استانادا ءوتىپ جاتقان «Digital Bridge 2023» فورۋمىندا ەسىمى الەمگە ايگىلى امەريكالىق ۆەنچۋرلىق ينۆەستور, Draper Fisher Jurvetson كومپانياسىنىڭ تەڭ قۇرىلتايشىسى جانە درەيپەر ۋنيۆەرسيتەتىنىڭ نەگىزىن قالاۋشى تيم درەيپەر, بولاشاقتا ورتالىق بانكتەر ازايىپ, بيتكويندى رەسمي پايدالاناتىن مەملەكەتتەر كوبەيەدى دەگەن بولجام ايتتى.
سونداي-اق ول ءوز سوزىندە: «ورتالىق بانكتەردە حالىقتىڭ اقشا اۋدارۋى مەن وپەراتسيالارىنا باقىلاۋ بار. حالىق الداعى ۋاقىتتا وسى باقىلاۋدى الىپ تاستاۋدى تالاپ ەتۋى ىقتيمال. بانكتەن ەسەپشوت اشۋ ءۇشىن بەگىلى ءبىر مولشەردە قاراجات جۇمسالادى. بانكتەر دە كەيبىر ازاماتتارعا شوت اشۋعا قۇقىلى ەمەس. ويتكەنى رەتتەۋشىنىڭ باقىلاۋى قاتاڭ. تيىسىنشە, بانكتە شوتى جوق ازاماتتار بيتكوين ارقىلى وزىنشە ەكونوميكاسىن قۇرىپ جاتىر», دەپ مالىمدەدى.
تيم درەيپەردىڭ پىكىرىنشە, بولاشاقتا ورتالىق بانكتەر ازايىپ, بيتكويندى رەسمي پايدالاناتىن مەملەكەتتەر كوبەيمەك.
«بيتكوين پايدالانعاندا سالىقتان جالتارا المايدى, تولەمدەر اۆتوماتتى تۇردە جاسالادى. وسى سەبەپتى دە مەنىڭ بيتكوين تۋرالى پىكىرىم ايتارلىقتاي وپتيميستىك تۇرعىدا», دەدى سپيكەر.
سونىمەن قاتار تيم درەيپەر نە سەبەپتى كەي كريپتوۆاليۋتالاردىڭ سۇرانىسقا يە بولماي قالعانىن ايتتى.
«كەيبىر كريپتوۆاليۋتالار ومىرشەڭ بولا المادى, ويتكەنى ولار ورتالىقتاندىرىلعان ەدى. ولار ءبىر ادامعا بايلانعان بولاتىن. ۇلتتىق ۆاليۋتالار دا ورتالىقتاندىرىلعان. تيىسىنشە, ساياسي كۇشتەرگە تاۋەلدى. بيتكوين ورتالىقسىزداندىرىلعان, اشىق جانە ترانسپارەنت. ءار ادام الەمدەگى كەز كەلگەن ترانزاكتسيانى كورە الادى. جالپى, بيتكوين ءبىزدىڭ ءومىرىمىزدى ايتارلىقتاي جاقسارتا الار ەدى», دەپ قورىتىندىلادى ءسوزىن تيم درەيپەر.
تيم درەيپەر - ميللياردەر, 1985 جىلدان بەرى جۇمىس ىستەيتىن ۆەنچۋرلىق كومپانيانىڭ يەسى. ونىڭ فيليالدارى الەمدەگى ەڭ ءىرى 26 تەحنولوگيالىق ورتالىقتا جۇمىس ىستەيدى. تيم درەيپەر 116 كومپانياعا ينۆەستور رەتىندە اقشا سالعان. ولاردىڭ ىشىندە Skype, Hotmail, Tesla سياقتى كومپانيالار بار.