ەل ىشىندەگى جارىستاردا ءبىر-بىرىمىزگە قارسىلاس بولساق تا, ومىردە توننىڭ ىشكى باۋىنداي ارالاساتىن جولداسپىز.
الدا ءبىز ءۇشىن ۇلكەن سىن تۇر. قىتايدىڭ حانچجوۋ قالاسىندا وتەتىن پارا ازيا ويىندارىندا توپ جارۋ مىندەتى جۇكتەلدى. بيىل پارا ۆولەيبولدان ازيا چەمپيوناتى استانا قالاسىندا ءوتتى, ءبىز كەلەسى جىلى پاريجدە بولاتىن جازعى پاراليمپيادا ويىندارىنا جولداما يەلەندىك. قىتايداعى پارا ازيا ويىندارىندا بارىمىزدى سالامىز دەپ ويلايمىن. قالعان سپورتشىلارعا دا ساتتىلىك تىلەيمىن», دەدى جانعالي سۇيەۋوۆ.